ءوزارا مۇددەلەستىك تانىتىلعان شارا

جاقىندا قازاقستاننىڭ ۇندىستانداعى ەلشىسى دۋلات قۋانىشەۆ  كەرالا شتاتىنىڭ قارجى ورتالىعى – كوچين قالاسىندا ءۇندىستاننىڭ تمد ەلدەرىمەن ساۋدا-ەكونوميكالىق قارىم-قاتىناستارىن دامىتۋ ماسەلەلەرى بويىنشا وتكەن دوڭگەلەك ۇستەلگە قاتىستى. اتالعان ءىس-شارا ءۇندىستاننىڭ ساۋدا, سىرتقى ىستەر مينيسترلىكتەرىنىڭ قولداۋىمەن ءۇندىستان ساۋدا-ونەركاسىپ پالاتاسى فەدەراتسياسى تاراپىنان ۇيىمداستىرىلدى.  ءىس-شارا بارىسىندا ءۇندى كاسىپ­­كەرلەرىنە ەكىجاقتى ىنتى­ماق­­تاستىقتىڭ جاعدايىنا قاتىس­تى ماعلۇماتتار بەرىلدى. ماسە­لەن, سوڭعى ءۇش جىلدىڭ ىشىندە قازاقستان مەن ءۇندىستان ارا­سىنداعى ساۋدا كولەمى ەكى ەسەگە ارتىپ, ونىڭ باسقا بارلىق ورتالىق ازيا ەلدەرىمەن سالىستىرعانداعى كولەمنەن دە اسىپ تۇسكەندىگى ايتىلدى. الايدا, قاتىسقان ساراپشىلاردىڭ پىكىرلەرى بويىنشا, اتالعان كورسەتكىش ەكى ەلدىڭ ەكونوميكالىق الەۋەتىنە ءساي­كەس كەلمەيدى. سونىمەن قاتار, قازاقستان مەن ءۇندىستان اراسىنداعى ساۋ­دا جانە ينۆەستيتسيالىق باي­لا­نىستاردىڭ دامۋىنا باس­تى كەدەرگى – ەكى ەل ارا­سىندا قو­لايلى تىكەلەي كولىك جول­دارىنىڭ جوق ەكەندىگى اتاپ كورسە­تىلدى. وسىعان وراي, قازاقستاندى يراننىڭ پار­سى شىعاناعىنداعى كەمەجاي­لارىمەن بايلانىستىراتىن «سولتۇستىك-وڭتۇستىك» حالىق­­ارالىق كولىك ءدالىزىنىڭ بولىگى بولاتىن تەمىرجول تارماق­تارىنىڭ ماڭىزدىلىعى تالقى­لاندى. اتالعان تەمىرجول باعى­تىن پايدالانۋ جۇك تاسىمالداۋ ۋاقىتى مەن شىعىنىن ەداۋىر قىس­قارتاتىن بولادى. قاتىسۋشىلاردىڭ نازارىنا قازاقستاننىڭ الەۋمەتتىك-ەكو­نو­ميكالىق جاعدايى, مەملەكەتتىك يندۋستريالىق-يننوۆاتسيالىق دا­مۋ باعدارلاماسىنىڭ ءبىرىنشى بەس­جىلدىقتاعى نەگىزگى ناتيجەلەرى جانە ۇكىمەتتىڭ 2015-2019 جىلدار ارالىعىنداعى جوبالارى تۋرالى اقپارات جەتكىزىلىپ, مەملەكەتىمىزدىڭ ينۆەستيتسيالىق مۇمكىنشىلىكتەرى جايلى بەينەماتەريال ۇسىنىلدى. قازاقستاننىڭ ينۆەستيتسيالىق احۋالىن جاقسارتۋعا, ەكونو­مي­كانىڭ ماڭىزدى سەكتورلارىنداعى ينۆەس­­تورلاردىڭ قىزمەتىن ىنتا­لان­­دىرۋعا باعىتتالعان زاڭداعى وزگە­رىس­تەر اسا قىزىعۋشىلىق تۋ­عىزدى. ءۇندىستان كاسىپكەرلەرى استا­نادا وتەتىن ەكسپو-2017 شەڭ­بەرىندەگى جوبالاردى ىسكە اسىرۋعا بەلسەندى قاتىسۋعا شاقىرىلدى, دەپ حابارلادى قر ءسىم-ءىنىڭ باس­پاسوز قىزمەتى.