مەملەكەتتىك ساتىپ الۋ, كەدەندىك جانە سالىقتىق اكىمشىلەندىرۋ سالاسىنداعى قولدانىستاعى زاڭنامانىڭ, سونداي-اق شاعىن جانە ورتا بيزنەستى دامىتۋدىڭ پروبلەمالىق ماسەلەلەرى تالقىلانعان باسقوسۋعا سەناتتىڭ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ دەپۋتاتتارى سەرىك شايداروۆ پەن جاننا اسانوۆا, «اتامەكەن» قر ۇكپ تورالقا توراعاسى رايىمبەك باتالوۆ, ۇلتتىق ەكونوميكا, قارجى, يندۋستريا جانە ينفراقۇرىلىمدىق دامۋ, ساۋدا جانە ينتەگراتسيا, مادەنيەت جانە سپورت مينيسترلىكتەرىنىڭ وكىلدەرى قاتىسىپ, ءسوز سويلەدى.
كەزدەسۋدى اشقان ء«وڭىر» دەپۋتاتتىق توبىنىڭ جەتەكشىسى سەرىك شايداروۆ مەملەكەت باسشىسى جىل سايىنعى جولداۋلارىندا جانە بيزنەس وكىلدەرىمەن كەزدەسۋلەرىندە شاعىن جانە ورتا بيزنەستى دامىتۋ مىندەتتەرىنە ەرەكشە باسىمدىق بەرەتىنىن اتاپ ءوتتى.
– پارلامەنتتىڭ ءبىرىنشى سەسسياسىنىڭ اشىلۋىندا مەملەكەت باسشىسى الداعى ۋاقىتتا ورتا بيزنەستىڭ باسەكەگە قابىلەتتىلىگىن ارتتىرۋ مىندەتىن قويدى. ءبىزدىڭ پالاتا وڭىرلەر تۇرعىندارىنىڭ, ونىڭ ىشىندە شاعىن جانە ورتا بيزنەس وكىلدەرىنىڭ مۇددەسىن بىلدىرەدى جانە سالالىق مەملەكەتتىك ورگاندارمەن بىرلەسە وتىرىپ وسى سالاداعى زاڭنامانى جەتىلدىرۋ بويىنشا جۇمىس ىستەپ كەلەدى. ءبىز مەملەكەتتىك ساتىپ الۋ سالاسىن قوسا العاندا, شاعىن جانە ورتا كاسىپكەرلىككە قاتىستى رەتتەۋ راسىمدەرىن وڭايلاتۋ, سالىقتىق ىنتالاندىرۋ, ينۆەستيتسيالىق بەلسەندىلىكتى ارتتىرۋ, اكىمشىلىك جۇكتەمەنى ازايتۋ جونىندەگى شارالار ۇسىندىق, – دەدى سەناتور.
شاعىن جانە ورتا بيزنەس – ەكونوميكانىڭ ەڭ ماڭىزدى سالاسى, ونىڭ ىرگەتاسى. كاسىپكەرلىك دامىماي, مەملەكەتتىڭ ەكونوميكالىق جاعدايىنىڭ تۇراقتىلىعى تۋرالى ايتۋ قيىن. وسى ورايدا سەناتور سەرىك شايداروۆ بۇل كەزدەسۋ شاعىن جانە ورتا بيزنەس سۋبەكتىلەرىنىڭ قىزمەتىن جاقسارتۋ باعىتىندا قانداي شارالار قابىلدانىپ جاتقانىن, ولاردىڭ پروبلەمالارى مەن شەشىمى قانداي, بۇل باعىتتا دەپۋتاتتاردان قانداي كومەك كەرەك ەكەنىن ءبىلۋ ماقساتىندا ءوتىپ وتىرعانىن اتاپ ءوتتى.
كەزدەسۋ بارىسىندا شاعىن جانە ورتا بيزنەس قىزمەتىنىڭ وزەكتى ماسەلەلەرى, ونىڭ ىشىندە زاڭناماداعى ولقىلىقتاردى ءسوز بولىپ, سالىق سالۋ, مەملەكەتتىك ساتىپ الۋ, كەدەندىك اكىمشىلەندىرۋ جانە تۋريزم سياقتى سالالارداعى جۇيەلى پروبلەمالاردى شەشۋ جولدارى ۇسىنىلدى. سەناتور جاننا اسانوۆانىڭ ايتۋىنشا, بۇگىنگى تاڭدا ەلىمىزدە 1 ملن 900 مىڭنان اسا شاعىن جانە ورتا كاسىپكەرلىك سۋبەكتىسى جۇمىس ىستەيدى. ونىڭ ىشىندەگى جەكە كاسىپكەرلەر ۇلەسى – 66,6, شاعىن كاسىپكەرلىكتىڭ زاڭدى تۇلعالارى – 21,1, شارۋا نەمەسە فەرمەر قوجالىقتارى – 12,2, ورتا كاسىپكەرلىكتىڭ زاڭدى تۇلعالارى – 0,2 پايىز. شاعىن جانە ورتا بيزنەستى قولداۋدىڭ تولىققاندى شارالارىنىڭ كەشەنىن ىسكە قوسۋ قاجەتتىلىگى, بيزنەستىڭ ەل دامۋىنداعى ءوزىنىڭ جوعارعى ءرولىن تولىعىمەن سەزىنۋى كەرەك ەكەنى جايىندا ءسوز قوزعاعان ول كەيىنگى ءۇش جىل ىشىندە سەنات دەپۋتاتتارى كاسىپكەرلىككە قاتىستى باعىتتار بويىنشا بىرقاتار زاڭدى قابىلداعانىن ايتتى.
