18 جاستان اسقان, جۇمىسقا ورنالاسپاعان ايەلدەر «IT-Aiel» باعدارلاماسىنا قاتىسۋعا ءوتىنىش بەرىپ, «No Code School», «Freelance School», سونداي-اق نەگىزگى كومپيۋتەرلىك ساۋاتتىلىق كۋرستارى بويىنشا وقي الادى. قاتىسۋشىلار جاڭا ءىستى يگەرۋگە 1 تامىزدا ونلاين فورماتتا قازاق جانە ورىس تىلدەرىندە كىرىسە الادى. باعدارلاما قىزىقتى ۆەبينارلار, ۆوركشوپتار, تىكەلەي ەفيرلەر, Q&A-سەسسيالارىنان تۇرادى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەكتەرىنە سۇيەنسەك, ەلىمىزدە 967 مىڭ جۇمىسقا قابىلەتتى ايەل بار. ولاردىڭ 34 پايىزى جۇمىس ىستەمەيدى. ال 41 پايىزى جوعارى بىلىمگە يە. جاقىندا «Coursera IFC» جانە ەۋروپالىق كوميسسيامەن بىرلەسە جۇرگىزگەن زەرتتەۋ كورسەتكەندەي, ايەلدەردىڭ 45 پايىزى جانە بالا كۇتىمىندەگى ايەلدەردىڭ 60 پايىزى ونلاين وقىتۋ مۇمكىندىگى بولماعان جاعدايدا وقۋدى كەيىنگە قالدىرىپ نەمەسە توقتاتۋعا ءماجبۇر بولاتىنىن مويىندادى. سوندىقتان «IT-Aiel» باعدارلاماسى جۇمىسسىز ايەلدەر ءۇشىن ماڭىزدى ءارى ۇلكەن مۇمكىندىككە يە.
جوباعا قاتىسۋ ءۇشىن ايەلدەر قاۋىمى سايت ارقىلى ءوتىنىش بەرۋى كەرەك: https://education.astanahub.com/itaiel. وقىتۋ قورىتىندىسى بويىنشا جوبانىڭ بارلىق تۇلەگى وقۋدى اياقتاعانىن راستايتىن ەلەكتروندى سەرتيفيكاتقا يە بولادى. باعدارلامانىڭ ۇزدىك 100 قاتىسۋشىسى كۋرستىڭ سوڭىندا سالتاناتتى تۇردە ماراپاتتاۋعا شاقىرىلادى.
وتىنىمدەردى قابىلداۋ 15 شىلدەگە دەيىن جالعاسادى. ال قوسىمشا اقپاراتتى مىنا سىلتەمە ارقىلى تابۋعا بولادى: https://education.astanahub.com/itaiel. قوسالقى سۇراقتار بويىنشا edu@astanahub.com ەلەكتروندى پوشتاسىنا جازۋعا نەمەسە 2222 بىرىڭعاي نومىرىنە قوڭىراۋ شالۋعا بولادى.
ەسكە سالا كەتەيىك, «Astana Hub» – وتاندىق جانە شەتەلدىك تەحنولوگيالىق كومپانيالاردىڭ ەركىن دامۋى ءۇشىن بارلىق جاعداي جاسالعان ورتالىق ازياداعى ەڭ ءىرى تەحنوپاركتىڭ ءبىرى. قازىرگى ۋاقىتتا تەحنوپاركتە 1 مىڭنان استام قاتىسۋشى بار. ولار 14 مىڭنان استام جۇمىس ورنىن اشتى. ال پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ايەلدەر مەن وتباسىلاردىڭ ءومىر ءسۇرۋ جاعدايىن جاقسارتۋ ستراتەگيالارىن جوسپارلاپ, ىسكە اسىرادى. سونداي-اق ايەلدەر قۇقىعىن قورعاۋ, وتباسىلاردى قولداۋ جانە دەموگرافيانى نىعايتۋ باعدارلامالارىن ازىرلەپ, جۇرگىزەدى.
