حالىقارالىق بالالاردى قورعاۋ كۇنى اياسىندا اتىراۋدا ەرتە ارالاسۋ ورتالىعى, تالدىقورعان مەن وسكەمەندە ەرتە ارالاسۋ ورتالىقتارى مەن اۋتيزم جانە باسقا دا مەنتالدى بۇزىلىستارى بار بالالارعا ارنالعان ورتالىقتارى ىسكە قوسىلدى. اتالمىش ءۇش ورتالىق شىمكەنت پەن پاۆلوداردا دا اشىلعان. جالپى قور قولداۋىمەن بۇگىندە 8 رەابيليتاتسيالىق ورتالىق قۇرىلىپ, جۇمىسىن ىستەپ جاتىر.
ەرتە ارالاسۋ ورتالىقتارى مەديتسينالىق, الەۋمەتتىك جانە پەداگوگيكالىق سىندى ءۇش باعىتتا جۇمىس ىستەيدى. ءار ورتالىقتا جىل سايىن 3 ايدان 3 جاسقا دەيىنگى نەيرو-ورتوپەديالىق بۇزىلۋلارى بار جانە ولاردىڭ تۋىنداۋ قاۋپى بار 600 بالا كەشەندى وڭالتۋ كومەگىن الادى.
ورتالىقتىڭ جۇمىس مودەلى بويىنشا ءار بالاعا جەكە وڭالتۋ جوسپارى قۇرىلادى. ونى جۇزەگە اسىرۋعا دارىگەر-نەۆروپاتولوگتار, دارىگەر-رەابيليتولوگتار مەن پەدياترلار, ەمدىك دەنە شىنىقتىرۋ (ەدش) نۇسقاۋشىلارى, كاسىپتىك تەراپەۆتتەر, لوگوپەدتەر سياقتى مامانداردىڭ كوپسالالى توبى قاتىسادى. مەحانوتەراپيا زالى مەن ەدش, سەنسورلىق بولمە, يممەرسيوندى ۆانناسى, شۋنگيت جانە تۇز بولمەلەرى جابدىقتالعان, سونداي-اق دامۋدىڭ ەرتە كەزەڭدەرىندە بۇزىلۋلاردى انىقتاۋعا جانە وڭالتۋ باعىتىن ازىرلەۋگە مۇمكىندىك بەرەتىن ەستۋ مەن ميدى زەرتتەۋگە ارنالعان دياگنوستيكالىق جابدىق ورناتىلعان.
«جاس بالالاردىڭ دياگنوزى انىقتالماسا دا, دامۋىنىڭ كەشىگۋى بايقالعاندا, مۇمكىندىگىنشە دەنساۋلىقتىڭ ناشارلاۋىن بولدىرماۋ ءۇشىن ەرتەرەك العاشقى قادامداردى جاساۋ وتە ماڭىزدى. ەرتە جاستاعى مي مەن جۇيكە جۇيەسىنىڭ تاڭعاجايىپ يكەمدىلىگىنىڭ ارقاسىندا ارنايى وڭالتۋدىڭ كومەگىمەن بولاشاقتا اۋىر مۇگەدەكتىككە شالدىقپاۋعا نەمەسە ونىڭ ىقتيمالدىعىن ەداۋىر تومەندەتۋگە بولادى. سوندىقتان ەرتە ارالاسۋ ورتالىقتارى ەرتە كومەك كورسەتۋدى قولجەتىمدى ەتۋ ءۇشىن قۇرىلىپ وتىر», دەدى «قامقورلىق قورى» كورپوراتيۆتىك قورىنىڭ ديرەكتورى ارايلىم ەركىنوۆا.
اۋتيزم جانە باسقا دا مەنتالدى بۇزىلىستارى بار بالالارعا ارنالعان ورتالىقتاردا ءتۇرلى ماماندار توپتاستىرىلعان, ولار ءار بالامەن قابىلەتتەرى مەن قاجەتتىلىكتەرىن ەسكەرە وتىرىپ, ادىسكەرلەر ازىرلەگەن جەكە باعدارلاما بويىنشا جۇمىس ىستەيدى. ورتالىقتار مودەلىنىڭ تۇجىرىمداماسىن جاساۋعا قر ەڭبەك جانە حالىقتى الەۋمەتتىك قورعاۋ مينيسترلىگى ۇسىنعان ساراپشىلار قاتىسىپ, ءۇش جەتەكشى امەريكاندىق اۋتيزم ورتالىقتارىنىڭ جۇمىس تاجىريبەسى نازارعا الىندى.
ءار ورتالىقتا جىل سايىن 125 بالاعا كومەك كورسەتىلەدى.
«بيىل ءساۋىر ايىندا سەرىكتەستەرىمىزبەن بىرگە شىمكەنت پەن پاۆلوداردا ورتالىقتار اشتىق. جوسپارىمىزدا 13 ەرتە ارالاسۋ ورتالىعى جانە ءاۋتيزمى بار بالالارعا ارنالعان 8 ورتالىق اشۋ بار. بۇل رەتتە كەشەندى وڭالتۋ كومەگىن قامتۋ ءۇشىن «وڭالتۋ ورتالىقتارى» جوباسىن ىسكە قوسىپ, 6 وڭىردە 6 وڭالتۋ ورتالىعىن قۇرامىز. «اقجول-م» وڭالتۋ ورتالىعىمەن جاراقتاندىرۋ بويىنشا تاعى ءبىر جوبانى ىسكە اسىرۋدامىز. ورتالىق الماتى وبلىسىندا 1,5 جاستان 18 جاسقا دەيىنگى بالالاردى قابىلدايتىن بولادى», دەپ «قازاقستان حالقىنا» قوعامدىق قورى باسقارما توراعاسىنىڭ ورىنباسارى ءلاززات شىڭعىسباەۆا.
«قازاقستان حالقىنا» قورى جانە «Samruk-Kazyna Trust» الەۋمەتتىك جوبالاردى دامىتۋ قورى ورتالىقتاردىڭ ماتەريالدىق-تەحنيكالىق جابدىقتالۋىن قارجىلاندىردى. ەڭبەك جانە حالىقتى الەۋمەتتىك قورعاۋ مينيسترلىگى جوبانى ىسكە اسىرۋ ماسەلەلەرىندە وڭىرلىك جۇمىسپەن قامتۋ جانە الەۋمەتتىك باعدارلامالار باسقارمالارىنىڭ جۇمىسىن ۇيلەستىرەدى. اكىمدىكتەر ينفراقۇرىلىمدى ىرىكتەۋ, ورتالىقتاردى جوندەۋدى قارجىلاندىرۋ, ورتالىقتاردا جۇمىس ىستەۋ ءۇشىن كادرلاردى ىرىكتەۋ بويىنشا جۇمىس جۇرگىزۋدە.
