كوللاجدى جاساعان قونىسباي شەجىمباي, «EQ»
– باقىتجامال قايىربەكقىزى, تۇعىرى بيىك, ەكونوميكاسى قۋاتتى ەلىمىزدە ۇلتىمىزدىڭ تاريحى مەن جەتىستىكتەرىن كەڭىنەن ناسيحاتتاپ جۇرگەن كىتاپحانانىڭ قالىپتاسۋ كەزەڭىنە توقتالساڭىز...
– بۇگىنگى تاڭدا ۇلتتىق كىتاپحانا 7 ملن بىرلىكتەن استام باي كىتاپ قورى جانە 50 مىڭعا جۋىق وقىرمانى بار, ەلىمىزدە جەتەكشى عىلىمي-ادىستەمەلىك ورتالىققا اينالىپ وتىر. ۇلتتىق كىتاپحانادا جيناقتالعان, ءبىلىمنىڭ بارلىق سالاسىن قامتيتىن زاماناۋي قۇجاتتار مەن قازاقستاندىق گازەت-جۋرنالداردىڭ, قولجازبالىق قۇجاتتار مەن العاشقى باسپا ونىمدەرىنىڭ, نوتالى-مۋزىكالىق باسىلىمدار مەن كۇيتاباقتاردىڭ بىرەگەي قورى, شىن مانىندە, حالقىمىزدىڭ باعا جەتپەس مۇراسى. سونىمەن قاتار بىزدە عىلىمنىڭ بارلىق سالاسى بويىنشا قورعالعان قازاقستان مەن تمد ەلدەرى عالىمدارىنىڭ كانديداتتىق ءارى دوكتورلىق ديسسەرتاتسيالارىنىڭ عىلىمي قورى, اۆتورەفەراتتارى ساقتالعان.
وقىرماندار سانى كۇننەن-كۇنگە ارتىپ, ولاردىڭ اقپاراتقا ەركىن جانە شەكتەۋسىز قولجەتىمدىلىگىن قامتاماسىز ەتۋ ماقساتىندا كىتاپحانا قورى وقىرماننىڭ تالعامىنا ساي وتاندىق جانە شەتەلدىك وزەكتى تاريحي, عىلىمي, عىلىمي-كوپشىلىك ادەبيەتتەرمەن, سونداي-اق مادەني, عىلىمي جانە كوركەم قۇندىلىعى جوعارى باسىلىمدارمەن, باسقا دا اقپاراتتىق رەسۋرستارمەن تولىقتىرىلادى. كىتاپ قورىن جەتىلدىرۋدىڭ نەگىزگى كوزى باسىلىمداردىڭ مىندەتتى تەگىن دانالارى ۇلتتىق رەپەرتۋاردى بارىنشا قامتاماسىز ەتىپ كەلەدى. كىتاپ قورى مەملەكەتتىك باعدارلامالار, ساتىپ الۋ, سىيعا تارتۋ, حالىقارالىق كىتاپ الماسۋ جانە باسقا دا جوبالار ارقىلى قامتىلادى.
كىتاپحانا «مادەني مۇرا» مەملەكەتتىك باعدارلاماسى اياسىندا جارىق كورگەن باسىلىمداردىڭ دەپوزيتاريى. «بابالار ءسوزى», «قازاق حالقىنىڭ فيلوسوفيالىق مۇراسى», «الەمدىك فيلوسوفيالىق مۇرا», «الەم ادەبيەتى كىتاپحاناسى», «الەمدىك ساياساتتانۋ انتولوگياسى», «الەمدىك الەۋمەتتانۋ انتولوگياسى», ت.ب. سەريالارمەن جارىق كورگەن باسىلىمدار بىرەگەيلىگىمەن جانە قايتالانباس تۋىندىلارىمەن ەرەكشەلەنەتىن حالقىمىزدىڭ مادەني مۇراسىنىڭ اجىراماس بايلىعىنا, رۋحاني قۇندىلىقتارىنا اينالدى.
كونە قولجازبالار, العاشقى قازاق كىتاپتارىنىڭ توپتاماسى, شىعىس باسپا كىتاپتارى, ورىس, باتىسەۋروپالىق كونە باسپا كىتاپتار ساقتالعان سيرەك كەزدەسەتىن كىتاپتار مەن قولجازبالار قورى – ءبىزدىڭ ماقتانىشىمىز. سونىڭ ىشىندە زەرتتەۋشىلەر ءۇشىن عىلىمي قىزىعۋشىلىق تۋدىراتىن ءحىى-ءحىح عاسىرلارداعى تاريح, گەوگرافيا, مەديتسينا, ماتەماتيكا, فيلوسوفيا جانە لينگۆيستيكا تۋرالى شىعىس قولجازبالارىنىڭ باي قورى اسا قۇندى.
