التى كۇنگە جوسپارلانعان فوتوساپار اقتاۋ قالاسى اكىمدىگىنىڭ قولداۋىمەن ىسكە اسىپ وتىر.
ەكسپەديتسيانىڭ نەگىزگى ماقساتى – ماڭعىستاۋ ولكەسىنىڭ كوز تارتار تابيعاتى مەن بىرەگەي لاندشافتىن جان-جاقتى كورسەتەتىن فوتوماتەريالدار دايىنداۋ, تۋريستەردىڭ نازارىن اۋدارتۋ.
سونداي-اق ساپاردىڭ قورىتىندىسى بويىنشا اقتاۋ قالاسىندا «مارس پەيزاجدارى» دەپ اتالاتىن فوتوكورمە ۇيىمداستىرۋ كوزدەلىپ وتىر. بۇل جوبا اياسىندا National Geographic Qazaqstan رەداكتسياسى تاڭداعان ۇزدىك 25 جۇمىس كورمەگە قويىلىپ, كوپشىلىكتىڭ نازارىنا ۇسىنىلماق.
ايتا كەتەيىك, ەكسپەديتسيالىق توپ قۇرامىندا National Geographic Qazaqstan جۋرنالىنىڭ وكىلدەرى, وتاندىق كاسىبي فوتوگرافتار مەن ۆيدەوگرافتار, سونداي-اق ساياحاتشى بلوگەرلەر دە بار.
سونىمەن قاتار ەكسپەديتسيانىڭ نەگىزگى باعىتتارىنا تامشالى, قاپامساي, تورىش, بوزجىرا, قىزىلكۇپ سەكىلدى تۋريستىك نىساندارمەن قاتار, بەكەت اتا, سۇلتان ەپە سىندى ماڭعىستاۋدىڭ كيەلى ورىندارى دا كىرەدى.
