ال سول ىشكى جان دۇيەنى قازىناعا تولتىراتىن ورىن – كىتاپحانا مارتەبەسى قوعامدا ەشقاشان ءوزىنىڭ ورنىن جوعالتپاق ەمەس. ويىمىزدى تەرەڭدەي تۇسسەك بۇگىنگى دامىعان زامانداعى جاستار مەن كىتاپتى بايلانىستىراتىن التىن كوپىر – كىتاپحانا. كونە جازبالار مەن سيرەك كىتاپتاردىڭ عۇمىرى ىقىلىم زاماننان, سوناۋ باعزى داۋىرلەردەن باستالادى. سول سەكىلدى كىتاپحانانىڭ تاريحى وتە ەرتەدەن, كونە عاسىرلاردان باستاۋ الادى. كىتاپحانا – تەك كىتاپ وقيتىن مەكەن ەمەس, ونىڭ ءوزىنىڭ جاندى راحات سەزىمگە بولەيتىن ىشكى الەمى, تىلسىم قۇپياسى بار مارتەبەسى بيىك كيەلى شاڭىراق.
سولاي دەمەكشى, بيىل شىمكەنت قالالىق جاسوسپىرىمدەر كىتاپحاناسىنا 45 جىل تولىپ وتىر. كىتاپحانا 1978 جىلدىڭ تامىز ايىندا وبلىستىق مادەنيەت باسقارماسى بۇيرىعىمەن جانە مادەنيەت مينيسترلىگىنىڭ 1977 جىلدىڭ 23 جەلتوقسانداعى حاتىنىڭ نەگىزىندە اشىلعان.
جاسوسپىرىمدەر كىتاپحاناسى 14-16 جاس ارالىعىنداعى جەتكىنشەكتەرگە, جاستارعا, بۇدان بولەك پەداگوگيكا سالاسىندا قىزمەت اتقاراتىن ۇستازدار مەن تاربيەشىلەرگە, باسقا دا كوزى قاراقتى وقىرماندارعا قىزمەت كورسەتەدى. سوندىقتان ول بۇگىنگى تاڭدا مەگاپوليستەگى ەڭ ءىرى مادەني-اعارتۋ, ءبىلىم بەرۋ, اقپاراتتىق ورتالىق بولىپ سانالادى.
ال ونداعى كىتاپ قورى 174 مىڭ كىتاپتى قۇرايدى. ونىڭ قىزمەتىن جىل سايىن 24 مىڭنان استام كىتاپسۇيەر وقىرمان پايدالانادى.
«جاسوسپىرىمدەر كىتاپحاناسى – بۇل دانالىق قازىناسى. وسى مەكەمەنىڭ قىزمەتكەرلەرى جاس وقىرمانداردىڭ بىرنەشە ۇرپاعىن تاربيەلەپ ءوسىردى. جاستاردىڭ رۋحاني بايلىعىن مولايتۋ جولىندا ۇلكەن جۇمىستار اتقارىپ جاتىر. كىتاپ ءداۋىر مەن عاسىردىڭ اراسىن جالعاستىرسا, كىتاپحاناشىلار كىتاپ پەن وقىرمان اراسىن بايلانىستىرۋشى دانەكەر», دەيدى اتالعان رۋحاني ورتالىقتىڭ ماماندارى.
راس, ەلىمىزدىڭ ەرتەڭى – جاس ۇرپاق. سول وسكەلەڭ ۇرپاقتىڭ ءتۇزۋ اعاشتاي مايىسپاي ءوسۋى ءبىرىنشى كەزەكتە اتا-انانىڭ مىندەتى بولسا, ەكىنشىدەن مەكتەپ پەن وسىنداي رۋحاني ازىق بەرۋشى وردالاردىڭ جاۋاپكەرشىلىگىندەگى ءىس. سول سەبەپتى بالالار مەن جاسوسپىرىمدەر بويىندا كىتاپ وقۋعا دەگەن قۇشتارلىقتى وياتۋ ماڭىزدى مىندەت. مىنە, وسى تالاپ ۇدەسىنەن شىعۋ ماقساتىندا ءارى وسكەلەڭ ۇرپاقتىڭ رۋحاني سۋسىنداپ, ادەبي-مادەني وي ءورىسىن ەرتەدەن قالىپتاستىرۋ ءۇشىن كىتاپحانا قىزمەتكەرلەرى «اجەمنىڭ ەرتەگىسى» جوباسى اياسىندا جۇيەلى تۇردە ءارتۇرلى مازمۇنداعى ءىس-شارالار وتكىزىپ كەلەدى.
سونىمەن بىرگە كىتاپحانادا جاستاردىڭ بوس ۋاقىتىن ءتيىمدى ۇيىمداستىرۋ دا ماڭىزدى. سونداي-اق كىتاپ وقۋ ءۇردىسىن جاڭعىرتۋ بۇگىنگى تالاپتىڭ بىرىنە اينالىپ وتىر. وسى ماقساتتى جۇزەگە اسىرۋ باعىتىندا كىتاپحانا جانىندا «كەل سىرلاسايىق, قىزدار!», «جاقسى اداممەن جارتى ساعات», «اينا» سىندى مۇددەلەستەر كلۋبى جۇمىس ىستەيدى. بۇدان بولەك كىتاپحانادا 3 ۆەب سايت وقىرمان ءۇشىن قىزمەت كورسەتەدى.
شىمكەنت