– ءوزىنىڭ قۇندىلىعىمەن ەرەكشەلەنەتىن قولجازبالاردى اتاپ وتسەڭىز؟
– سيرەك قوردا ساقتالعان مۇرانىڭ ىشىندە ەڭ كونەسى – كۋفا جازۋى نۇسقاسىنداعى XII عاسىردىڭ قۇرانى جانە XVIII عاسىردا ناسيح ۇلگىسىندەگى ەڭ ۇلكەن قۇران. سونداي-اق پارسى اقىنى ءفيردوۋسيدىڭ كونە ادەبي تىلدەگى «شاحنامە» (XVIII ع.), 2003 جىلى يۋنەسكو-نىڭ «الەم جادى» باعدارلاماسىنىڭ حالىقارالىق تىزىلىمىنە ەنگىزىلگەن قوجا احمەت ءياساۋيدىڭ «ديۋاني حيكمەتتەر» (XIX ع.), «ريسالا: ميراتۋل-قۋلۋب» (XVIII ع.), «ناسابناما», ياعني قوجا احمەت ءياساۋيدىڭ اتا-تەگى تۋرالى شەجىرە (XVII ع.) جانە سۇلەيمەن باقىرعانيدىڭ «حيكمەتتەر» (XVI ع.) قولجازبا كىتاپتارى – باعا جەتپەس جازبا ەسكەرتكىشتەرى.
ودان كەيىن العاشقى قازاق باسپا كىتاپتارىنداعى قازاق ادەبيەتى كلاسسيكتەرىنىڭ ەڭبەكتەرى, قازاق اعارتۋشىلارىنىڭ كوزى تىرىسىندەگى باسىلىمدارى, مىسالى, ى.التىنسارين, ج.ايماۋىت ۇلى, م.جۇماباەۆ, م.دۋلات ۇلى شىعارمالارى بار. العاشقى مەرزىمدى باسىلىمداردىڭ, ونىڭ ىشىندە «تۇركىستان ۋالاياتىنىڭ گازەتى», «قازاق», «ايقاپ», «ساداق», «اباي», «شولپان», «جاس قازاق», «تاڭ», «ەڭبەكشى قازاق», «سوۆەتسكايا ستەپ» گازەتتەرى, «ادەبيەت مايدانى», «ايەل تەڭدىگى» گازەت-جۋرنالدارى ساقتالعان. قازاق قوعامي ءومىرىنىڭ شەجىرەسى بولعان بۇل باسىلىمداردىڭ حالىقتىڭ ۇلتتىق سانا-سەزىمىنىڭ ويانۋىنا شەكسىز ۇلەس قوسقانى بەلگىلى.
وكىنىشكە قاراي, ۋاقىت وتكەن سايىن جازبا ەسكەرتكىشتەرى فيزيكالىق جاعىنان ەسكىرىپ, توزادى, قور ساقتالىمىنىڭ ءتيىستى دەڭگەيدە قامتاماسىز ەتىلمەۋى سالدارىنان قۇجاتتاردىڭ ءىشىنارا نەمەسە تولىق جوعالۋ قاۋپىنە اكەلەدى. سوندىقتان جاڭا تەحنولوگيالاردىڭ دامۋى مەن جاھاندانۋ داۋىرىندە حالقىمىزدىڭ اتالعان اسىل مۇرالارىن ساقتاپ قالۋ وزەكتى ماسەلە بولىپ تۇر. وسى باعىتتا كىتاپ قورىن كەڭ اۋقىمدى ساندىق بەلگىلەۋ بويىنشا جۇمىستار كۇندەلىكتى جۇرگىزىلەدى. قۇجاتتاردى ۇزاقمەرزىمدى ساقتاۋ ماقساتىندا كىتاپحانانىڭ كونسەرۆاتسيا, قالپىنا كەلتىرۋ جانە تۇپتەۋ قىزمەتىمەن الدىن الۋ شارالارى, قۇجاتتاردى بيولوگيالىق, فيزيكا-حيميالىق تۇراقتاندىرۋ, زارارسىزدانۋ, وڭدەۋ, باسقا دا ءىس-شارالار جۇزەگە اسىرىلادى.
