ءاۋ باستا ىرگەتاسىن سان ۇلتتىڭ وكىلدەرى بىلەك پەن تىلەك بىرىكتىرە قالاعان اقتاۋ – دوستىقتىڭ قالاسى. ماڭعىستاۋ وبلىسىنداعى وزگە ۇلت وكىلدەرى نەگىزىنەن وسى قالاعا شوعىرلانعان, ال اۋداندار مەن جاڭاوزەن قالاسىندا تۇراتىندار – ەل مەن جەر يەسى – قازاقتار. دوستىق تەڭىزى اتالاتىن كاسپي جاعاسىنداعى سۇلۋ قالادا تاتۋ-ءتاتتى تىرلىك كەشىپ جاتقان بىرنەشە ۇلت ۇرپاقتارى ماڭعىستاۋ وبلىسى قازاقستان حالقى اسسامبلەياسىنىڭ 18-ءشى سەسسياسىندا باسقوسىپ, كەلەلى ىستەردى تالقىعا سالدى.
مەملەكەت باسشىسىنىڭ
قازاقستان حالقى اسسامبلەياسىنىڭ وكىلدىگىنە بەرگەن تاپسىرمالارىنىڭ جۇزەگە اسىرىلۋ جايى مەن كەلەسى وبلىستىق 19-شى سەسسيانىڭ جوسپارلارى تالقىلانعان جيىنعا وڭىردەگى 20 ۇلتتىق مادەني ورتالىقتىڭ وكىلدەرى, قر پارلامەنتى سەناتىنىڭ دەپۋتاتى م. بورتنيك, اۋدان-قالا اكىمدەرى, مەملەكەتتىك مەكەمەلەر باسشىلارى مەن ۇكىمەتتىك ەمەس ۇيىمداردىڭ وكىلدەرى قاتىستى. ايماق باسشىسى, ماڭعىستاۋ وبلىسى قازاقستان حالقى اسسامبلەياسى توراعاسى ا.ايدارباەۆ حالىقتار دوستىعىن نىعايتۋ باعىتىندا وڭىردە 2013 جىلى جاسالعان جۇمىستار مەن بيىلعا مەجەلەنگەن مىندەتتەرگە توقتالدى.
مەملەكەت باسشىسى, قازاقستان حالقى اسسامبلەياسىنىڭ توراعاسى ن.نازارباەۆ قازاقستان حالقى اسسامبلەياسىنىڭ XXI سەسسياسىندا ماڭعىستاۋ وبلىسىندا دوستىق ءۇيىن سالۋ تۋرالى ايتقان بولاتىن. قازىرگى تاڭدا جەر تەلىمى ءبولىنىپ, جوبالىق-سمەتالىق قۇجاتتارى دايىندالۋ ۇستىندەگى نىساندى دوستىق ورنى بولۋمەن قاتار, قالا تۇرعىندارى مەن قوناقتارى دەمالاتىن كورىكتى ورىندارىنىڭ ءبىرى رەتىندە سالۋعا, ول ءۇشىن دوستىق ۇيىمەن بىرگە دوستىق اللەياسى, كەلىسىم الاڭى, ەتنوقالاشىق سالىنسا دەگەن ەتنومادەني بىرلەستىك مۇشەلەرىنەن ۇسىنىس تۇسكەن. ايماق باسشىسى تاراپىنان قولداۋ تاپقان ۇسىنىس ورىندالۋى ءۇشىن ءتيىستى ورىندارعا تاپسىرمالار جۇكتەلدى.
كەلەسى جىل ۇلى جەڭىستىڭ 70 جىلدىعى, قازاقستان رەسپۋبليكاسى كونستيتۋتسياسىنىڭ 20 جىلدىعى, قازاقستان حالقى اسسامبلەياسىنىڭ 20 جىلدىعى سىندى مەرەكەلەر جىلى. بىرلىگىمىزدى جاراستىرا ءجۇرىپ وسى مەرەكەلەرگە لايىقتى اتسالىسۋ, ۇلتتاردىڭ ءوزارا تاتۋلىعىن ودان ءارى ۇيىتىپ, بەلسەندى جۇمىسىن ۇيلەستىرەتىن جاستاردى دايىنداۋ قاجەتتىگى ايتىلدى. ناۋرىز ايىندا تۇساۋى كەسىلگەن «بەيبىتشىلىك پەن كەلىسىمنىڭ جول كارتاسى» مەگا-جوباسىنىڭ جاڭا كەزەڭى اياسىنداعى وڭىرلەردە ونەر, مادەنيەت پەن ءداستۇردى, پاتريوتتىق تاربيەنى جەتىلدىرۋ, سونداي-اق, «جالپىعا ورتاق ەڭبەك قوعامىن» قالىپتاستىرۋ باعىتىنداعى جاستاردى جۇمىسپەن قامتۋ ماسەلەلەرى بارلىق ۇلتتاردىڭ قاتىسۋىمەن, قولداۋىمەن جۇزەگە اساتىن بولادى.
