جاڭا پويىز

جولاۋشىلاردىڭ جاعدايىن ويلاعان «قازاقستان تەمىر جولى» ۇك» اق-تىڭ ەنشىلەس كاسىپورىنى – «جولاۋ­­­شىلار تاسىمالى» اق ءوزىنىڭ 2010-2020 جىلدارعا ارنالعان پويىزداردى كەزەڭ-كەزەڭمەن تولىق جاڭارتۋ باعدارلاماسىن جۇزەگە اسىرۋدى ىجدا­عات­تى­لىقپەن جالعاس­تىرىپ كەلەدى. ونىڭ ايقىن ءبىر دالەلى, وسى اپتانىڭ ەكىن­شى كۇنى جولعا تۇسكەن استانا – ماسكەۋ جاڭارعان پويىزى. سۋداي جاڭا 11 ۆاگون تىركەلگەن جولاۋشىلار قۇرامى تاڭعى ساعات 7:30-دا 48 ساعاتتىق ساپار شەگۋشىلەردى پويىزعا شاقىرىپ, 8 ساعات 10 مينۋتتا ماسكەۋدى بەتكە الىپ ءجۇرىپ كەتتى. پويىزداعى ورنىنا ەرتە باستان كەلىپ جايعاسقان جولاۋشىلاردى سوزگە تارتىپ, جاڭا ۆاگوندارداعى جاعداي مەن قولايلىلىق جونىندە سۇرادىق. ءبارى دە ءبىر اۋىزدان ريزا كوڭىلدەرىن ءبىلدىرىپ جاتىر. «ومىرلىك جولداسىم ەكەۋمىز, بۇيىرتسا بيىل 60 جاسقا تولعالى وتىرمىز. نەگىزى وتاعاسى تاشكەنتتىڭ تەمىرجول ينس­تيتۋتىن تامامداعان. سول ستۋدەنت كەزىندە ۋفا قالاسىندا ەڭبەك تاجىريبەسىنەن وتكەن. ەندى جاستىق شاعىمىزدى ەسكە الايىق جانە مىنا نەمەرەمىزگە باۋىرلاس باشقۇرتستان ەلىنىڭ استاناسىن كورسەتە كەلەيىك دەپ جولعا شىقتىق. ال جاڭارعان پويىز تۋرالى ايتارىم, بۇل بىزگە اناۋ ايتقانداي تاڭسىق بولماي تۇر. سەبەبى, كەشە عانا اتىرۋدان ەلورداعا ءدال وسىنداي سۋ جاڭا ۆاگوندا كەلدىك. تاماشا. ايتىپ تاۋىسۋعا ءسوز جەتپەيدى. شامالى دىبىس پەن كەيدە ءسال عانا شايقالعانى بولماسا, جولاۋشىعا كەرەكتىڭ ءبارى بار. بيلەتتىڭ باعاسى دا كورسەتىلىپ وتىرعان قىزمەتكە ابدەن لايىق دەۋگە اۋزىم بارادى. ايتكەنمەن, رەسەيدەن كەرى قاراي بيلەت العاندا باعا كوتەرىڭكى ەكەن. ءبىز ەلگە قاراي ماسكەۋ – تاشكەنت پويىزىنا العان ەدىك. باعاسىنىڭ جولاۋشىلارعا كورسەتىلەر قىزمەتكە قانشالىقتى لايىقتى ەكەنىن ساپاردان ورالعان سوڭ ايتارمىز», دەدى اتىراۋ ۋنيۆەرسيتەتىنىڭ ۇستازى زاۋرەش قۇرماشوۆا. جاڭارىپ, ۇزاق جولعا تۇسكەلى تۇرعان پويىزعا ءسات-ساپار تىلەۋگە سالانىڭ بىرقاتار ماماندارىن ىلەستىرگەن ەرمەك تولەگەنوۆ تە كەلىپتى. «بۇيىرتسا وسى جىلدىڭ سوڭىنا دەيىن 301 جاڭا ۆاگون الىپ, جولاۋشىلار قىزمەتىنە ۇسىنامىز. ال ءدال قازىر استانا – بۋراباي اراسىندا 3, استانا –قاراعاندى اراسىندا جاڭارعان 2 ەلەكترپويىز ءجۇر. ولاردىڭ قىزمەتى جولاۋشىلاردى تولىق قاناعاتتاندىرىپ جاتىر. وعان قوسا, وسىنداي 52 جولاۋشى ۆاگونىن الۋدى بيىلعا جوسپارلاعانبىز. بۇگىنگى تاڭدا ونىڭ 24-ءى اكەلىنىپ, جاڭارتىلار قۇرامدارعا تىركەلىپ تۇر. ەندى الداعى تامىز ايىنىڭ سوڭىنا دەيىن ماسكەۋگە قاتىنايتىن 3 جولاۋشىلار قۇرامىن تولىعىمەن جاڭارتۋ جوسپاردا بار. بۇلارمەن بىرگە, بيىل تاعى ءتورت باعىتقا جاڭارعان, جىلدامدىعى جوعارى ءتورت پويىز جىبەرەمىز دەپ وتىرمىز. ولار: الماتى – زاششيتا, الماتى – اقتوبە جانە استانا – قىزىلوردا مەن استانا – زاششيتا جىلجىمالى قۇرامدارى. مىنا جاڭا پويىزعا قايتا ورالسام, مۇندا جولاۋشىلارعا مۇمكىندىگىنشە جاعداي قاراستىرىلعان. ءار كۋپە مەن پلاتسكارد ۆاگونداردا دا اۋا باپتاعىشتار مەن تەلەۆيزورلار بار. سونداي-اق, بۇل ۆاگونداردىڭ قىزمەت كورسەتۋ مەرزىمى