بۇگىنگى وقىرماندى تەك كىتاپتار عانا قىزىقتىرمايدى, وعان جاڭا مۇمكىندىكتەر قاجەت. سوندىقتان وقىرمانعا ءداستۇرلى قىزمەتپەن بىرگە, ەلەكتروندى كىتاپحانالار, كاتالوگتەر مەن دەرەكقورلار ۇسىنىلادى. بۇل تۇرعىدا ءبىزدىڭ ماماندارىمىز ەنگىزگەن Web-رابيس رەسپۋبليكالىق اۆتوماتتاندىرىلعان كىتاپحانالىق-اقپاراتتىق جۇيە پايدالانۋشىلار ءۇشىن جان-جاقتى قاراستىرىلعان.
– ەلىمىزدەگى كىتاپحانالاردىڭ عىلىمي-ادىستەمەلىك ورتالىعى رەتىندە وڭىرلىك كىتاپحانالارعا قالاي قولداۋ كورسەتەسىزدەر؟
– ءبىزدىڭ كىتاپحانا وڭىرلەردىڭ عىلىمي-ادىستەمەلىك ورتالىعى رەتىندە جۇيەلى كوپجاقتى قىزمەتتى جۇزەگە اسىرىپ, قىزمەتتىڭ بارلىق باعىتى بويىنشا ادىستەمەلىك جانە تاجىريبەلىك كومەك كورسەتەدى. ۇلتتىق كىتاپحانالىق جۇيەنىڭ قۇقىقتىق نەگىزدەرىن قالىپتاستىرۋعا, كىتاپحانا ءىسىن رەتتەيتىن نورماتيۆتىك-قۇقىقتىق اكتىلەردى, نۇسقاۋلىقتاردى, ستاندارتتاردى ازىرلەۋگە قاتىسادى. كىتاپحانا ءىسىنىڭ جاعدايىن زەرتتەپ, ساراپتاۋمەن جانە ونىڭ دامۋىن بولجاۋمەن اينالىسادى, ستراتەگيالىق باسىمدىقتارىن انىقتاپ, ءتيىمدى ادىستەمەلىك شەشىمدەردى قابىلدايدى. وسى باعىتتا رەسپۋبليكاداعى كىتاپحانا ءىسىنىڭ جاعدايى بويىنشا وڭىرلىك كىتاپحانالاردىڭ جىل سايىنعى ستاتيستيكالىق مالىمەتتەر نەگىزىندە ازىرلەنەتىن «قازاقستان كىتاپحانالارى. مالىمەتتەر. ساندار» اقپاراتتىق-ساراپتامالىق جيناعى رەسپۋبليكا كىتاپحانالارى تۋرالى نەگىزگى كورسەتكىشتەر جونىندە تولىق مالىمەتتەردى بەرەدى.
وكىنىشكە قاراي, ايماقتارداعى كىتاپحاناشىلاردىڭ كىتاپحانا ءىسىن جاڭعىرتۋدىڭ وزەكتى باعىتتارى بويىنشا بۇرىن الىنعان ءبىلىمى مەن داعدىلارىن جەتىلدىرۋگە مۇمكىندىكتەرى جوق. دەگەنمەن ۇلتتىق كىتاپحانادا رەسپۋبليكا كىتاپحاناشىلارىنىڭ كاسىبي ءبىلىم دەڭگەيلەرىن ارتتىرۋ ماقساتىندا ارنايى اشىلعان كاتالوگيزاتور جانە جازبا قۇجاتتارىن كونسەرۆاتسيالاۋ جانە قالپىنا كەلتىرۋ مەكتەپتەرى جۇمىس ىستەيدى. ولاردا وقۋ-ۇيرەتۋ جانە تاجىريبەلىك كۋرستار, سەمينارلار, كاسىبي تاعىلىمدامالار, كەڭەستەر وتكىزىلەدى. وقۋ كۋرستارىنان وتۋگە سۇرانىس كوبەيىپ, تىڭداۋشىلار سانى جىلدان-جىلعا ارتىپ كەلەدى. سونىمەن قاتار دۋالدى ءبىلىم بەرۋ جۇيەسى اياسىندا كىتاپحانالىق فاكۋلتەت ستۋدەنتتەرىنىڭ تەوريالىق جانە تاجىريبەلىك دايىندىقتارىن قاتار جۇرگىزەتىن «كىتاپحاناتانۋ جانە بيبليوگرافيا» كافەدراسى جۇمىس ىستەيدى.
