جاڭا پاتەرلەر جانە بالاباقشا

جاقىندا شىمكەنت قالاسىنىڭ «ءنۇرسات» شاعىن اۋدانىندا بوي كوتەرگەن كوپقاباتتى ۇيدەن 31 ازاماتقا پاتەر كىلتى تاپسىرىلدى. «جۇمىسپەن قامتۋ-2020» باعدارلاماسى اياسىندا سالىنعان ۇيگە شالعايداعى الەۋەتى تومەن اۋىلداردان كوشىپ كەلگەن وتباسىلار مەن اتا-انا قامقورلىعىنسىز قالعان جاندار  قونىستاندى. سالتاناتتى شاراعا قاتىسقان وبلىس اكىمىنىڭ ورىنباسارى ءالي بەكتاەۆ قۋانىش يەلەرىنە پاتەر كىلتىن تابىستاپ, قۇتتىقتادى. وڭتۇستىك قازاقستان وبلىسىندا بۇگىنگە دەيىن «جۇمىسپەن قامتۋ-2020 جول كارتاسى» باعدارلاماسى شەڭبەرىندە قونىس اۋدارۋعا وڭىرلىك كوميسسيانىڭ ۇسىنىمىن العان 449 وتباسى سالىنعان 6 كوپقاباتتى ۇيگە قونىستانعان. قونىس اۋدارعانداردىڭ ىشىنەن ەڭبەككە قابىلەتتى 614 ادامنىڭ 433-ءى تۇراقتى جۇمىسپەن قامتىلىپ, 30-ى الەۋمەتتىك جۇمىس ورىندارىنا جىبەرىلسە, 12 ادام كاسىبي ءبىلىم الۋدا. «ءنۇرسات» شاعىن اۋدانى بارعان سايىن قاناتىن كەڭگە جايىپ كەلەدى. «قولجەتىمدى تۇرعىن ءۇي - 2020» مەملەكەتتىك باعدارلاماسى اياسىندا سالىنىپ جاتقان كوپقاباتتى 84 ءۇيدىڭ 47-ءسى وبلىس بيۋدجەتىنىڭ ەسەبىنەن قارجىلاندىرىلۋدا. ونىڭ 21-ءى ۇستىمىزدەگى جىلى پايدالانۋعا بەرىلمەك. بۇل ۇيلەردەگى پاتەرلەردىڭ باسىم بولىگى الەۋمەتتىك ءالسىز توپتارعا ارنالعان. شاعىن اۋدان شىعىسىنداعى ىسكەرلىك-اكىمشىلىك ورتالىعىندا دا جاڭا عيماراتتار بوي كوتەرۋدە. شىمكەنت قالاسىندا, سونداي-اق, 140 ورىن­دىق «ارۋجان» بالاباقشاسى ەل يگىلىگىنە تاپسى­رىلدى. كەزىندە جەكەمەنشىككە ءوتىپ كەتكەن بۇل عيمارات بۇگىندە مەملەكەتكە قايتا­رىلىپ, مەكتەپكە دەيىنگى مەكەمە رەتىندە قاي­تا قۇرىلدى. يگىلىكتى شاراعا ارنايى كەلگەن شىمكەنت قالاسىنىڭ اكىمى دارحان ساتىبالدى ءبۇلدىر­شىن­دەر مەن پەداگوگيكالىق ۇجىمدى بالاباق­شانىڭ اشىلۋىمەن قۇتتىقتاپ, عيماراتتى ارالاپ كوردى. باق وكىلدەرىنە سۇحبات بەرگەن قالا اكىمى د.ساتىبالدى: «وبلىس ورتالىعى شىمكەنت قالاسىندا «بالاپان» باعدارلاماسى اياسىندا بۇلدىرشىندەردى قامتۋ 2009 جىلى 28 پايىز بولسا, بيىل 70 پايىزدى قۇراپ وتىر»,  − دەدى. بۇگىندە شىمكەنت قالاسىندا 256 بالاباقشادا 41 مىڭنان استام بالا تاربيەلەنۋدە. مارحابات بايعۇت, «ەگەمەن قازاقستان».