تجم جانە قورعانىس مينيسترلىگى ماماندارىنىڭ جۇمىلا كوتەرگەن ءىس-ارەكەتىنىڭ ارقاسىندا ەلدى مەكەندەرگە تونگەن قاۋىپ جويىلدى. الايدا ورمان القابىنداعى ورتكە قارسى كۇرەس ءالى دە جالعاسىپ جاتىر. قازىر ورتكە ورانعان ورمان اۋدانى 3500 گا قۇراپ وتىر.
– بۇگىن استانادان قوسىمشا تاعى ءبىر تىكۇشاق كەلدى. ءورت اۋدانىندا سىيىمدىلىعى 3,5 توننا «بەمبي» اسپالى سۋ اعىزاتىنى بار ءۇش مي-17 كولىكتىك-جاۋىنگەرلىك تىكۇشاعى تارتىلدى. التى ەكيپاج اۋىسىممەن جۇمىس ىستەۋگە جۇمىلدىرىلدى, - دەدى سەمەي قالاسى اۆياتسيالىق ءبولىمىنىڭ كومانديرى, ءبىرىنشى سىنىپتى ۇشقىش پولكوۆنيك ازامات بازىلوۆ.
جۇمىستى ورىنداۋ بارىسىندا ارميا اۆياتسياسىنىڭ ۇشقىشتارى قىزىل جالىنعا قارسى جالپى كولەمى 200 تونناعا جۋىق سۋ شاشقان.
ينجەنەرلىك بولىمشەلەردىڭ اسكەري قىزمەتشىلەرى ارنايى تەحنيكامەن ءورت ءسوندىرۋ ماشينالارىنىڭ ءوتۋى ءۇشىن جول سالىپ, جەردى جىرتىپ, وتقا توسقاۋىل قويىپ جاتىر. ودان بولەك جەكە قۇرام قولداعى بار قۇرالداردىڭ كومەگىمەن ءورت سوندىرۋدە. قازىرگى ۋاقىتتا ولار توعىز شارشى شاقىرىمنان اسا ورمان القابىنىڭ ءورتىن اۋىزدىقتادى.
جەدەل شتابتىڭ باسشىلىعىمەن تاۋلىك بويى جۇمىس جۇرگىزىلەدى.
