وسىلايشا, قازاقستان مەن سينگاپۋردىڭ اۆياتسيالىق بيلىك ورگاندارى بەينەكونفەرەنتس بايلانىس بويىنشا كەلىسسوزدەر جۇرگىزدى. ءبىزدىڭ دەلەگاتسيانى قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتىنىڭ توراعاسى تالعات لاستاەۆ, سينگاپۋر دەلەگاتسياسىن ازاماتتىق اۆياتسيا باسقارماسىنىڭ باس ديرەكتورى حان كوك حۋان باسقاردى.
كەلىسسوزدەر بارىسىندا وتاندىق تاراپ تىكەلەي رەيستەر اشۋعا قىزىعۋشىلىق ءبىلدىردى. سينگاپۋرلىق اۆياكومپانيالارعا قازاقستانداعى «اشىق اسپان» رەجىمىن, ونىڭ ىشىندە اۋا بوستاندىعىنىڭ «بەسىنشى دارەجەسى» قۇقىعىن پايدالانۋ ۇسىنىلدى. سينگاپۋرلىق تاراپ «اشىق اسپان» رەجىمىن قۇپتاپ, بۇل ۇسىنىس سينگاپۋرلىق اۆياكومپانيالارمەن پىسىقتالاتىنىن حابارلادى.
تاراپتار 2023 جىلعى شىلدەدە سينگاپۋرلىق اۆياكومپانيالار مەن «سينگاپۋر – چانگي» اۋەجايىنىڭ قاتىسۋىمەن وتەتىن كەزدەسۋ شەڭبەرىندە اۋە قاتىناسىن اشۋ ماسەلەلەرىن تالقىلاۋدى جالعاستىراتىنىنا كەلىستى.
سونىمەن قاتار سينگاپۋر تاراپى سينگاپۋردىڭ ازاماتتىق اۆياتسيا اكادەمياسىندا وقۋ مۇمكىندىگىنىڭ بار ەكەنى تۋرالى حاباردار ەتتى.
سونداي-اق ءبىزدىڭ ەلدىڭ تارابى «ەير استانا» اۋەكومپانياسىنىڭ ەكى ەل اراسىنداعى ۇشۋلاردى ورىنداۋدى باستاۋ جونىندەگى جوسپارىن اتاپ ءوتتى.