– مەملەكەتتىك ساتىپ الۋلار, بيرجالىق ساۋدا, كەدەندىك اكىمشىلىك, تولەم سەرۆيستەرى بويىنشا زاڭدارعا وزگەرىستەر ەنگىزىلدى. بيزنەس-كليماتتى جاقسارتۋ ماسەلەلەرى بويىنشا زاڭنامالىق اكتىلەرگە وزگەرىستەر مەن تولىقتىرۋلار, سونداي-اق كاسىپكەرلىك كودەكس پەن كونتسەسسيالار تۋرالى زاڭعا وزگەرىستەر ەندى, – دەدى ول.
جاننا اسانوۆا وسى ءىس-شاراعا دايىندىق بارىسىندا «اتامەكەن» ۇلتتىق كاسىپكەرلىك پالاتاسىمەن بىرىگىپ ايماقتارعا قاتىسى بار ءارتۇرلى 120 جۇيەلى پروبلەما جيناقتالعانىن, ولاردىڭ بىرقاتارى پانەلدىك سەكتسيالاردا تالقىلانۋ ءۇشىن باعدارلاماعا قوسىلعانىن ايتتى. «بۇل باعىتتاعى جۇمىستار توقتاماۋعا ءتيىس. ويتكەنى ەل ىشىندە جانە عالامدىق دەڭگەيدە قوعامدىق-ساياسي, ەكونوميكالىق جاعدايلار جەدەل وزگەرىسكە ءتۇسىپ جاتقان زاماندا زاڭنامانى جەتىلدىرىپ وتىرۋ – قالىپتى قۇبىلىس. ء«وڭىر» دەپۋتاتتار توبى ايماقتاردى دامىتۋعا اتسالىسۋ ماقساتىندا ءوز وكىلەتتىكتەرىمىزدى ەرىكتى تۇردە جۇزەگە اسىرامىز. ءبىزدىڭ باسىم مىندەتىمىز – زاڭنامانى جەتىلدىرۋ بويىنشا ءتيىمدى ۇسىنىستار جاساۋ ءۇشىن جەرگىلىكتى احۋالعا مونيتورينگ جۇرگىزۋ جانە ۇسىنىمدار جيناۋ ارقىلى ايماقتار مەن ورتالىق مەملەكەتتىك ورگانداردىڭ ۇيلەسىمدى قارىم-قاتىناس ورناتۋىنا جاردەمدەسۋ», دەدى سەناتور.
«اتامەكەن» ۇكپ تورالقا توراعاسى رايىمبەك باتالوۆ سەناتورلار الدىندا سويلەگەن سوزىندە شاعىن جانە ورتا بيزنەستى دامىتۋداعى جاڭا تاسىلدەر تۋرالى مالىمەت بەردى. پارلامەنتشىلەر سونداي-اق جيىنعا قاتىسقان مينيسترلىكتەر وكىلدەرىنىڭ باياندامالارىن تىڭدادى. ورتالىق مەملەكەتتىك ورگانداردىڭ وكىلدەرى دەپۋتاتتارعا شاعىن جانە ورتا بيزنەس وكىلدەرىمەن ءوزارا ءىس-قيمىل سالاسىنداعى ىستەردىڭ قازىرگى جاي-كۇيى تۋرالى باياندادى.
سەناتورلار سونىمەن قاتار ء«وڭىر» دەپۋتاتتىق توبىمەن پىكىرسايىس تۇرعىسىندا 4 وتىرىس ۇيىمداستىردى. وندا دەپۋتاتتار, مەملەكەتتىك ورگانداردىڭ وكىلدەرى جانە وڭىرلەردەن كەلگەن كاسىپكەرلەر شاعىن جانە ورتا بيزنەستى دامىتۋدىڭ وزەكتى ماسەلەلەرىن تالقىلادى. وتىرىسقا قاتىسۋشىلار جينالىس قورىتىندىسى بويىنشا سالالىق مەملەكەتتىك ورگانداردىڭ اتىنا جىبەرىلەتىن ۇسىنىمداردى ازىرلەدى.
