بۇل باستاما «اتامەكەن» ۇلتتىق كاسىپكەرلەر پالاتاسى جانە «ازاماتتارعا ارنالعان ۇكىمەت» مەملەكەتتىك كورپوراتسياسى اراسىنداعى «كاسىپكەرلەرگە قىزمەت كورسەتەتىن كوپ فۋنكتسيالى ورتالىق» جوباسىن ىسكە اسىرۋ شەڭبەرىندە ءوزارا ىنتىماقتاستىق تۋرالى بىرلەسكەن مەموراندۋم ارقىلى قولعا الىندى.
«اتامەكەن» ۇكپ تورالقا توراعاسى رايىمبەك باتالوۆتىڭ ايتۋىنشا, ازىرگە بۇل ورتالىق استانادا پيلوتتىق رەجيمدە اشىلدى. ەندى بۇكىل رەسپۋبليكا بويىنشا وسىنداي ورتالىقتاردى اشۋ جوسپارلانىپ وتىر.
«سەرۆيستىك قىزمەتتەردەن بولەك زاڭدى تۇلعانى تىركەۋ, جىلجىمايتىن م ۇلىك قۇجاتتارىن زاڭداستىرۋ, قىزمەتكەرلەرگە ۋاقىتشا تۇرۋعا ليتسەنزيا الۋ, رۇقسات قۇجاتتارى جانە باسقا دا قىزمەتتەر كورسەتىلەدى. «ازاماتتارعا ارنالعان ۇكىمەت» كورپوراتسياسىمەن ءتيىستى ينتەگراتسيالىق جۇمىستار اياقتالدى. بۇل شارا ەندى قولعا الىنعان بيزنەسكە تولىق كەڭەس الۋعا جانە بيزنەستى اشۋ جانە ىلگەرىلەتۋ ماسەلەلەرىن ءبىر ورتالىقتا شەشۋگە مۇمكىندىك بەرەدى. ءبىز بۇل ماسەلەنى وتكەن جىلدىڭ سوڭىندا تالقىلاپ, قارقىندى جۇمىس ىستەي باستادىق, مىنە ناتيجەسىن كورىپ وتىرمىز. جاقىن ارادا پيلوتتىق جوبا تارالا باستايدى دەپ ۇمىتتەنەمىن», دەدى رايىمبەك باتالوۆ.
ۇلتتىق پالاتا باسشىسى كاسىپكەرلەرگە قىزمەت كورسەتەتىن كوپ فۋنكتسيالى ورتالىقتا بيزنەسكە پايدالى بولاتىن باسقا دا قىزمەتتەر ىسكە قوسىلاتىنىن قوسا ايتتى.
سونىمەن قاتار, ورتالىقتىڭ اشىلۋ سالتاناتىنا تسيفرلىق دامۋ, يننوۆاتسيالار جانە اەروعارىش ءمينيسترى باعدات مۋسين قاتىستى.
ء«وزىم كاسىپكەر بولعانمىن, سوندىقتان مەملەكەتتىك مەكەمەلەردە انىقتاما, قۇجات جيناۋعا قانشا ۋاقىت كەتەتىنىن جاقسى بىلەمىن. ەندى كاسىپكەرلەر كوپ شارۋاسىن ءبىر عانا مەكەمەدە شەشە الادى», دەدى باعدات مۋسين.
ايتا كەتۋ كەرەك, بارلىق قىزمەتتەر مەملەكەتتىك قىزمەتتەر ستاندارتتارىنا سايكەس مەرزىمدە ۇسىنىلادى. وتىنىشتەردى بارىنشا وڭ شەشۋ ءۇشىن كوپ فۋنكتسيالى ورتالىقتا سۇيەمەلدەۋ كوزدەلگەن.
وسىلايشا, جاڭا ورتالىقتا «بىر تەرەزە» قاعيداتى بويىنشا 958 قىزمەت كورسەتىلەدى, ونىڭ 860-ى مەملەكەتتىك قىزمەت, ال 98-ءى قارجى ينستيتۋتتارىنىڭ سەرۆيستىك قىزمەتى.
جوبا بيزنەس-يدەيادان باستاپ جوبانى قارجىلاندىرۋ مەن ىسكە اسىرۋعا دەيىن بيزنەستى دامىتۋدىڭ بارلىق كەزەڭىندە جۇمىس ىستەپ تۇرعان بيزنەس پەن كاسىپكەرلىك باستاماسى بار تۇرعىنداردى كەشەندى سۇيەمەلدەۋگە باعىتتالعان.
كاسىپكەرلەرگە قىزمەت كورسەتەتىن كوپ فۋنكتسيالى ورتالىق استانا قالاسى ب. مومىشۋلى ك., 2/1 مەكەنجايىندا ورنالاسقان.
