بۇگىندە اتالعان كەشەن سارقان اۋدانىندا. حالىققا مامانداندىرىلعان مەديتسينالىق كومەكتىڭ قولجەتىمدىلىگىن جاقسارتۋ ءۇشىن قولعا الىنعان يگىلىكتى ىسكە تۇرعىندار ءدان ريزا. ءبىر جىل ىشىندە مەديتسينالىق كەشەن بارلىق ەلدى مەكەندى ارالاۋدى ماقسات تۇتىپ وتىر.
«الەۋمەتتىك مەديتسينالىق ساقتاندىرۋ قورى» كەاق جەتىسۋ وبلىسى بويىنشا فيليالىنىڭ مالىمەتىنشە, كەشەن بارلىق قاجەتتى دياگنوستيكالىق اپپاراتپەن جابدىقتالعان: رەنتگەن, ۋلترادىبىستىق, ستوماتولوگيالىق ەلەكتروكارديوگراف, كوز قىسىمىن ولشەگىش جانە باسقا زەرتحانالىق جابدىقتار. تەراپەۆت, گينەكولوگ, حيرۋرگ, كارديولوگ, ستوماتولوگ, ۋلترادىبىستىق دارىگەر, وكۋليست, نەۆروپاتولوگ سياقتى بىلىكتى ماماندار توبى شالعايداعى ەلدى مەكەندەردىڭ تۇرعىندارىنا ساپالى مەديتسينالىق كومەك پەن كەڭەس بەرەدى.
«جىلجىمالى مەديتسينالىق كەشەن اۋىل تۇرعىندارىنىڭ باسىم بولىگىن قامتۋعا جانە كورسەتىلەتىن قىزمەتتەردىڭ ساپاسىن ارتتىرۋعا مۇمكىندىك بەرەدى. اۋرۋدى ەرتە انىقتاۋعا, ولاردى كەڭ كولەمدە ەمدەۋگە جانە جالپى حالىقتىڭ دەنساۋلىعىن جاقسارتۋعا كومەكتەسەدى. شالعايداعى ەلدى مەكەندەردىڭ تۇرعىندارىنا ۋلترادىبىستىق, فليۋوروگرافيا, ەكگ سياقتى زەرتتەۋلەردى اۋدان ورتالىعىنا بارماي-اق جۇرگىزۋگە بولادى. حالىق ءۇشىن بۇل – ۇلكەن ارتىقشىلىق», دەيدى نەۆروپاتولوگ دارىگەر جاڭابەك كانالبەكوۆ.
جالپى, پراكتيكا دارىگەرىنىڭ كابينەتىندە پاتسيەنت تەكسەرىلەدى, قان اينالىمى, تىنىس الۋ, ەندوكريندىك, اس قورىتۋ جۇيەسى اۋرۋلارىنىڭ, قان جانە گەموپوەز ورگاندارىنىڭ, سونداي-اق باسقا دا ورگاندار مەن جۇيەلەردىڭ قاۋىپ فاكتورلارى انىقتالادى, قاجەتتى ەمدەۋ تاعايىندالادى, سالاۋاتتى ءومىر سالتىن ناسيحاتتاۋ جانە قالىپتاستىرۋ بويىنشا پروفيلاكتيكالىق ءىس-شارالار جۇرگىزىلەدى. ال سوزىلمالى ينفەكتسيالىق ەمەس اۋرۋلارى بار ديناميكالىق باقىلاۋداعى ادامدارعا مەديتسينالىق كەشەننىڭ زەرتحانالىق-دياگنوستيكالىق رەسۋرستارىن پايدالانا وتىرىپ, ديناميكالىق مونيتورينگىن رەتتەيتىن نورماتيۆتىك-قۇقىقتىق اكتىلەرگە سايكەس بىلىكتى مەديتسينالىق كومەك كورسەتىلەدى.
