التىن مەدال الماتىداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى ەرسۇلتان پىتەبايعا بۇيىردى. ول بىلتىر ءۇندىستاندا وتكەن سايىستا قولا جۇلدە العان بولاتىن.
سونداي-اق اقتوبە قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى الىشەر ەركەباەۆ ازيا وليمپياداسىنىڭ قولا جۇلدەسىن ەكىنشى مارتە ەنشىلەدى. ۇستازى ميرات وسپانوۆتىڭ ايتۋىنشا, بۇل ءبىلىم دودالارى اراسىنداعى ەڭ قيىن وليمپيادا سانالادى.
تاعى ءبىر قولانى قىزىلوردا قالاسىنداعى س.شاۋحامانوۆ اتىنداعى №9 دارىندى بالالارعا ارنالعان وبلىستىق ء«بىلىم-يننوۆاتسيا» ليتسەي-ينتەرناتىنىڭ 11-سىنىپ وقۋشىسى ارمان باقىتوۆ ولجالادى.
سونىمەن قاتار ەكى وقۋشى قۇرمەت گراموتاسىمەن ماراپاتتالدى. ولار – پاۆلودار قالاسىنداعى دارىندى بالالارعا ارنالعان №8 ليتسەي-مەكتەبىنىڭ 11-سىنىپ وقۋشىسى داير نۇرتاەۆ جانە الماتى قالاسىنداعى №165 مامانداندىرىلعان ليتسەيدىڭ 10-سىنىپ وقۋشىسى مارعۇلان نۇرساعاتوۆ.
ەسكە سالا كەتەيىك, «Asian Physics Olympiad» وليمپياداسى 2000 جىلدان بەرى وتكىزىلىپ كەلەدى. بۇل – ازيا-تىنىق مۇحيتى ەلدەرىنىڭ وقۋشىلارى جىل سايىن قاتىساتىن بەدەلدى ءبىلىم بايگەسى. بيىلعى باسەكە موڭعوليا استاناسى ۇلانباتىر قالاسىندا ءوتتى. وعان 27 ەلدەن 200-دەن اسا وقۋشى قاتىستى.
الدا جاس فيزيكتەردى تاعى ءبىر ماڭىزدى دودا كۇتىپ تۇر. ولار 10-17 شىلدە ارالىعىندا جاپونيادا فيزيكا پانىنەن وتەتىن حالىقارالىق وليمپيادادا باق سىنايدى.
مەرەي اۋعالي,
ل.ن.گۋميلەۆ اتىنداعى ەۇۋ ستۋدەنتى
