شىمكەنت قالاسى پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى قاراتاۋ اۋدانى كوشەلەرىنىڭ بىرىندە ەسىرتكى تاسىمالىمەن اينالىسقان ايەل ادامدى ۇستادى.
جەدەل ۋاكىلدەر ايەلدەن بەلگىسىز زات سالىنعان 40 پوليەتيلەن پاكەتىن تاركىلەدى. ساراپتاما ناتيجەلەرى تاركىلەنگەن زاتتاردىڭ سينتەتيكالىق ەسىرتكى ەكەنىن كورسەتتى.
تەرگەۋ بارىسىندا 1969 جىلى تۋعان تۇركىستان وبلىسىنىڭ تۇرعىنى Telegram ارناسى ارقىلى جۇمىس ىزدەگەنىن ايتتى. ناتيجەسىندە ول ينتەرنەتتە وڭاي ءارى جىلدام اقشا تابۋدى ۇسىنعان بەلگىسىز بىرەۋمەن تانىسقانىن مويىندادى. ءتورت اي بويى اۋىل تۇرعىنى تۇركىستان قالاسىنا ەسىرتكى تاسىمالداۋمەن اينالىسقان. ول Telegram ارقىلى بەرىلگەن نۇسقاۋدى ورىنداپ, جۇمىس اقىسىن ەلەكتروندى تۇردە الىپ وتىرعان.
«قر قك-ءنىڭ 297-بابى 3-بولىگى (وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ) بويىنشا سوتقا دەيىنگى تەرگەپ-تەكسەرۋ جۇرگىزىلدى. قىلمىستىق ىستەر جونىندەگى مامانداندىرىلعان سوت 54 جاستاعى ايەلدى 10 جىلعا باس بوستاندىعىنان ايىرىپ, جازاسىن قاۋىپسىزدىگى ورتاشا رەجيمدەگى كولونيادا وتەۋ تۋرالى ۇكىم شىعاردى», دەلىنگەن حابارلامادا.
