ماۋلەن اشىمباەۆ, مۇحاممەد ابدەلسالامعا استانا حالىقارالىق فورۋمىن قولداپ, وعان بەلسەندى قاتىسقانى ءۇشىن العىس ءبىلدىردى.
سونىمەن قاتار سەنات توراعاسى اقساقالدار كەڭەسىنىڭ حالىقارالىق ارەنادا بەيبىتشىلىك, بىرلىك جانە ءدىني تولەرانتتىلىق يدەيالارىن دارىپتەۋگە قوسقان ۇلەسىن ەسكەرىپ, كەڭەستىڭ الەمدىك جانە ءداستۇرلى دىندەر ليدەرلەرىنىڭ سەزىنە بەلسەندى قاتىسىپ كەلە جاتقانىن اتاپ ءوتتى.
«مۇسىلمان اقساقالدار كەڭەسىنىڭ وكىلدىگىن اشۋ قازاقستان ءۇشىن ەرەكشە مانگە يە. كەڭەستىڭ جۇمىسى تولەرانتتىلىق, بەيبىتشىلىك, كەلىسىم سياقتى قۇندىلىقتاردى دارىپتەۋگە ارنالعان. جالپى, كەڭەس پەن سەزدىڭ ماقساتتارى سايكەس كەلەتىنىن اتاپ وتكەن ءجون. سوندىقتان جاڭا قۇرىلىمنىڭ جۇمىسى سەزدىڭ يدەيالارىن ودان ءارى ناسيحاتتاۋعا ۇلكەن ۇلەس قوسادى دەپ سەنەمىز», دەدى ماۋلەن اشىمباەۆ.
سونداي-اق ماۋلەن اشىمباەۆ وتكەن اپتادا مىسىردىڭ ءدىن ليدەرلەرىمەن بولعان كەزدەسۋلەردىڭ قورىتىندىسىنا نازار اۋداردى جانە سەناتتىڭ الداعى جۇمىس جوسپارىن ايتىپ ءوتتى.
ءوز كەزەگىندە مۇحاممەد ابدەلسالام جاھاندىق بەيبىتشىلىك پەن كەلىسىمدى نىعايتۋدا الەمدىك جانە ءداستۇرلى دىندەر ليدەرلەرى سەزىنىڭ ماڭىزدى ءرولى جونىندە ايتتى.
سونىمەن قاتار ول كونفەسسياارالىق جانە وركەنيەتارالىق ديالوگتى حالىقارالىق دەڭگەيدە دارىپتەۋگە قازاقستاننىڭ ۇلەسى وراسان زور ەكەنىن ايتتى.
