جالپى, بىزگە يدەولوگيانى سىرتتان ىزدەۋدىڭ اسا قاجەتى جوق. ول وزىمىزدە بار دۇنيە. قازاقستان حالقىن ۇيىستىراتىن – قازاق ۇلتى. ال قازاق ۇلتىن ۇيىستىراتىن – اتا-بابامىزدىڭ ۇستانعان ءدىنى مەن ءتىلى, سالت-ءداستۇرى مەن ادەت-عۇرپى, بۇكىل مادەني شىعارمالارى. سونىمەن قاتار ءوزىمىزدىڭ كلاسسيكتەردىڭ (اباي, شاكارىم, م.اۋەزوۆ, ب.مومىش ۇلى, م.ماقاتاەۆ, ءا.كەكىلباەۆ جانە باسقالار) جانە الاش ارىستارىنىڭ تۋىندىلارى دا بۇل «مايداندا» ءوز ورنىن تابۋى قاجەت. وكىنىشكە قاراي, وسى ىرگەلى دۇنيەلەردى بارلىق شىعارماشىلىق ارنالار ارقىلى (تۆ, كىتاپ, كينو, تەاتر, انيماتسيالىق فيلمدەر, كىتاپ, الەۋمەتتىك جەلىلەر, ت.ب.) ناسيحاتتاۋ كەنجە قالىپ وتىر. وتباسىنداعى, بالاباقشاداعى, مەكتەپتەگى, كوللەدجدەگى, ۋنيۆەرسيتەتتەگى, مەكەمەلەردەگى تاربيە جۇمىستارىن قازاعىمىزدىڭ اسىل مۇرالارى نەگىزىندە ىسكە اسىرۋعا ءتيىسپىز. سوندا ۇلتىمىزدىڭ تامىرىنا بالتا شابىلمايدى, ۋىن شاشىپ جۇرگەن جات اعىمداردىڭ ىقپالىنا توتەپ بەرەتىن, ازاماتتارىمىزدىڭ جۇرەگىندە يدەولوگيالىق يممۋنيتەت, رۋحاني قالقان قالىپتاستىرامىز.
وتانداستارىمىزدى الەم مويىنداعان دانالاردىڭ تۋىندىلارى ارقىلى دا رۋحاني تاربيەلەگەنىمىز ءجون. مىسالى, الەمنىڭ مىقتى 100 ويشىلى مەن كلاسسيگى – ا.ياساۋي, سوكرات, كونفۋتسي, ا.عازالي, ا.ناۋاي, ۋ.شەكسپير, ا.ديۋما, ە.حەمينگۋەي, ل.تولستوي, ا.پۋشكين, تاعى دا باسقالاردىڭ ەڭبەكتەرى مەملەكەتتىك تىلگە اۋدارىلىپ, تاراتىلسا جانە وقۋ باعدارلامالارىنا ەنگىزىلسە, جاستارىمىزدىڭ وي-ءورىسى, سانا-سەزىمى ارتا تۇسەدى.
ەدىل جاڭبىرشين,
ءماجىلىس دەپۋتاتى,
ۇلتتىق قۇرىلتاي مۇشەسى
