وسى ماسەلەگە قاتىستى «Egemen Qazaqstan» گازەتىنىڭ «ۇشقىش بولۋ وڭاي ما؟» ماقالاسىنا كوز جۇگىرتىپ كورسەك.
«قاجەتتى مامان تاپشىلىعى ماسەلەسىن شەشۋ مەن ستۋدەنتتەرىمىزدىڭ ەڭبەك نارىعىنداعى باسەكەگە قابىلەتتىلىگىن ارتتىرۋ ءۇشىن عىلىم جانە جوعارى ءبىلىم مينيسترلىگىمەن بىرلەسىپ, ەۋروپالىق ستاندارتتارعا كوشۋ ارقىلى ازاماتتىق اۆياتسيا سالاسىنا كادر دايارلاۋ جۇيەسىن تۇبەگەيلى رەفورمالاپ, وقۋ ۇدەرىسىن يكاو-نىڭ وزىق ستاندارتتارىنا ساي جولعا قويۋ ماسەلەسى قاراستىرىلىپ كەلەدى», دەيدى م.قاراباەۆ.
جوعارىدا ايتىپ وتكەندەي, ەلىمىزدە 20 مىڭعا جۋىق ادام اۆياتسيا سالاسىندا قىزمەت ەتەدى. ونىڭ ىشىندە ۇشقىش, ينجەنەر, مەنەدجەر تاعى دا باسقا مامانداردى قوسقاندا 107 مەكەمەدە جۇمىس ىستەيدى ەكەن. سالادا 53 اۋە كومپانياسى قىزمەت كورسەتەدى. ونىڭ 8-ءى كۇندەلىكتى جولاۋشى تاسىمالىنا ارالاسادى. ال باسقاسى اۋىل شارۋاشىلىعىن, ماۋسىمعا قاراي ۇشاتىن چارتەرلىك رەيستى جانداندىرسا, بۇل قاتارعا VIP جولاۋشى تاسيتىن كومپانيا دا قوسىلادى. ونىڭ جەتەۋى – جەرگىلىكتى شاعىن اەروپورت. الماتى, اقتوبەدە اۆياجوندەۋ زاۋىتى بۇرىننان جۇمىس ىستەيدى.
اۆياتسياعا مامان دايارلايتىن ورتالىق ازياداعى ازاماتتىق اۆياتسيا اكادەمياسى الماتىدا ورنالاسقان. وندا جوعارى جانە ورتا ءبىلىمدى مامانداردى وقىتادى. كەڭەس وكىمەتى تۇسىندا اۆياتسيا سالاسىندا 6 جوعارى وقۋ ورنى بولعان ەكەن. اقتوبەدەگى ۋچيليششەدە ۇشقىشتار دايارلاعان. ەگەمەندىك العاننان كەيىن, 1995 جىلى ازاماتتىق اۆياتسيا اكادەمياسى قۇرىلىپ, 2000 جىلى ءبىرىنشى تۇلەكتەرىن شىعاردى. سودان بەرىگە دەيىنگى ارالىقتى ەسەپتەسەك, اكادەميا 23 جىلدا 7000 تۇلەك دايارلاپتى. ولاردىڭ شامامەن 80%-ى اۆياتسيا سالاسىندا ەڭبەك ەتىپ ءجۇر. بىراق قازىر سالادا 20 مىڭ جۇمىسشى ەڭبەك ەتەتىنىن ەسكەرسەك, سالىستىرمالى تۇردە بىلىكتى مامان از ەكەنىن اڭعارامىز. بۇل – اۆياتسياداعى مامانداردىڭ ورتا جاسى 50-دەن اساتىنى تۋرالى دەرەكتى راستايدى. قىسقاسىن ايتقاندا كادرلار قارتايىپ بارادى.
