بايقاۋدىڭ العاشقى كەزەڭىندە سەيىت كەنجەاحمەت ۇلىنىڭ وسىدان وتىز-قىرىق جىل بۇرىن «تاماشا» ويىن-ساۋىق تەاترىندا قويىلعان شىعارمالارى ساحنالاندى. وسىلايشا, كەزىندە ۋايىس سۇلتانعازين, مەيىرمان نۇرەكەەۆ, توقسىن ق ۇلىبەكوۆ, قۇدايبەرگەن سۇلتانباەۆ, تۇڭعىشباي جامانقۇلوۆ سىندى ساحنا ساڭلاقتارى سومداعان قيسىق كەيىپكەرلەر ء«مىردىڭ وعى» ارقىلى قايتا ءتىرىلىپ, قالىڭ كورەرمەنىمەن
قايىرا قاۋىشتى. بايقاۋدىڭ قورىتىندى كەزەڭىندە تەاترلاردىڭ بارىنە بىردەي ءوز قالاۋلارى بويىنشا دايىنداپ اكەلگەن قويىلىمدارىن كورسەتۋگە مۇمكىندىك بەرىلدى.
ۇيىمداستىرۋشىلاردىڭ ايتۋىنا قاراعاندا, اتالعان بايقاۋدىڭ, اسىرەسە, رەسپۋبليكالىق دەڭگەيدەگى ساحنالارعا شىعۋعا مۇمكىندىگى از, كوبىنە-كوپ اۋدان, اۋىل كولەمىندە عانا ونەر كورسەتىپ جۇرگەن كوركەمونەرپازدار وكىلدەرىنەن قۇرىلعان قاتارداعى تەاترلارعا بەرەرى مول.
بيىلعى فەستيۆالدىڭ ەڭ باستى جاڭالىعى – تۇڭعىش رەت ساتيرا ساردارى كوپەن امىربەك ۇلى اتىنداعى ارنايى سىيلىقتىڭ تاعايىندالۋى.
– وسى بايقاۋدىڭ باسىندا كوپەن اعامىز ءجۇرۋشى ەدى. ء«مىردىڭ وعى» بيىل ءبىرىنشى رەت كوپەنسىز ءوتىپ وتىر, ارينە, كوڭىل قۇلازىتادى. ول كىسىنىڭ سەيىت كەنجەاحمەت ۇلىنا دەگەن قۇرمەتى ەرەكشە ەدى. بىلتىر ناۋقاسىنا قاراماستان, قايتسەم دە بارام دەپ وسىندا كەلىپ, ۇستەلدە كوپ وتىرا الماي, ديۆانعا بارىپ جانتايىپ جاتىپ جاس تەاترلاردىڭ ونەرىن باعالاپ, اقىل-كەڭەسىن ايتىپ كەتتى. كوپەن اعانىڭ ءبىر كورىنىپ كەتكەنىنىڭ ءوزى نەگە تۇرادى؟ بىلتىر وسى بايقاۋعا كەلىپ-كەتكەننەن كەيىن, ءبىر جەتىدەن كەيىن قايتىس بولدى. مۇنىڭ ءوزى ساتيرا ساردارىنىڭ سەيىت اعاسىنا دەگەن ىقىلاس-قۇرمەتىنىڭ ەرەكشە بولعانىن كورسەتەدى, – دەيدى قازىلار القاسىنىڭ مۇشەسى, اقىن ابىلاي ماۋدانوۆ.
قازىلار القاسىنىڭ ۇيعارۋىمەن بايقاۋدىڭ باس جۇلدەسى تۇركىستان وبلىسى كەنتاۋ قالاسىنان كەلگەن «كۇلكى تەراپەياسى» ءازىل-سىقاق تەاترىنا بۇيىردى. ال جامبىل وبلىسى تۇرار رىسقۇلوۆ اۋدانىنىڭ «باسقار بيتانوۆ» حالىق تەاترى ءبىرىنشى ورىندى جەڭىپ الدى. ەكىنشى ورىندى جاڭاوزەن قالاسىنىڭ «بوستان» ءازىل-سىقاق تەاترى ەنشىلەسە, قىزىلوردا وبلىسىنىڭ شيەلى اۋدانىنان كەلگەن «جادىرا» ءازىل-سىقاق تەاترى ءۇشىنشى ورىندى قاناعات تۇتتى. پاۆلودار وبلىسى ماي اۋدانىنىڭ مەرزيحان شايحين اتىنداعى حالىق تەاترى كوپەن امىربەك اتىنداعى ارنايى سىيلىقتى يەلەندى. ال بايقاۋعا قوستاناي اۋدانىنان قاتىسقان «كۇن مەن ءتۇن» ءازىل-سىقاق تەاترى عۇمار احمەتچين اتىنداعى سىيلىقتى الدى.
قوستاناي وبلىسى
