«قوستانايدا بولعان ءورت كەزىندە مەن ازاماتتىق قورعاۋ جانە اتقارۋشى بيلىك ورگاندارىنىڭ توتەنشە جاعدايلارعا ناقتى دايىندىعىنا تەكسەرۋ جۇرگىزۋدى تاپسىردىم.
ورمان جانە دالا ءورتىن ءسوندىرۋ ءۇشىن ورتكە قارسى تەحنيكالىق قۇرال-جابدىق قورلارىن قالىپتاستىرۋ تاپسىرىلدى. دايىندىق دەڭگەيى تومەن ەكەنى انىقتالدى. اتاپ ايتقاندا, ماتەريالدىق-تەحنيكالىق جاراقتاندىرۋ كورسەتكىشى – 69%, فۋنكتسيونالدىق ينفراقۇرىلىم كورسەتكىشى – 63%. جالپى, ورتالىق جانە جەرگىلىكتى اتقارۋشى ورگانداردىڭ توتەنشە جاعدايلارعا دايىندىعى – 70% (توتەنشە جاعدايلار مينيسترلىگى – 75,1%, ەكولوگيا جانە تابيعي رەسۋرستار مينيسترلىگى – 59,5%, جەرگىلىكتى اتقارۋشى ورگاندار – 70,2%). ۇكىمەت دايىندىق كورسەتكىشتەرىن توتەنشە جاعدايلارعا ءتيىستى دارەجەدە توتەپ بەرەتىن دەڭگەيگە جەتكىزۋى قاجەت», دەدى قاسىم-جومارت توقاەۆ.
سونىمەن قاتار مەملەكەت باسشىسى جازدىڭ ىستىعى ەندى باستالعانىن ەسكەرتىپ, ونداي كەزدە ورتكە توتەپ بەرۋ ءۇشىن دايىندىق ساقاداي ساي بولۋ كەرەكتىگىن ەسكە سالدى. وسىعان بايلانىستى ۇكىمەت شۇعىل شارا قابىلداۋ كەرەكتىگىن دە العا تارتتى.
«الەمدە بىردە-ءبىر مەملەكەت كوپ كاسىبي ءورت ءسوندىرۋشىنى ۇستاپ تۇرا المايدى. ەرىكتىلەر وتريادتارىن تارتۋ تاجىريبەسى كەڭىنەن قولدانىلادى جانە ولاردى وقىتادى, قۇرال-جابدىقتارمەن قامتاماسىز ەتەدى, ساقتاندىرۋ شارالارى قاراستىرىلادى. بىزدە دە بۇل نورمالار زاڭ جۇزىندە قاراستىرىلعان. ءبىز بۇل رەسۋرستى بەلسەندى پايدالانۋىمىز كەرەك», دەدى مەملەكەت باسشىسى.
سونداي-اق پرەزيدەنت ورمانعا بارىپ, قاۋىپسىزدىك ەرەجەلەرىن بۇزعان ازاماتتاردى قىلمىستىق جاۋاپكەرشىلىككە تارتۋ كەرەكتىگىن قاداپ ايتتى.
«ورمان القاپتارىنا كەلىپ, قاۋىپسىزدىك ەرەجەلەرىن بۇزعان ازاماتتاردى قىلمىستىق جاۋاپكەرشىلىككە تارتۋ كەرەك. ولار وت جاعىپ, ونى وشىرمەي كەتەدى, بۇل قايعىلى جاعدايعا الىپ كەلەدى. وسىمەن جينالىس اياقتالدى. دەرەۋ ىسكە كىرىسۋ قاجەت», دەپ قورىتىندىلادى ەل پرەزيدەنتى.
