توراعا ماۋلەن اشىمباەۆ ەل پرەزيدەنتى قاسىم-جومارت توقاەۆ بەلگىلەپ بەرگەن مىندەتتەردى جۇيەلى تۇردە ىسكە اسىرۋ جولىندا كۇش بىرىكتىرۋدىڭ ماڭىزدى ەكەنىنە نازار اۋداردى. سونداي-اق ول الداعى بىرلەسكەن جۇمىستىڭ بىرقاتار باسىم باعىتىنا توقتالىپ ءوتتى. ماۋلەن اشىمباەۆتىڭ ايتۋىنشا, قازىر جاڭا فورماتسياداعى زاڭداردى قابىلداۋ ىسىنە ءماسليحات دەپۋتاتتارىن تارتۋدىڭ ماڭىزى زور. ال سەناتورلار وڭىرلەردى دامىتۋ ماسەلەلەرىن, اتاپ ايتقاندا, جەرگىلىكتى ينفراقۇرىلىمنىڭ ەرەكشەلىكتەرى مەن جاعدايىن جان-جاقتى زەردەلەپ, قوردالانعان پروبلەمالاردى جۇيەلى تۇردە شەشۋگە ىقپال ەتۋگە ءتيىس.
سونىمەن قاتار سەنات سپيكەرى ءماسليحاتتاردىڭ جەرگىلىكتى مەملەكەتتىك باسقارۋ مەن ءوزىن ءوزى باسقارۋدى دامىتۋداعى ءرولى تۋرالى ايتتى. قولدانىستاعى زاڭناماعا ەنگىزىلگەن وزگەرىستەردىڭ ناتيجەسىندە قازىر فۋنكتسيالاردىڭ ءبىر بولىگى ورتالىقتان وڭىرلەرگە بەرىلگەنى بەلگىلى.
«دەپۋتاتتاردىڭ جەرگىلىكتى جەرلەردە رەفورمالاردىڭ ىسكە اسىرىلۋ بارىسىنا جوسپارلى تۇردە مونيتورينگ جۇرگىزۋىن قولعا الۋ ماڭىزدى. قازىرگى تاڭدا باسقارۋ جۇيەسىن ورتالىقسىزداندىرۋ ماسەلەسىنە ۇلكەن ءمان بەرىلىپ وتىر. وسى باعىتتا جۇرگىزىلگەن اكىمشىلىك رەفورمالاردىڭ ناتيجەسىندە ۇكىمەتتىڭ 500-گە جۋىق فۋنكتسياسى ورتالىق مەملەكەتتىك ورگاندارعا بەرىلدى. ەندىگى كەزەڭدە ءبىرشاما قۇزىرەتتەر جەرگىلىكتى جەرلەرگە بەرىلەدى. الداعى ايلاردا ءتيىستى زاڭداردى قابىلداۋدى جوسپارلاپ وتىرمىز. وسىعان بايلانىستى ءماسليحاتتاردىڭ ءرولىن ودان ءارى ارتتىرۋ ماسەلەسىن قاراستىرعان ءجون. اكىمشىلىك وزگەرىستەردىڭ وسىنداي جاڭا كەزەڭى جەرگىلىكتى وكىلدى ورگانداردىڭ قۇزىرەتىن كەڭەيتۋگە دە جول اشۋى قاجەت», دەدى پالاتا توراعاسى.
سونداي-اق ماۋلەن اشىمباەۆ وڭىرلەردىڭ مۇددەسىن قوعايتىن پالاتا رەتىندە سەنات ماسليحاتتارمەن ءوزارا بايلانىستى ءارى قاراي ارتتىرا تۇسەتىنىن ايتتى. وسى باعىتتا ء«وڭىر» دەپۋتاتتىق توبىنىڭ قۇرامى جاڭارتىلدى. ودان بولەك, جەرگىلىكتى وكىلدى ورگاندارمەن ءوزارا ءىس-قيمىل جاساۋ جونىندەگى كەڭەستىڭ قىزمەتى قايتا قۇرىلىپ, الداعى ماقسات-مىندەتى ناقتىلاندى. كەڭەستىڭ قۇرامى وزگەرىپ, وعان بارلىق ءماسليحات توراعالارى مۇشە بولعانىن دا اتاپ وتكەن ءجون.
«قايتا جاڭارتىلعان ماسليحاتتارمەن ءوزارا ءىس-قيمىل جونىندەگى كەڭەس الداعى ۋاقىتتا وڭىرلىك دامۋدىڭ جانە وسى سالاداعى زاڭنامانى جەتىلدىرۋدىڭ وزەكتى ماسەلەلەرىن تالقىلايتىن ماڭىزدى الاڭعا اينالۋعا ءتيىس. وسى رەتتە حالىقپەن ءتيىمدى كەرى بايلانىستى قامتاماسىز ەتۋگە ەرەكشە نازار اۋدارۋ كەرەك. سەنات جەرگىلىكتى وكىلدى ورگانداردىڭ ۇسىنىستارىن قاراۋعا جانە ولاردى ىسكە اسىرۋعا ىقپال ەتۋگە دايىن. سونداي-اق قابىلدانعان زاڭدار مەن باعدارلامالاردىڭ ءمانىن ازاماتتارعا ءتۇسىندىرىپ, جەتكىزۋدىڭ دە ماڭىزى زور. بۇل دا كەڭەستىڭ ستراتەگيالىق مىندەتتەرىنىڭ ءبىرى بولۋى قاجەت. وسىلايشا, ءبارىمىز بىرلەسىپ, مەملەكەت باسشىسى بەلگىلەپ بەرگەن وڭىرلەردى جان-جاقتى دامىتۋ جونىندەگى مىندەتتەردى تابىستى ىسكە اسىرامىز دەپ سەنەمىن», دەدى ماۋلەن اشىمباەۆ.
وتىرىس بارىسىندا قاتىسۋشىلار ماسليحاتتارعا ادىستەمەلىك كومەك كورسەتۋ, وسى باعىتتا جەرگىلىكتى وكىلدى ورگان دەپۋتاتتارىنا ارنالعان تۇراقتى سەمينارلار مەن ترەنينگتەر ۇيىمداستىرۋ جانە تاجىريبە الماسۋ ماسەلەلەرىن دە قارادى. سونداي-اق ءماسليحات توراعالارى پالاتانىڭ تۇراقتى كوميتەتتەرىنىڭ مۇشەلەرىمەن كەزدەسىپ, وڭىرلەردەگى ءتۇرلى ماڭىزدى ماسەلەلەردى تالقىلادى.