فۋنكتسيونالدىق دياگنوستيكا كابينەتىندە: ءىش قۋىسىنىڭ, قالقانشا بەزىنىڭ ۋلترادىبىستىق زەرتتەۋى, ينتەرپرەتاتسيامەن جۇرەكتى ەلەكتروكارديوگرافيالىق زەرتتەۋ جۇرگىزىلەدى. اكۋشەر-گينەكولوگتىڭ كابينەتىندە ايەلدەردىڭ نىسانالى توبىن باستاپقى تەكسەرۋ, پاپ-تەست, ىسىك پاتولوگياسىن انىقتاۋ ءۇشىن ءسۇت بەزدەرىن تەكسەرۋ جۇرگىزىلەدى.
زەرتحانالىق دياگنوستيكا كابينەتىندە قانداعى گليۋكوزا, حولەستەرين دەڭگەيىن انىقتاۋ, قان تريگليتسەريدتەرى بويىنشا زەرتتەۋلەر جۇرگىزەدى, بيوحيميالىق زەرتتەۋلەر: جالپى, تىكەلەي بيليرۋبين, الانينامينوترانسفەرازا, اسپارتاتامينوترانسفەرازا, كرەاتينين, موچەۆينا, جالپى اقۋىز, كالي, ناتري, ءزاردىڭ جالپى كلينيكالىق تالداۋى جاسالادى. رەنتگەنوگرامما كابينەتىندە تۋبەركۋلەزدى, وكپە ىسىكتەرىن جانە باسقا دا سوزىلمالى اۋرۋلاردى دياگنوستيكالاۋ ماقساتىندا تەكسەرۋ جۇرگىزۋ ءۇشىن تسيفرلىق فليۋوروگراف پايدالانىلادى.
ء«بىزدىڭ اۋىل اۋدان ورتالىعىنان الىس ورنالاسقان. مەن كوپبالالى انامىن جانە وسىنداي جىلجىمالى مەديتسينالىق پۋنكتتە تەكسەرۋدەن ءوتۋ وتە ىڭعايلى. ۇيدەن الىس كەتپەي, ءىش قۋىسىنىڭ ۋلترادىبىستىق زەرتتەۋىن جاساتتىم, ودان ءارى ەمدەلۋگە جولداما الدىم», دەپ ويىمەن ءبولىستى قارابوگەت اۋىلىنىڭ تۇرعىنى.
ەستەرىڭىزگە سالا كەتەيىك, جىلجىمالى مەديتسينالىق كەشەندە تەكسەرۋدەن ءوتۋ ءۇشىن دارىگەردىڭ جولداماسى قاجەت ەمەس. بۇل كەشەندە مەديتسينالىق كومەك تەگىن مەديتسينالىق كومەكتىڭ كەپىلدىك بەرىلگەن كولەمى جانە ساقتاندىرىلعان ازاماتتارعا مىندەتتى الەۋمەتتىك مەديتسينالىق ساقتاندىرۋ جۇيەسى شەڭبەرىندە تەگىن كورسەتىلەدى. ايتا كەتەيىك, سارقان اۋدانىندا 40-قا جۋىق ەلدى مەكەن بار. تۇرعىندارعا ورتالىق اۋداندىق اۋرۋحانادان باسقا 7 دارىگەرلىك امبۋلاتوريا, 4 فەلدشەرلىك-اكۋشەرلىك جانە 14 مەديتسينالىق پۋنكت قىزمەت كورسەتەدى.
ساقتاندىرۋ مارتەبەسى مەن مەديتسينالىق قىزمەتتەردىڭ ساپاسىنا قاتىستى سۇراقتار تۋىنداعان جاعدايدا ەمحانانىڭ پاتسيەنتتەردى قولداۋ قىزمەتىنە, سونداي-اق الەۋمەتتىك مەديتسينالىق ساقتاندىرۋ قورىنا fms.kz رەسمي سايتى, 1414 بايلانىس ورتالىعى, Qoldau 24/7 ءموبيلدى قوسىمشاسى مەن Telegram-داعى SaqtandyryBot بايلانىس ارناسى ارقىلى جۇگىنۋگە بولادى.
جەتىسۋ وبلىسى
