Erasmus+ جوباسى اياسىندا ەۋرووداقتىڭ 5 ۋنيۆەرسيتەتى جانە ورتا ازيا مەملەكەتتەرىنىڭ 12 جوعارعى وقۋ ورنى سۋ رەسۋرستارىن باسقارۋ جانە سۋ ديپلوماتياسى سالاسىندا كاسىبي قۇزىرەتتىلىكتى ارتتىرۋ ماقساتىندا ىنتىماقتاستىق ورناتادى.
«ورتالىق ازياداعى كليماتتىق وزگەرىستەرگە توزىمدىلىكتى كۇشەيتۋ جانە قاۋىپسىزدىكتى ارتتىرۋ ماقساتىندا سۋ سەكتورىندا جوعارى ءبىلىمدى نىعايتۋ» جونىندەگى Erasmus+ جوباسىن جۇزەگە اcىرۋدىڭ باستى ماقساتى – سۋ سەكتورى سالاسىنداعى وزەكتى ماسەلەلەردى شەشۋ ءۇشىن ورتا ازيا مەملەكەتتەرىندە ادامي كاپيتالدى كۇشەيتۋ. بۇل ماقساتتى جۇزەگە اسىرۋ ءۇشىن جاڭا وقۋ باعدارلامالارى ەنگىزىلەدى, سونداي-اق بۇرىننان بار باعدارلامالار يننوۆاتسيالىق ەلەمەنتتەرمەن تولىقتىرىلادى. جاڭارتىلعان جانە جاڭا باعدارلامالاردا كريتيكالىق ويلاۋ, اكادەميالىق ماتىندەرمەن جۇمىس ىستەۋ, ينتەراكتيۆتى وقىتۋ سىندى ەلەمەنتتەر قاراستىرىلادى. سونىمەن قاتار سۋ ديپلوماتياسىن (water diplomacy) ديپلوماتيانىڭ جاڭا, مامانداندىرىلعان سالاسى رەتىندە دامىتۋعا ەرەكشە كوڭىل بولىنەدى», دەدى مەملەكەتتىك باسقارۋ اكادەمياسىنىڭ ۆيتسە-رەكتورى مارگاريتا كادىروۆا.
ونىڭ ايتۋىنشا, بۇل جوبا اياسىندا سۋ سەكتورى سالاسىنداعى وزەكتى ماسەلەلەردى شەشۋ ءۇشىن باسقارۋشىلاردىڭ جاڭا بۋىنىن دايارلاۋ, ورتا ازيا مەملەكەتتەرىنىڭ اراسىنداعى ىنتىماقتاستىقتى ارتتىرۋ, وقىتۋشى قۇرامنىڭ بىلىكتىلىگىن كوتەرۋ, ءبىلىم الۋشىلار مەن وقىتۋشىلار اراسىندا موبيلدىلىكتى ارتتىرۋ, عىلىمي زەرتتەۋلەردى قولداۋ سىندى ماقساتتار دا كوزدەلگەن.
جوبانى جۇزەگە اسىرۋدا جوعارى وقۋ ورىندارىنىڭ ءرولى ەرەكشە بولماق, سونىمەن قاتار قاراستىرىلىپ وتىرعان ماسەلە بويىنشا مەملەكەتتىك ورگاندار, ازاماتتىق قوعام جانە جەكە سەكتوردىڭ بىرلەسىپ جۇمىس ىستەۋىنە ەرەكشە نازار اۋدارىلماق.
2023 جىلدىڭ 6-7 ماۋسىم ارالىعىندا قىرعىزستان رەسپۋبليكاسى سىرتقى ىستەر مينيسترلىگىنىڭ ديپلوماتيالىق اكادەمياسىندا وتكەن العاشقى كەزدەسۋگە ەۋرووداق جانە ورتالىق ازيانىڭ جوعارعى وقۋ ورىندارىنىڭ وكىلدەرىمەن قاتار, ەۋرووداقتىڭ قىرعىزستانداعى ميسسياسىنىڭ باسشىسى, قىرعىزستاننىڭ ءبىلىم جانە عىلىم ۆيتسە-ءمينيسترى, قىرعىزستاننىڭ سىرتقى ىستەر ۆيتسە-ءمينيسترى, سونداي-اق ورتا ازيا مەملەكەتتەرىنىڭ ديپلوماتيالىق ميسسياسىنىڭ وكىلدەرى قاتىستى.
