رەيتينگتىڭ live-نۇسقاسىندا رىباكينا ءتورتىنشى ورىننان ءۇشىنشى ورىنعا كوتەرىلدى. سونىمەن قاتار رانگ كەستەسىندە كوشباسشى وزگەردى. ءبىرىنشى ورىنعا بەلارۋس وكىلى ارينا سوبولەنكو شىعىپ, پولشالىق يگا شۆەنتەكتى ەكىنشى قاتارعا ىعىستىردى.
مۇنداي وزگەرىستەر ويىنشىلاردىڭ بىلتىرعى «رولان گارروس» جارىسىنىڭ رەيتينگ ۇپايلارىمەن ەسەپتەلگەن. دەگەنمەن WTA رەيتينگىسىنىڭ قورىتىندى نۇسقاسى فرانتسيا اشىق چەمپيوناتى اياقتالعاننان كەيىن جاريالانادى. سونداي-اق تەننيسشىلەردىڭ قورىتىندى ورنى ولاردىڭ تۋرنيردە كورسەتكەن ونەرىنە دە بايلانىستى بولماق.
ەلەنا رىباكينا «رولان گارروستاعى» العاشقى ماتچىندا 16 جاستاعى چەحيا وكىلى برەندا فرۋحۆيرتوۆانى 6:4, 6:2 ەسەبىمەن جەڭگەنىن ەسكە سالا كەتەيىك. قازاقستاننىڭ ءبىرىنشى راكەتكاسى ەكىنشى اينالىمدا چەح سپورتشىسى ليندا نوسكوۆامەن باق سىناسادى.
