نەگىزىنەن ىسكەرلىك بەلسەندىلىك يندەكسى ناقتى سەكتورداعى ەكونوميكانىڭ حال-اۋحالىن سيپاتتايتىن كورسەتكىش ەكەندىگىن ەسكەرسەك, ونىڭ اينالىمىنداعى بيزنەس پەن ەكونوميكالىق ۇردىستەرىنىڭ ماڭىزدىلىعىنا اي سايىن زەرتتەۋ جۇرگىزىپ, ناتيجەلەرىن جاريالايتىنى بار.
سونىمەن ءساۋىر ايىندا ەلىمىزدەگى ىسكەرلىك بەلسەندىلىك بىرازعا تومەندەپ 51,2%-دى قۇراعان. ناۋرىز ايىندا بۇل كورسەتكىش 51,6% بولعان. وسىلايشا, بيزنەس-احۋال يندەكسى 14,3-ءتى (ناۋرىزدا 16,5) قۇراپ, بيزنەس-تسيكل «ساعاتىنىڭ» ينديكاتورى ءوسۋ ايماعىندا قالعان.
اقشا-كرەديت ساياساتى كوميتەتىنىڭ ديرەكتورى رۇستەم ورازالين: «كورسەتكىش ديناميكاسىنا وندىرىستەگى يندەكس وزگەرىسى اسەر ەتىپ, بۇل سەكتوردا تاۋارلى-ماتەريالدىق قورلار كولەمىنىڭ ازايۋىنا بايلانىستى 49,6 يندەكستە تەرىس ايماققا ءوتتى. قۇرىلىس سالاسىندا دا كورسەتكىشتىڭ ناشارلاعانى بايقالىپ, ىسكەرلىك بەلسەندىلىك 53,3-تەن 50,4-كە دەيىن باياۋلادى. الايدا يندەكس ءوسۋ ايماعىندا قالدى. قىزمەت كورسەتۋ سەكتورىندا كورسەتكىش الدىڭعى ايدا 51,7, ساۋىردە 52,0 بولدى. تاۋ-كەن ونەركاسىبىندە ناۋرىز ايىندا 48,6-دان ءساۋىر ايىندا 49,8-گە دەيىن جاقسارا ءتۇستى», دەيدى.
ونىڭ ايتۋىنشا, بۇگىنگى كۇنى بيزنەس جۇرگىزۋدىڭ ءبىراز تومەندەگەنىنە قاراماستان, بيزنەس-احۋال يندەكسى وڭ مانگە يە. ناۋرىز ايىندا جەتكىزىلىم تىزبەگىندەگى ىسكەرلىك بەلسەندىلىك جاقسى كورسەتكىش كورسەتكەن. بارلىق سەكتورداعى كاسىپورىندار جاڭا تاپسىرىستار مەن تاۋارلى-ماتەريالدىق قورلاردىڭ كولەمى ارتقانىمەن, تاۋارلاردىڭ كەش جەتكىزىلۋى ەلدەگى ىسكەرلىك بەلسەندىلىكتى تەجەپ وتىرعاندىعى دا بار كورىنەدى.
بۇعان دەيىن دە ۇلتتىق بانك توراعاسى عالىمجان ءپىرماتوۆ: «ىسكەرلىك بەلسەندىلىكتىڭ جاھاندىق يندەكسى 6 اي تومەندەگەن سوڭ قاڭتارداعى 49,8-دەن اقپاندا 52,1-گە دەيىن ءوستى. قىتاي شەكاراسىنىڭ اشىلۋىنا بايلانىستى ەكونوميكالىق سۇرانىسى ارتىپ, رەتسەسسيالىق تاۋەكەلدەر تومەندەدى. لوگيستيكالىق مارشرۋتتار جونگە كەلگەندىكتەن, باعا قىسىمىنىڭ السىرەگەنى بايقالدى», دەگەن ەدى.
ال مامىر ايىندا ءبىرشاما باسەڭدەگەن ىسكەرلىك بەلسەندىلىك 50,6-نى قۇرادى.
جوعارىدا اتالعانداي, بارلىق سەكتور ءۇشىن جەتكىزۋ مەرزىمىنىڭ ۇزاققا سوزىلۋى ىسكەرلىك بەلسەندىلىكتى تەجەۋشى فاكتورىنىڭ ءبىرى بولسا, وندىرىستەگى كورسەتكىش جاقسارا تۇسكەن. مۇندا يندەكس 50,2 (ساۋىردە – 49,4) قۇراپ, وڭ ايماققا ءوتتى. قىزمەت كورسەتۋ سەكتورىندا دا ىسكەرلىك بەلسەندىلىك يندەكسى 51,1-گە دەيىن (ساۋىردە – 51,8) ءبىرشاما تومەندەگەنىنە قاراماستان, وڭ ايماقتا تۇر. قۇرىلىس پەن تاۋ-كەن ءوندىرۋ ونەركاسىبىندە ىسكەرلىك بەلسەندىلىكتىڭ تيىسىنشە 49,6-دان (ساۋىردەگى 49,9-دان) 49,5-كە دەيىن (ساۋىردەگى 49,8-دەن) ەداۋىر تومەندەگەنى بايقالىپ, تاۋارلى-ماتەريالدىق قور كولەمىنىڭ تومەندەۋى تاۋ-كەن ونەركاسىبىندەگى كورسەتكىشتىڭ ديناميكاسىنا اسەر ەتكەن. جاڭا تاپسىرىستاردىڭ كولەمى ارتقانىنا قاراماستان, قۇرىلىستا جەتكىزۋ مەرزىمى ۇزارىپ, جۇمىسپەن قامتۋ دەڭگەيى تومەندەگەن.
«بيزنەس-احۋال يندەكسى ازداپ ارتىپ, بۇگىن مەن الداعى ۋاقىتتا بيزنەستى باعالاۋ جاقسارا ءتۇستى. كورسەتكىش ءوندىرىس پەن قىزمەت كورسەتۋ سەكتورىندا ءوسىپ, قۇرىلىس پەن تاۋ-كەن ءوندىرۋ ونەركاسىبىندە تومەندەگەنى بايقالدى. سونىمەن ورتاشا باعالاۋدى بىلدىرەتىن بيزنەس-احۋال يندەكسى 15,4-ءتى (2023 جىلعى ساۋىردە – 14,0) قۇراپ, بيزنەس-تسيكل «ساعاتىنىڭ» ينديكاتورى ءوسۋ ايماعىندا قالدى», دەپ تۇسىندىرەدى ر. ورازالين.
