ورتالىق ستاديوندا وتكەن اۋقىمدى ءىس-شارادا تاريحي شاھاردىڭ وتكەنىنەن سىر شەرتكەن «كونە تاراز» بەينەروليگى مەن «بابالار رۋحى» قويىلىمى جينالعان جۇرتشىلىقتىڭ نازارىنا ۇسىنىلدى. كەيىننەن ورتاعا سپارتاكيادانىڭ تۋى شىعارىلدى.
سپارتاكيادانىڭ اشىلۋ سالتاناتىندا ءسوز العان مادەنيەت جانە سپورت ءمينيسترى اسحات ورالوۆ ءتورت جىلدا ءبىر وتەتىن دۋى باسىم دودانىڭ ماڭىزى زور ەكەنىن اتاپ ءوتتى.
«التىنشى رەت ۇيىمداستىرىلىپ وتىرعان دوداعا ەلىمىزدىڭ بارلىق وڭىرىنەن 1000-نان استام سپورتشى قاتىسىپ وتىر. سپارتاكيادانىڭ نەگىزگى ماقساتى – قازاقستان رەسپۋبليكاسىنىڭ جازعى سپورت تۇرلەرى بويىنشا ۇلتتىق قۇراما كوماندالارىنا ەڭ مىقتى سپورتشىلاردى جاساقتاۋ جانە حالىقارالىق رەسمي جارىستارعا, ونىڭ ىشىندە پاريجدە وتەتىن جازعى وليمپيادا ويىندارىنا ليتسەنزيالىق جارىستارعا قاتىسۋعا ۇمىتكەرلەردى انىقتاۋ.
وزدەرىڭىز بىلەسىزدەر, ەلىمىزدە جاستاردىڭ سپورتپەن جانە دەنە شىنىقتىرۋمەن اينالىسۋى ءۇشىن بارلىق جاعداي جاسالىپ, پرەزيدەنتتىڭ تىكەلەي تاپسىرمالارىمەن قولداۋ تاۋىپ وتىر. سونىڭ ناتيجەسىندە ەل سپورتشىلارى حالىقارالىق ءدۇبىرلى دودالاردا توپ جارىپ, ۇلت ابىرويىن اسقاقتاتىپ ءجۇر. ولار وسكەلەڭ ۇرپاققا ۇلگى-ونەگە بولىپ, جاستاردى جارقىن جەڭىستەرگە جەتەلەيدى. وسى مۇمكىندىكتى پايدالانا وتىرىپ, سپارتاكيادانىڭ ۇيىمداستىرىلۋىنا ەرەكشە قولداۋ بىلدىرگەن جامبىل وبلىسىنىڭ اكىمدىگىنە زور العىسىمدى بىلدىرەمىن», دەدى مينيستر ءوز سوزىندە.
كەيىننەن ول بوكستان تاشكەنت قالاسىندا وتكەن الەم چەمپيوناتىندا جەڭىسكە جەتكەن سپورتشىلاردىڭ جەكە جاتتىقتىرۋشىلارىنا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قۇرمەت گراموتاسىن تابىستادى.
بۇدان سوڭ ءسوز العان ءوڭىر باسشىسى نۇرجان نۇرجىگىتوۆ ايتۋلى دودانىڭ كيەلى تاراز توپىراعىندا وتكىزىلۋى زور مارتەبە ەكەنىن جەتكىزدى.
«سپورت – دەنساۋلىق كەپىلى, دوستىقتىڭ بەرىك تۇتقاسى. دەنى ساۋ جاستار – ەگەمەن ەلىمىزدىڭ ەرتەڭى. وڭىرىمىزدە كوپتەگەن اۋقىمدى سپورتتىق ءىس-شارالار ۇيىمداستىرىلۋدا. 4 جىلدا ءبىر وتەتىن ءداستۇرلى سپارتاكيادانىڭ باستى ماقساتى – بۇقارالىق سپورتتى دامىتۋ, سالاماتتى ءومىر سالتىن قالىپتاستىرۋ, دەنە شىنىقتىرۋ مەن سپورتتى ناسيحاتتاۋ. سپارتاكيادانىڭ اشىلۋ سالتاناتىنىڭ كيەلى جامبىل جەرىندە ءوتۋى ءبىز ءۇشىن زور ماقتانىش, مەرەيلى مارتەبە.
تاراز توپىراعى تالاي تالانتتى سپورتشىلاردىڭ باعىن اشقان كيەلى جەر ەكەنى الىمساقتان ايان. وليمپيادا ويىندارىندا اتوي سالعان سايىپقىراندارىمىزدىڭ جەڭىستى جولىن جاستارعا ىلعي دا ۇلگى ەتىپ ايتىپ جۇرەمىز», دەدى ن. نۇرجىگىتوۆ سپارتاكياداعا قاتىسۋشىلارعا ساتتىلىك تىلەپ.
بۇدان سوڭ سپارتاكيادانىڭ الاۋى جاعىلىپ, تورەشى, سپورتشى, جاتتىقتىرۋشىلاردىڭ انت بەرۋ ءراسىمى ۇيىمداستىرىلدى.
سپارتاكيادانىڭ اشىلۋ سالتاناتى ەسترادا جۇلدىزدارىنىڭ جانە جەرگىلىكتى ونەرپازداردىڭ قاتىسۋىمەن كونتسەرتتىك باعدارلاماعا جانە مەرەكەلىك وتشاشۋعا ۇلاستى.
