ساياسات نۇربەكتىڭ ايتۋىنشا, قازىر عىلىمي كادرلاردىڭ سانى 22 456 ادامدى قۇرايدى. عىلىمي زەرتتەۋشىلەردىڭ 37%-ى عىلىمي جانە اكادەميالىق دارەجەگە يە.
«بۇل كورسەتكىش جوعارى ەمەس. عىلىمداعى جاستارعا كەلسەك, جاعداي جامان ەمەس. 35 جاسقا دەيىن جاس عالىمداردىڭ ۇلەسى – 34%-دى, نەگىزگى توپ – 43%-دى (35-54 جاس ارالىعىنداعى عالىمدار), 55 جاستان جوعارى عالىمدار – 23%-دى قۇرايدى. وسى تۇستا عىلىمي زەرتتەۋ ينستيتۋتتارىنىڭ باسشىلىعى جايلى ءسوز قوزعاعىم كەلىپ وتىر. عىلىمي ينستيتۋت باسشىلارى قارتايىپ بارادى. عىلىمي زەرتتەۋ ينستيتۋتتارى باسشىلارىنىڭ ورتاشا جاسى – 59 جاس. قازىر اكادەميكتەردىڭ ورتاشا جاسى – 69 جاس», دەدى عىلىم جانە جوعارى ءبىلىم ءمينيسترى.
ۆەدومستۆو باسشىسىنىڭ ايتۋىنشا, قازاقستاندا 414 عىلىمي ۇيىم بار. ولار – گرانتتىق جوبالار مەن عىلىمي زەرتتەۋ جۇمىستارىن اتقارىپ جاتقان عىلىمي ۇيىمدار. مەملەكەتتىك سەكتوردىڭ, ياعني مينيسترلىككە باعىناتىن ۇيىمداردىڭ سانى 26%-دى قۇرايدى. 2015 جىلى «كوممەرتسيالاندىرۋ تۋرالى» زاڭدى قابىلداعاننان كەيىن ءوسىم 43% بولدى, ياعني ولار كاسىپكەرلىك-جەكەمەنشىك سەكتور ۇيىمدارى.
«قازىر بيزنەس اقىرىنداپ عىلىمي زەرتتەۋگە بەت بۇرا باستادى. عىلىمي زەرتتەۋ ينستيتۋتتارىنا توقتالايىن. قازىر جالپى مەملەكەتتىك ورگانداردىڭ, ۆەدومستۆوارالىق باعىنىشتى ۇيىمداردىڭ سانى – 104. ونىڭ ىشىندە ناقتى 92 عىلىمي جانە ىرگەلى عىلىم ينستيتۋتى بار», دەدى ساياسات نۇربەك.
ءمينيستردىڭ مالىمەتىنە سۇيەنسەك ەڭ جوعارى پايىز اۋىل شارۋاشىلىعى مينيسترلىگىنە تيەسىلى – 33%, ياعني 30 عىلىمي زەرتتەۋ ينستيتۋتى.
«ەڭ كوپ قارجىلاندىرۋدى اۋىل شارۋاشىلىعى مينيسترلىگىنىڭ عىلىمي زەرتتەۋ ينستيتۋتتارى الىپ وتىر. بيىل ولارعا 19 ميللياردقا جۋىق تەڭگە, ال دەنساۋلىق ساقتاۋ مينيسترلىگىنىڭ ينستيتۋتتارىنا 35 ميليلاردقا جۋىق تەڭگە قاراستىرىلعان», دەپ تۇيىندەدى عىلىم جانە جوعارى ءبىلىم ءمينيسترى.