ماڭعىستاۋ وڭىرىندە 20 ۇلتتىق مادەني ورتالىق قۇرىلعان. ولار دوستىقتى نىعايتۋعا جانە ءوز انا ءتىلى مەن تاريحىن, ءداستۇرىن ناسيحاتتاۋدا بەلسەندى جۇمىس ىستەپ كەلەدى. سەسسيادا «بۋلگار» تاتار ەتنومادەني بىرلەستىگىنىڭ مۇشەسى ن. رافيكوۆا, ت.شەۆچەنكو اتىنداعى ۋكراين ەتنومادەني بىرلەستىگى مۇشەسى ۆ.ستوروجۋك, «شالوم» ەۆرەي ەتنومادەني بىرلەستىگى مۇشەسى ز. اۆسيەۆيچ ءسوز سويلەپ, ءوز ىقىلاستارىن جەتكىزدى.
– ديپلومى بولعانمەن, ءتاجىريبەسى جوق بولعاندىقتان جاستاردىڭ جۇمىسقا ورنالاسۋى قيىن. مەن ماڭعىستاۋ ەنەرگەتيكالىق كوللەدجىنىڭ تۇلەگىمىن. 20-دان استام ۇلت وكىلدەرىنىڭ بالالارى ءبىلىم الىپ جاتقان ءبىلىم ورداسى ستۋدەنتتەردى تاجىريبەدەن وتكىزۋ ماقساتىندا 40-شاقتى مەكەمەمەن كەلىسىمشارتقا وتىرعان. مەن كوللەدجدەگى دۋالدى وقىتۋ جۇيەسى ناتيجەسىندە جۇمىسقا ورنالاستىم, دەگەن «ماەك-قازاتومونەركاسىپ» جشس قىزمەتكەرى ر.سىربۋ دۋالدى وقىتۋ جۇيەسىن قولعا الۋ, جاس مامانداردى دايىنداۋعا وڭىردەگى وندىرىستىك مەكەمەلەردىڭ ءوز ۇلەستەرىن قوسۋى, باسپانا ماسەلەسىن شەشۋ ءۇشىن ءىرى كاسىپورىنداردىڭ جۇمىسشىلارىنا ارناپ ءوز ۇيلەرىن سالۋى قاجەتتىگىن تىلگە تيەك ەتتى.
سەسسيادا ماڭعىستاۋ وبلىستىق اسسامبلەيا قۇرامىنا جاڭا مۇشەلەر سايلانىپ, ۇلتارالىق دوستىقتى ساقتاۋعا ۇلەس قوسىپ جۇرگەن بەلسەندى ازاماتتار ماراپاتتالدى.
قيىن كەزەڭدەردە ءدىنى مەن دىلىنە, ءتىلى مەن تۇرىنە قاراماي سان ۇلتتىڭ ۇرپاعىن باۋىرىنا باسقان حالقىمىز ءۇشىن باعزىدان بەرى بىرلىك – ۇستانىم, دوستىق – بەرەكە. تاۋەلسىز قازاقستانننىڭ دامۋى مەن بولاشاعى ءۇشىن ەل ىشىندەگى تىنىشتىق-تاتۋلىقتىڭ ماڭىزى قانشالىقتى ەكەندىگىن دە قازىرگى باۋىرلار ءتۇسىنىپ, بىرلىكتى ىدىراتپاۋعا ءوز ۇلەستەرىن قوسىپ كەلەدى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
سۋرەتتەردى تۇسىرگەن
سەرىك مايەمەروۆ.
