وبلىس اكىمدىگىنىڭ الدىنا توپتاسقان كوپبالالى انالاردىڭ بارلىعى دەرلىك – ءال-فارابي داڭعىلى, №4 كوپقاباتتى ءۇيىنىڭ تۇرعىندارى. ءۇي وسىدان ەكى جىل بۇرىن كوپبالالى انالارعا بەرىلگەن. بيلىك وكىلدەرىنىڭ ايتۋىنشا, جەكەشەلەندىرۋگە جاتپايدى. جالپى, شىعىس قازاقستان وڭىرىندە جەكەشەلەندىرۋگە جاتپايتىن 21 ءۇي بار ەكەن. سونىڭ ءبىرى – وسى كوپبالالى انالار تۇرىپ جاتقان ءۇي.
«قىستىڭ كۇنى ءۇيدىڭ تەرەزەلەرىنەن جەل گۋلەيدى. 8-9-قاباتتاردا سۋ بولماي قالادى. جەرتولە ۇنەمى سۋعا تولىپ كەتەدى. سونىڭ كەسىرىنەن تاراقان قاپتايدى. ەلەكتر جارىعى دا ۇنەمى وشە بەرەدى. سونىڭ اسەرىنەن تۇرمىستىق تەحنيكالارىمىز كۇيىپ كەتە بەرەدى. ءۇشىنشى جىلعا كەتتى, ەلەكتر ماسەلەسى ءالى رەتتەلمەگەن. ءۇيدىڭ قابىرعالارى جارىلىپ جاتىر. سونداي-اق بالالار ويىن الاڭىنداعى قۇرىلىس تولىق اياقتالماعان. ۋادە ەتكەن جۇمىستارىنىڭ ءبىرىن دە ىستەمەگەن», دەيدى كوپبالالى انا نازگۇل قۇناپيانوۆا.
ءيا, 19 شاعىن اۋدانداعى ءۇي قۇرىلىستارىنىڭ ساپاسى سىن كوتەرمەي تۇرعانىن بىلەمىز. قابىرعالارى قارس ايىرىلىپ, قاپتالعان قاڭىلتىرلارى ۇشىپ كەتىپ جاتقانىن دا نەشە كوردىك. سول سياقتى ءال-فارابي داڭعىلى بويىنداعى №4 ءۇيدىڭ دە ساپاسى سىن كوتەرمەيتىن سەكىلدى.
«كوپبالالى انالارعا ءۇي بەردىك» دەپ اۋىزدارىن تولتىرىپ ايتادى. بىراق بەرگەن ۇيلەرىنىڭ ساپاسى وسى. ءۇيدى جەكەشەلەندىرىپ الساق, ءوزىمىز جوندەر ەدىك. جالعا الىپ وتىرعاندىقتان, اقشا شىعارىپ جوندەگىمىز كەلمەيدى. كۇندەردىڭ كۇنى «ارەندا ۋاقىتى اياقتالدى» دەپ قۋىپ شىقپاسىنا كىم كەپىل؟» دەيدى التىن قۇرساقتى انالاردىڭ ءبىرى اراي بايباتىروۆا.
اكىمدىك الدىنا جينالعان انالار وسى اتالعان پروبلەمالاردى وبلىس اكىمىنە جەتكىزگىلەرى كەلگەنىمەن, دانيال احمەتوۆ شىققان جوق. اكىم وكىلدەرىنىڭ ايتۋىنشا, قالادا ەمەس كورىنەدى. ءارتۇرلى سالا باسشىلارى كەلىپ, جۇمىستىڭ جۇرگىزىلىپ جاتقانىن تۇسىندىرگەن بولدى. دەگەنمەن تۇرعىندار جۇرگىزىلىپ جاتقان جۇمىستاردىڭ بارلىعى ءسوز جۇزىندە عانا دەستى ءبىراۋىزدان. ال اقجاۋلىقتى انالارمەن كەزدەسۋگە كەلگەن وسكەمەن قالاسىنىڭ اكىمى جاقسىلىق ومار ءۇي قۇرىلىسىنىڭ اقاۋلارىن جوندەۋ ءۇشىن جۇمىستار جۇرگىزىلەتىنىن ايتتى. سونداي-اق زاڭعا وزگەرىستەر ەنگىزىپ, جەكەشەلەندىرۋ ءۇشىن دەپۋتاتتار مەن مينيسترلىككە حات جولداعانىن جەتكىزدى.
ء«سال سابىر ەتىڭىزدەر! ەشكىم ول ءۇيدى بوساتىڭىزدار دەپ كەلە المايدى. «نۇرلى جەر» باعدارلاماسى قابىلدانعان كەزدە بۇل تۇرعىن ۇيلەردى مۇقتاج ادامدارعا بەرىلەدى دەگەن تالاپتار بولعان. سولاي بولدى دا. سىزدەر قازىر 4000 تەڭگە مەن 10 000 تەڭگە ارالىعىندا عانا تولەپ, مامىراجاي تۇرا بەرۋلەرىڭىزگە بولادى. ارينە, وزىمىزدىكى بولسا دەيسىزدەر. ونى تۇسىنەمىز. سوندىقتان مەملەكەتتىك ورگاندارعا حات جازدىق. رۇقساتىن الساق, بۇل ماسەلەمەن اينالىسامىز», دەگەن قالا باسشىسى جاقسىلىق مۇقاش ۇلى تۇرعىندار ايتقان ولقىلىقتاردى بارىپ كوردى.
ايتقانداي, پاتەرلەردەگى اقاۋ, كەتكەن ولقىلىقتار جۋىق ارادا شەشىلەتىنىن ايتتى. تۇرعىندارمەن بىرگە رەداكتسيا دا بۇل ماسەلەنى نازاردا ۇستايتىن بولادى. الايدا پاتەرلەردى جەكەشەلەندىرۋ سۇراعى تۇرعىندار كۇتكەندەي بۇگىن-ەرتەڭ وڭ ناتيجە بەرە قويماس. سەبەبى بۇل – مەملەكەتتىك باعدارلاما اياسىندا كەلىسىمشارتپەن بەرىلگەن ۇيلەر.
وسكەمەن
