كوميتەت توراعاسى اسحات ايماعامبەتوۆتىڭ جەتەكشىلىگىمەن وتكەن جيىنعا دەپۋتاتتارمەن قاتار ۇكىمەتتىڭ, رەسپۋبليكالىق جانە جەرگىلىكتى مەملەكەتتىك ورگاندار مەن ۇكىمەتتىك ەمەس ۇيىم وكىلدەرى قاتىستى. ولار ەلدەگى مەملەكەتتىك ساتىپ الۋ جۇيەسىنىڭ ماسەلەلەرىن تالقىلاپ, ۇسىنىستارىن ورتاعا سالدى.
قارجى ۆيتسە-ءمينيسترى داۋرەن كەڭبەيىلدىڭ مالىمەتىنشە, دۇنيەجۇزىلىك بانكتىڭ زەرتتەۋلەرىنە سايكەس, قازاقستاننىڭ ەلەكتروندىق مەملەكەتتىك ساتىپ الۋ جۇيەسى الەمدە ۇزدىكتەر قاتارىندا. بۇگىندە مەملەكەتتىك ساتىپ الۋ ۆەب-پورتالىنا 100 مىڭنان استام ءونىم بەرۋشى مەن 24 مىڭنان استام تاپسىرىس بەرۋشى تىركەلگەن.
ءماجىلىس دەپۋتاتى رينات زايىتوۆ مەكتەپتەر مەن مەكتەپكە دەيىنگى مەكەمەلەردەگى كۇزەت قىزمەتىن مەملەكەتتىك تاپسىرىسقا بەرۋدى الىپ تاستاۋدى, ال ەلنۇر بەيسەنباەۆ مەملەكەتتىك ساتىپ الۋ بويىنشا ازاماتتارعا ءبىلىم بەرۋدى جۇيەلەۋدى ۇسىندى.
«مەملەكەتتىك ساتىپ الۋ – كۇردەلى سالا, ماسەلە كوپ. سوندىقتان شەشىمدەردى بايقاپ قابىلداۋىمىز كەرەك. دەپۋتاتتار ءتيىستى نورمالاردى دايىنداپ, ۇكىمەت قورىتىندىسىنا جىبەردىك. ولار بويىنشا وڭ ناتيجە الامىز دەپ ۇمىتتەنەمىن. ويتكەنى بۇل – ەلگە كەرەك شەشىم», دەپ تۇيىندەدى ا.ايماعامبەتوۆ.
