قازىرگى كەزدە ءورتتىڭ جالپى اۋدانى 60 مىڭ گەكتاردان اسادى. ونى سوندىرۋگە تجم, قورعانىس مينيسترلىگى, ءىىم, ەترم جانە جەرگىلىكتى اتقارۋشى ورگانداردىڭ كۇش-قۇرالدارى جۇمىلدىرىلعان.
اتاپ ايتقاندا, 800-گە جۋىق ادام, 190 تەحنيكا جانە 8 تىكۇشاق تارتىلدى. تجم دەرەكتەرىنە ساي, ءورت تاليتسا, كاشتاك, بارىشەۆكا, ۋسپەنكا, پودنەبەسنوە جانە كامىشەنكا ەلدى مەكەندەرىنە قاراي ءۇش باعىتتا تارالىپ جاتىر.
تج اۋدانىن قالىڭ ءتۇتىن باسقانىمەن, جوعارى بەتىندە لاپىلداپ جانىپ جاتقان جوق, وعان اۋا رايى جاقسى اسەر ەتتى – تۇندە جانە تاڭەرتەڭ سىركىرەپ جاڭبىر جاۋدى.
اۆياتسيالىق تەحنيكا بەلسەندى جۇمىس ىستەپ جاتىر. وعان قوسا تج ورنىنا قوسىمشا كۇش-قۇرالدار تارتىلۋدا. قاتتى ورتەنىپ جاتقان ۋچاسكەلەردە تەحنيكا ۇزدىكسىز جۇمىس ىستەۋى ءۇشىن سۋ جەتكىزىلىپ وتىرادى.
ازاماتتار ءۇشىن ۋاقىتشا ورنالاستىرۋ ورىندارى جابدىقتالعان. ەلدى مەكەندەرگە تونگەن قاۋىپ سەيىلدى. جۇمىس – باقىلاۋدا.
سونىمەن قاتار قابىلدانعان شارالار تۋرالى اباي وبلىسىنىڭ اكىمى نۇرلان ۇرانحاەۆ, قورعانىس ءمينيسترى رۋسلان جاقسىلىقوۆ, ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا بايانداما جاسادى.
پرەمەر-مينيستر مەملەكەت باسشىسىنىڭ تاپسىرماسى بويىنشا ءىرى تابيعي ءورتتى جويۋ جانە ازاماتتاردىڭ قاۋىپسىزدىگىن قامتاماسىز ەتۋ ءۇشىن قاجەتتى تەحنيكالىق جانە ادامي رەسۋرستاردىڭ بارلىعى جۇمىلدىرىلعانىن اتاپ ءوتتى.
سونداي-اق ءاليحان سمايىلوۆ قوسىمشا تەحنيكا مەن قىزمەتكەرلەردىڭ ءورت ءسوندىرۋ ورىندارىنا جەدەل جەتۋىن قامتاماسىز ەتۋدى تالاپ ەتتى.
سونىمەن قاتار پرەمەر-مينيستر:
- ەڭبەك جانە حالىقتى الەۋمەتتىك قورعاۋ مينيسترلىگىنە توتەنشە جاعدايدان زارداپ شەككەن وتباسىلارعا الەۋمەتتىك كومەك كورسەتۋ ماسەلەسىن پىسىقتاۋدى;
- دەنساۋلىق ساقتاۋ مينيسترلىگىنە قاجەت بولعان جاعدايدا ازاماتتارعا ۋاقىتىلى مەديتسينالىق كومەك كورسەتۋ ماسەلەسىن باقىلاۋدا ۇستاۋدى;
- ءىىم-گە قوعامدىق ءتارتىپتى ساقتاۋدى جانە تۇرعىندار مۇلكىن قاراۋدى تاپسىردى.
