ماقسات تولىقباي الماتىداعى Hilton قوناق ءۇيىنىڭ 160 قىزمەتكەرىنىڭ ارىز-شاعىمىن تىڭداپ قايتقان. بۇل قوناق ءۇيدىڭ يەسى شولپان كارانەەۆا عيماراتتى قايرات ساتىبالدىنىڭ رەيدەرلىك جولمەن تارتىپ العانىن 2020 جىلى-اق اشىق ايتىپ, تالاي بۇقارالىق اقپارات قۇرالدارىنا سۇحبات بەرگەن ەكەن.
«وسىدان ءتورت جىل بۇرىن (2019 ج) فرانچايزينگ كەلىسىمىمەن Hilton قوناق ءۇيىن سالعان. قۇرىلىستى اياقتاۋ ءۇشىن «Capital Bank Kazakhstan» اق-عا قوناق ءۇيدى كەپىلگە قويىپ 4 ملرد 200 ملن تەڭگە سوماسىندا قارىز العان. كوروناۆيرۋس پاندەمياسى باستالعان 2020 جىلى Hilton قوناق ءۇيى قىزمەتىن ۋاقىتشا توقتاتقان.
سول كەزدە پرەزيدەنت كاسىپكەرلەردى تۇرالاپ قالماۋ ءۇشىن بانكتەرگە تولەمدەردى ۋاقىتشا توقتاتۋعا بۇيرىق بەرگەن. ال «Capital Bank Kazakhstan» اق پرەزيدەنت بۇيرىعىن پىسقىرماعان. بانك تاراپى وتىنىشكە جاۋاپ بەرمەي, قوناق ءۇيدى «زاڭگەر» كوللەكتورلىق اگەنتتىگىنە بەرەدى. ال «زاڭگەر» قوناق ءۇيدىڭ نارىقتاعى قۇنى 9,5 ملرد تەڭگەدەن اسسا دا, ونى بار بولعانى 5,1 ملرد تەڭگەگە باعالاپ, «بايدالا» جشس-عا ساتىپ جىبەرگەن», دەيدى ش.كارانەەۆا.
سونىمەن قاتار «بايدالا» كومپانياسىنىڭ ارتىندا قايرات ساتىبالدى تۇرعانىن, رەيدەرلىك باسىپ الۋ ارەكەتى دەپ اپەللياتسيالىق سوتقا شاعىمدانعانىمەن ەشقانداي ناتيجە شىقپاعانىن جاسىرمادى.
«قايرات ساتىبالدى اباقتىعا قامالىپ, دۇنيە-مۇلكى تاركىلەنگەن كەزدە ءبىزدىڭ قۇزىرلى ورگاندار DoubleTree by Hilton قوناق ءۇيىن دە قايراتتىڭ تاركىلەنگەن م ۇلىكتەرىنىڭ قاتارىنا قوسىپ قويعان ەكەن. «ابلي قۇرىلىس» كومپانياسى ء«بىز «بايدالا» جشس-مەن سوتتاسىپ جاتىرمىز, بۇل قالاي قايرات ساتىبالدىعا ءوتىپ كەتەدى, ءىس ءالى قارالىپ جاتىر عوي؟!» دەپ ارىز تۇسىرگەننەن كەيىن قايرات پەن «بايدالا» اراسىندا تەز ارادا كەلىسىمشارت (دوگوۆور كۋپلي-پروداجي) جاسالادى. تۇرمەدە! ول جەرگە نوتاريۋستى قالاي كىرگىزىپ ءجۇر, تۇرمەدە وتىرعان قايراتتىڭ قالتاسىندا 6 ملرد تەڭگە قايدان ءجۇر؟! بۇل جەردە دە زاڭسىزدىق كوپ», دەلىنگەن جازبادا.
شاعىمدانۋشىنىڭ ايتۋىنشا, قايرات ساتىبالدى ۇستالسا دا, رەيدەرلىك ارەكەت ءالى دە جالعاسىپ جاتىر.
«ەندىگى سحەما بىلاي: قوناق ءۇيدى قايرات ساتىبالدىنىڭ اتىنان مەملەكەتتىك اكتيۆكە وتكىزىپ جىبەرىپ, ارزان باعادا اۋكتسيون ارقىلى ءوز اتتارىنا اۋدارىپ العىسى كەلەتىن باسقا مۇددەلى توپتار قاتتى جۇمىس ىستەۋدە. قايرات ساتىبالدى ۇستالسا دا, رەيدەرلىك ارەكەت جالعاسىپ جاتىر», دەيدى شاعىمدانۋشى.
«وسى ورايدا ءبىز شىن مانىندە ادىلەتتى قازاقستان قۇرعىمىز كەلسە, وسىنداي زاڭدى بيزنەسىن الدەكىمدەر كوپە-كورنەۋ تارتىپ العان تۇلعالاردىڭ دا زارى مەن مۇڭىنا قۇلاق ءتۇرىپ, كوڭىل ءبولۋىمىز كەرەك شىعار. جابىرلەنۋشى تاراپتىڭ سۇرايتىنى ءبىر-اق نارسە: قۇزىرلى ورگاندار ءىستى ءادىل قاراسا ەكەن», دەپ جازباسىن اياقتادى دەپۋتات.
سونىمەن قاتار ول شاعىمدانۋشىلاردىڭ ارىزىن انتيكور مەن باس پروكۋرورعا جولداعانىن ايتتى.
