ەلوردانىڭ قورشاعان ورتانى قورعاۋ جانە تابيعاتتى پايدالانۋ باسقارماسى «جاسىل ەل» جاستار ەڭبەك جاساقتارىنىڭ رەسپۋبليكالىق شتابى» جەكە مەكەمەسىمەن, «استانا ەكو پوليگونى» جشس جانە «Clean City NC» جشس بىرلەسىپ اۋقىمدى تازالىق ۇيىمداستىردى.
دۇنيەجۇزىلىك قورشاعان ورتانى قورعاۋ كۇنىنە ارنالعان ءىس-شاراعا 500-گە جۋىق «جاسىل ەل» ەرىكتىلەرى قاتىستى. ولاردى پوليگون قىزمەتكەرلەرى ۇيلەستىردى, سونىمەن قاتار قاتىسۋشىلارعا بارلىق قاجەتتى قۇرال بەرىلدى.
«بۇل اكتسيا 5 ماۋسىم – دۇنيەجۇزىلىك قورشاعان ورتانى قورعاۋ كۇنىنە ارنالعان. بۇل – قوعام نازارىن ەكولوگيا ماسەلەسىنە اۋدارۋدىڭ ەرەكشە سەبەبى. ءار ادامنىڭ كومەگىنسىز العا جىلجي المايمىز, سوندىقتان قورشاعان ورتاعا دەگەن قامقورلىقتى جان-جاقتى ناسيحاتتاۋ قاجەت», دەدى ەكولوگ قالامقاس ق ۇلىمباەۆا.
ەرىكتىلەر نۇرداۋلەت پەن باقداۋلەت رىسقۇلبەكوۆتەردىڭ ايتۋىنشا, «جاسىل ەل» جاستار جوباسىنا 100-گە جۋىق مەكتەپتىڭ وقۋشىلارى جۇمىلدىرىلدى. مامىر ايىنىڭ باسىنان باستاپ قالانى كوركەيتۋ بويىنشا ارنايى جۇمىس ىستەگەن وقۋشىلار ءتيىستى جالاقى الادى.
