ءىس-شاراعا ديپلوماتتار, حالىقارالىق ۇيىمداردىڭ وكىلدەرى, عالىمدار مەن وقىتۋشىلار قاتىستى.
«مۇنداي ءىس-شارانى ەۇۋ قابىرعاسىندا وتكىزۋ قوس ەل اراسىنداعى ىنتىماقتاستىق پەن ءوزارا تۇسىنىستىكتى دامىتۋدا ءبىلىم جانە عىلىم سالاسىنىڭ وراسان زور ءرولىن ايقىندايدى. بۇگىن سەرىكتەستەرىمىزبەن بىرگە ءوزارا ىنتىماقتاستىقتى كەڭەيتۋدىڭ جانە عىلىمي-اكادەميالىق ىنتىماقتاستىق شەڭبەرىندە جاڭا جوبالاردى ىسكە اسىرۋدىڭ تاماشا مۇمكىندىگى تۋىپ وتىر. بۇگىنگى جيىن عىلىم مەن ءبىلىم سالاسىنداعى ەكىجاقتى قارىم-قاتىناستاردى دامىتۋعا جاڭا سەرپىن بەرەدى دەگەن سەنىمدەمىن», دەپ اتاپ ءوتتى ل.ن.گۋميلەۆ اتىنداعى ەۇۋ رەكتورى ەرلان سىدىقوۆ.
كەزدەسۋ بارىسىندا وڭتۇستىك افريكا رەسپۋبليكاسى حالىقارالىق قاتىناستار جانە ىنتىماقتاستىق ءمينيسترىنىڭ ورىنباسارى كانديت ماشەگو-دلاميني افريكا مەن قازاقستاننىڭ ديپلوماتيالىق قاتىناستارىنىڭ دامۋى تۋرالى ەگجەي-تەگجەيلى ايتىپ بەردى.
«بۇل شىنىمەن دە ماڭىزدى وقيعا. ءبىز قازاقستاننىڭ حالىقارالىق قوعامداستىققا قوسقان ۇلەسىن جانە ونىڭ كوپجاقتى ماسەلەلەردەگى ءرولىن اتاپ وتكىمىز كەلەدى. ءبىز قازىرگى جاھاندىق ساياسي جانە ەكونوميكالىق ارحيتەكتۋرانىڭ قۇندىلىقتارى مەن سالىستىرمالى كوزقاراستارىن تالقىلاپ, جاڭالىقتاردى بولىسەمىز. ءبىز ەكى تاراپ اراسىنداعى بولاشاق قارىم-قاتىناستار بۇدان دا سەرپىندى بولاتىنىنا ءۇمىت ارتامىز, اسىرەسە ءبىزدىڭ قارىم-قاتىناستارىمىزدىڭ ەكونوميكالىق اسپەكتىلەرى ىنتىماقتاستىقتىڭ ۇلكەن الەۋەتىن كورسەتەدى», دەپ قورىتىندىلادى كانديت ماشەگو-دلاميني.
ءىس-شاراعا سىرتقى ىستەر ءمينيسترىنىڭ ورىنباسارى قانات تۇمىش تا قاتىسىپ, شارانىڭ ماڭىزدىلىعىن اتاپ ءوتتى.
«بۇگىنگى ءىس-شاراعا ەرەكشە كوڭىل ءبولىپ, ۇلكەن ءمان بەرگەندەرىڭىزگە اسا قۋانىشتىمىز. ەكى ەلدىڭ ديپلوماتيالىق قارىم-قاتىناستارىنىڭ كەلەسى 30 جىلدىعى ءبىزدىڭ ىنتىماقتاستىعىمىزدىڭ التىن كەزەڭى بولاتىنىنا سەنىمدىمىز. وڭتۇستىك افريكانىڭ ۇلى كوشباسشىسى, العاشقى دەموكراتيالىق پرەزيدەنتى نەلسون ماندەلانىڭ: «ەگەر ءسىز ءبىزدىڭ پلانەتامىزدى وزگەرتكىڭىز كەلسە, ءبىلىم – ەڭ كۇشتى قارۋ» دەگەن ءسوزى بار. سونداي-اق ۇلى فيلوسوف ءال-فارابي: «ەگەر ءسىز ۇلتتىڭ بولاشاعىن كورگىڭىز كەلسە, ونىڭ جاستارىنا قاراڭىز», دەپ ايتقان ەدى. وسى تۋربۋلەنتتىلىك كەزەڭىندە ءبىز باۋىرلاستىق, ماحاببات, مەيىرىمدىلىك قاسيەتتەرىن ساقتاۋىمىز كەرەك. تابىستى ۇرپاعىمىز ءۇشىن جاقسى الەم قۇرايىق», دەدى قانات تۇمىش.
وڭتۇستىك افريكانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى كيتۋمەتتسي مەتتيۋس بىرلەسكەن جوبالاردى جۇزەگە اسىرۋ ماقساتىندا قولداۋ كورسەتكەنى ءۇشىن ەۇۋ رەكتورى مەن ۋنيۆەرسيتەت قىزمەتكەرلەرىنە العىس ءبىلدىردى.
ەرلان كيىكباي,
ل.ن.گۋميلەۆ اتىنداعى ەۇۋ ستۋدەنتى
