«انا جۇرەگى» اكتسياسىندا اۋرۋحانا ماماندارى بالالارعا كونتسەرتتىك باعدارلاما ۇيىمداستىرىپ, كوڭىلىن اۋلاسا, وزگە دارىگەرلەر انالاردى مەديتسينالىق تەكسەرۋدەن وتكىزدى. ءارى اكتسياعا وسى ەمحاناعا قارايتىن پاتسيەنتتەر عانا ەمەس, استانا قالاسى بويىنشا ەرەكشە بالانى الاقانىنا سالىپ وتىرعان انالار جيىلعان. بۇل كۇنى كەلىنشەكتەر امبۋلاتوريالىق تەكسەرۋدەن وتسە, كەيبىرى لابوروتوريالىق زەرتتەۋلەرگە باردى. اكتسياعا 2013 جىلى نەبارى 17 انا قاتىسسا, وسى جولى ءبىر كۇندە 50 انا كەلىپتى. اۋرۋحانا باسشىلىعى اكتسيا باستالعالى قولدان كەلگەنشە جاردەمدەسۋگە نيەت بىلدىرگەن قايىرىمدى جانداردىڭ كوپ بولعانىن ايتتى. دەمەۋشىلەر اركەز بالالارعا سىي-سياپاتىن اكەلىپ تۇرادى ەكەن.
– «انا جۇرەگى» اكتسياسى وسىمەن ونىنشى جىل قاتارىنان بىزدە ۇيىمداستىرىلدى. بۇگىن دە ادەتتەگىشە انالار تەكسەرۋدەن ءوتىپ جاتقاندا بالعىندار پسيحولوگ, الەۋمەتتىك قىزمەتكەرلەردىڭ باقىلاۋىندا بولدى. ءبىز مەديتسينالىق مەكەمە بولعان سوڭ, ءبىزدىڭ ەڭ باستى جۇمىسىمىز – ارينە, تۇرعىنداردىڭ دەنساۋلىعىن باقىلاۋ. وكىنىشكە قاراي, ادەتتە ەرەكشە بالانىڭ قاس-قاباعىنا قاراپ وتىرعان انالار ۇيىنەن ەركىن شىعا المايدى. ەرەكشە بالاعا ەرەكشە كۇتىم كەرەك قوي. مىنە, سوندىقتان ءبىز وسىنداي ءىس-شارانى جىلىنا ەكى مارتە ۇيىمداستىرىپ, انالاردى تەكسەرۋدەن وتكىزەمىز, – دەيدى №6 قالالىق اۋرۋحانانىڭ ديرەكتورى دينارا بايسەركينا.
اكتسياعا ءبىرىنشى رەت كەلىپ وتىرعان قالا تۇرعىنى بوتاگوز اقمانوۆا قولدان كەلسە, وسىنداي ءىس-شارالاردان قالمايتىنىن ايتتى.
– انە-مىنە دەگەنشە بالام دا 16 جاسقا كەلىپتى. دەنساۋلىعىنا قاراي ءبىرىنشى توپتا. اقىل-ەسى دامىعان. قازىر سەگىزىنشى سىنىپتا وقيدى. ەم الىپ, وڭالتۋدان ءوتىپ جاتىر. اكتسياعا ءبىزدى بۇگىن مۇگەدەكتىگى بار بالالار بىرلەستىگى شاقىردى. ءبىز, ارينە, ءبىر كۇندە تولىق تەكسەرۋدەن ءوتىپ, كەزەكسىز بارلىق ساراپتامانى قولعا العانىمىزعا قۋانىشتىمىز. رەتى كەلسە, كەلەر جولى دا كەلەرمىز. ويتكەنى ەرەكشە بالاعا قامقور انالاردىڭ ءبىرىنشى كەزەكتە ءوزى اۋىرماۋى كەرەك, – دەيدى ول.
سونىمەن اكتسياعا جيىلعان قاۋىم انا مەن بالاعا ارنالعان ءىس-شارالار جيىرەك ۇيىمداستىرىلسا, قالىس قالماۋعا تىرىساتىنىن ايتىپ تارقاستى.
