اتالعان اينالما اۆتوجولى ەل تاريحىنداعى العاشقى كونتسەسسيالىق جوبا بولىپ سانالادى. ونىڭ قۇرىلىسى 3 جىل بۇرىن تۇرىك-كورەيالىق كونسورتسيۋمىنىڭ نەگىزىندە قولعا الىنىپ, جوسپارعا سايكەس 2024 جىلى قولدانىسقا بەرىلۋى كەرەك ەدى. دەسە دە قارقىندى جۇمىستاردىڭ ناتيجەسىندە بۇل نىسان مەرزىمىنەن بۇرىن تاپسىرىلىپ وتىر. قر يدم اۆتوموبيل جولدارى كوميتەتىنىڭ توراعاسى تولەگەن ابدۋللين اۆتوجولدىڭ تيىمدىلىگى مەن باسىمدىقتارىن اتاپ ءوتتى. ونىڭ ايتۋىنشا, ۇلكەن الماتى اينالما اۆتوجولى مەگاپوليس كوشەلەرىندەگى جانە قالا ماڭىنداعى كەپتەلىستى ازايتىپ, ەكولوگيالىق جاعدايدى جاقسارتادى.
«بۇل ەلىمىزدىڭ تاريحىنداعى ماڭىزدى ساتتەردىڭ ءبىرى. سەبەبى ۇلكەن الماتى اينالما اۆتوجولى ورتالىق ازياداعى ەڭ ءىرى ينفراقۇرىلىمدىق جوبا سانالادى. وسى جول قۇرىلىسى حالىقتىڭ يگىلىگى ءۇشىن قولعا الىنعانىن اتاپ وتكەن ءجون. سونداي-اق اتالعان جوبا مەگاپوليس تۇرعىندارى مەن جەرگىلىكتى حالىقتىڭ ەركىن قوزعالۋىنا سەپتىگىن تيگىزەرى انىق», دەدى تولەگەن ابدۋللين.
كونتسەسسيا تەتىگىنە سايكەس, قۇرىلىس جۇمىستارىن ينۆەستور جەكە قاراجاتىن ەسەبىنەن جۇرگىزگەن. ەندى تاياۋ 16 جىل بويى جول ينۆەستوردىڭ كەپىلدىك مەرزىمىندە بولادى. 66 شاقىرىمعا جالعاسقان اينالما جولدى جارتى ساعاتتا ەڭسەرۋگە بولادى.
كولىك جۇرگىزۋشىلەرى جاڭا جولدىڭ تيىمدىلىگىن بايقاپ, ريزاشىلىقتارىن جەتكىزدى.
«بۇل اينالما جول الماتى قالاسى مەن الماتى وبلىسىنا شىنىمەن دە قاجەتتى جوبالاردىڭ ءبىرى. ءوز باسىم جۇك تاسىمالىمەن اينالىسامىن جانە الماتىنىڭ كەپتەلىستەرىن جاقسى بىلەمىن. ۇلكەن الماتى اينالما جولى اشىلسا, جۇك تاسىمالداۋشىلار مەن قاراپايىم تۇرعىنداردىڭ ءجۇرىپ-تۇرۋى جەڭىلدەپ, كەپتەلىس ماسەلەسى شەشىلەدى دەگەن ويدامىز», دەدى كولىك جۇرگىزۋشىسى ميحايل درانيتسا.
الماتى وبلىسىنىڭ اكىمى مارات سۇلتانعازيەۆتىڭ ايتۋىنشا, جاڭا جول-كولىك ينفراقۇرىلىمى ءوڭىردىڭ الەۋمەتتىك-ەكونوميكالىق كورسەتكىشتەرىن جاقسارتىپ, حالىقتىڭ ءال-اۋقاتىن ارتتىرۋعا ىقپال ەتەدى.
«اتالعان اينالما اۆتوجولى - مەملەكەت-جەكەمەنشىك ارىپتەستىك اياسىندا سالىنعان ەلىمىزدەگى ماڭىزدى ينۆەستيتسيالىق جوبالاردىڭ ءبىرى. ول تۇتاستاي ءوڭىردىڭ ەكونوميكالىق دامۋىنا سەرپىن بەرەتىن باتىس قىتاي – باتىس ەۋروپا ترانزيتتىك ءدالىزىنىڭ نەگىزگى تارماعى بولىپ سانالادى. وسى جول وبلىسىمىزدىڭ دامۋىنا اسەر بەرىپ, ينۆەستيتسيالىق جانە تۋريستىك الەۋەتتى ارتتىرادى دەگەن سەنىمدەمىز», دەدى م.سۇلتانعازيەۆ.
وسى جيىنعا قاتىسقان الماتى قالاسى اكىمى ەربولات دوساەۆ ۇلكەن الماتى اينالما اۆتوجولى الماتى اگلومەراتسياسىنىڭ كولىكتىك نەگىزىنىڭ نەگىزى بولىپ تابىلاتىنىن ايتتى. الماتى قالاسىنىڭ 2040 جىلعا دەيىنگى جاڭا باس جوسپارى اياسىندا بۇگىندە وسى جولعا اپاراتىن التى راديالدى جول سالىنىپ جاتىر. جالپى, ەل اۋزىندا باكاد اتالىپ كەتكەن جول بويىندا تولىققاندى اۆتوكولىك قوزعالىسى ىسكە قوسىلدى. اينالما جول 1-ا تەحنيكالىق ساناتى بويىنشا سالىنعان. اتالعان جوبانى قارجىلاندىرۋعا ەۋرازيالىق دامۋ بانكى دە قاتىسقانىن اتاپ وتكەن ابزال.
«ۇلكەن الماتى اينالما اۆتوجولى قازاقستان مەن ەۋرازيا ايماعىندا كولىك مارشرۋتتارىن كەڭەيتۋ بويىنشا ماڭىزدى ءرول اتقارادى. جاڭا نىسان «شىعىس-باتىس» باعىتىنداعى حالىقارالىق اۆتوكولىك مارشرۋتتارىن بايلانىستىرىپ, كولىك قاتىناسىن جاقسارتۋعا, جۇك تاسىمالىنىڭ مۇمكىندىكتەرىن كەڭەيتۋگە وڭ ىقپال ەتەدى. وسى جول ارقىلى تاسىمالداناتىن جۇكتىڭ بولجامدى كولەمى تاياۋ 10-15 جىلدا 87%-عا ۇلعايىپ, 35,9 ملن تونناعا جەتۋگە ءتيىس», دەدى ەۋرازيالىق دامۋ بانكىنىڭ باسقارما توراعاسى نيكولاي پودگۋزوۆ.
رەسمي بولىمنەن كەيىن جاڭا جولدىڭ بويىمەن بىرنەشە كولىك ءجۇرىپ ءوتتى. اتاپ ايتقاندا, ءۇاااج بەلگىلەرى بار 10 اۋىر جۇك كولىگى, 10 اۆتوبۋس جانە جەڭىل اۆتوكولىكتەر قاسكەلەڭ قالاسىنا دەيىن جول تارتتى.