بۇرىن­عى­لارعا قاراعاندا الدەقايدا ۇزاق. ناقتى ايتقاندا, 40 جىل بويى ءۇزىلىسسىز قىزمەت ىستەۋىنە «تۆەر ۆاگونقۇرىلىسى زاۋىتى» ااق-تىڭ بەرگەن كەپىلدىگى بار. بۇگىندە ولاردىڭ ارنايى ماماندارى كەلىپ, جاڭا پويىزدى بىزبەن بىرگە شىعارىپ سالا تۇرىپ, ءوز جۇمىستارىنىڭ ناتيجەسىن باقىلاپ تا ءجۇر. سالادا جاسالىپ جاتقان باسقا يگىلىكتەر دە ەل نا­زارىندا. ال جاڭارىپ, الىس جولعا شىققالى وتىرعان مىنا پويىز بەن جولاۋشىلارىنا اق جول تىلەپ, «ساپار ءساتتى بولسىن دەلىك», دەدى اكتسيونەرلىك قوعام پرەزيدەنتى. راسىندا, بارلىق ۆاگوندار زاماناۋي اۋا باپتاۋ جۇيەسىمەن, «جۇگىرتپە جول» اقپاراتتىق تاقتاسىمەن, بەينەمونيتورلارمەن, بەينە-باقىلاۋ جۇيەسىمەن جابدىقتالعان, شتاب ۆاگونىندا اۆتوماتتى كوتەرۋ قۇرىلعىسى, مۇمكىندىگى شەكتەۋلى ازاماتتارعا ارنالعان ارنايى كۋپە بار ەكەن. جاڭا كورپوراتيۆتىك تالاپتارعا سايكەس ۆاگونداردى قىزمەت كورسەتۋ جابدىقتارىمەن قامتۋ جۇمىستارى اياسىندا پويىز قۇرامى جاڭا توسەك جابدىقتارىمەن, ماتراستارمەن, جاستىقتار, جامىلعىشتارمەن, ىدىس-اياقتارمەن, جولاۋشىلار ءۇشىن كورنەكى اقپاراتتارمەن قامتىلىپتى. ۆاگوندى ارالاپ كورگەندە كيىم ۇتىكتەيتىن ورىن مەن جولاۋشىلارعا جاسالعان قولايلىلىقتار كوز تارتادى. جولاۋشىلاردىڭ جانىن جادىراتىپ, كوڭىلىن گۇلدەندىرگەن پويىزدى تاماشالاي ءجۇرىپ, ونىڭ باسشىسىمەن دە تانىستىق. «جان قالاۋىمىزدى ءدوپ باسىپ, تىلەگىمىزدى ورىنداعان ۇلتتىق كومپانيانىڭ جەتەكشىلەرىنە العىسىمىز مول. پويىزىمىزدىڭ جاڭارۋىنا جاعداي جاساپ, جۇرتتىڭ قامىن ويلاعان باسشىلارعا جولاۋشىلاردىڭ دا ايتار العىسى مول بولار. سەبەبى, مەن ءوز كۋپەمدە وتىرىپ-اق بۇكىل پويىز قۇرامىن مونيتوردان باقىلايمىن. ال جولسەرىكتەر ءوز ۆاگونىن نازاردان ءبىر ساتكە دە تاسا قالدىرمايدى. ولار دا مونيتورلى باقىلاۋدىڭ يگىلىگىن تولىق پايدالانادى. ال جولاۋشىلارعا جايلى ورىن, جاڭا دا جۇمساق توسەك. زەرىكسە تەلەديدار تاماشالاپ, ىستىقتاسا اۋا باپتاعىشتى ىسكە قوسادى. جانى قالاسا, دۋشقا شومىلىپ, بوي سەرگىتۋىنە دە جاعداي جاسالعان. جاڭا پرەزيدەنتىمىز اۋا باپ­تاعىشتار جونىندە ايتىپ ءوتتى. وعان قوسارىم, ۆاگوندا اۆتوماتتى تۇردە ءبىر قالىپتى كليمات ساقتا­لىپ تۇرادى. سونداي-اق, جولسە­رىكتەر ءوزارا ەركىن بايلانىسۋىنا, سولارمەن بىرگە مەن دە قالاعان ۆاگونىمنىڭ ءنومىرىن تەرىپ, كەرەكتى تاپسىرما بەرۋىمە مۇمكىندىك تۋدىرىلعان. وسى جايلى ۆاگوندار اكەلىنگەندە استاناعا تۆەردىڭ ۆاگونشىلارى كەلىپ, بىزگە بىرقاتار دارىستەر وقىدى. بىلىكتىلىگىمىزدى ارتتىردىق. ۆاگونداعى ەلەكتروندى اقپاراتپەن جۇمىس ىستەۋدى, جولاۋشىلارعا جاڭاشا قىزمەت كورسەتۋ ۇلگىلەرىن مەڭگەردىك. ەندى ءوزىم دە, قاراماعىمداعى قۇرام قىزمەتكەرلەرى دە حالىقارالىق پويىزدا ەلىمىزدى ۇيالتپايمىز دەپ ويلايمىن. زاماناۋي ۇلگىدە جابدىقتالعان پويىزداردىڭ سانى ەلىمىزدە بۇدان دا كوبەيىپ, ەل مەرەيى تاسي بەرسىن», دەدى جاپ-جاڭا ۆاگوندار تىركەلگەن پويىزدىڭ باستىعى گۇلميرا ماردەنوۆا. استانادان ماسكەۋگە اتتانعان پويىز اپتانىڭ سوڭعى كۇنى, جەك­سەنبىدە ەلورداعا قايتا ورالادى. نۇرباي ەلمۇراتوۆ, «ەگەمەن قازاقستان».