2017 جىلى ۇلتتىق كىتاپحانانىڭ باستاماسىمەن رەسپۋبليكا كىتاپحانالارىنىڭ جۇمىسىن نىعايتۋ جانە ۇيلەستىرۋ ماقساتىندا قازاقستان كىتاپحانالىق وداعى قۇرىلىپ, بۇگىنگى كۇنى جەمىستى ەڭبەك ەتىپ وتىر. وداقتى قۇرۋداعى ماقسات – ەلىمىزدىڭ كىتاپحانالارىن بىرىكتىرىپ, ولاردىڭ مۇددەلەرىن بىلدىرەتىن جانە قورعايتىن, كىتاپحانانىڭ جانە كىتاپحاناشى ماماندىعىنىڭ الەۋمەتتىك مارتەبەسىن كوتەرۋگە, سونداي-اق كىتاپحانالاردىڭ مۇمكىندىكتەرىن كەڭەيتۋگە ىقپال ەتۋ. جىل سايىن وبلىستىق كىتاپحانالار باسشىلارىنىڭ قاتىسۋىمەن وداق كەڭەسىنىڭ وتىرىسى وتكىزىلىپ, وي-پىكىرلەرىمەن ءبولىسىپ, سالاداعى قوردالانعان ماسەلەلەر تالقىلانادى. قازىرگى تاڭدا وداققا 163 كىتاپحانا مۇشەلىككە تىركەلگەن. سول كەزدەن باستاپ «كىتاپ جانە كىتاپحانا. كنيگا ي بيبليوتەكا. Book & Library» كاسىبي جۋرنالى جارىققا شىعادى. جۋرنال ساراپتاۋ, كىتاپحانا سالاسىنداعى وزەكتى ماسەلەلەر مەن ايتۋلى وقيعالار, كىتاپ پەن قوعام بايلانىسى, اقپاراتتىق-كوممۋنيكاتسيالىق تەحنولوگيالار, ت.ب. ءتۇيىندى ماسەلەلەردى كوتەرەدى. سونىمەن قاتار رەسپۋبليكا كىتاپحاناشىلارىن ىنتالاندىرۋ ماقساتىندا «قازاقستاننىڭ قۇرمەتتى كىتاپحاناشىسى» توسبەلگىسى تابىستالادى.
– اڭگىمەڭىزدە اعارتۋشىلىق قىزمەتتىڭ دە جولعا قويىلعانىن ايتتىڭىز...
– ءيا, مەملەكەت باسشىسىنىڭ حالىققا ارناعان جولداۋلارى مەن باعدارلامالارىن ىسكە اسىرۋدا قازىرگى زامانعا ساي, رۋحاني جاڭعىرۋ مىندەتىن جۇزەگە اسىرۋ اياسىندا وقىرمانداردى كىتاپ وقۋعا تارتۋ, حالىقتىڭ ءتۇرلى توپتارىن الەمدىك جانە قازاقستاندىق قۇندىلىقتارعا, ىرگەلى ءبىلىم الۋعا جۇمىلدىرۋعا, كىتاپ وقۋعا تۇراقتى قىزىعۋشىلىعىن, قوعامنىڭ اقپاراتتىق مادەنيەتىن قالىپتاستىرۋعا باعىتتالعان ماقساتتى جۇمىستار قولعا الىنعان. عىلىمي جانە شىعارماشىلىق زيالى قاۋىم, اقىن-جازۋشىلار, قوعام جانە مەملەكەت قايراتكەرلەرىنىڭ قاتىسۋىمەن كىتاپ كورمەلەرى, تۇساۋكەسەرلەر, شىعارماشىلىق كەشتەر مەن كەزدەسۋلەر, دوڭگەلەك ۇستەل جانە ءتۇرلى مادەني-كوپشىلىك ءىس-شارا ۇيىمداستىرىلادى. ماسەلەن, 2020 جىلى ۇلتىمىزدىڭ ۇلى تۇلعالارى ءابۋ ناسىر ءال-فارابي مەن اباي قۇنانباەۆتىڭ مەرەيتويلارىنا ارنالعان رۋحاني جانە شىعارماشىلىق مۇراسىن كەڭىنەن ناسيحاتتاۋ ماقساتىندا اباي جانە ءال-فارابي عىلىمي ورتالىعى اشىلدى. بۇل ورتالىقتار ولاردىڭ ەڭبەكتەرىن, ادەبي مۇراسىن تەرەڭ زەردەلەۋگە جانە كوپشىلىك ءىس-شارالاردى وتكىزۋگە مۇمكىندىك بەرەدى. وتكەن جىلى ۇلتتىق «وقيتىن ۇلت» جوباسى اياسىندا مۇحتار اۋەزوۆتىڭ تۋعانىنا 125 جىل تولۋىنا وراي «مۇحتار اۋەزوۆتى وقيمىز» حالىقارالىق بايقاۋ-اكتسياسى ۇيىمداستىرىلىپ, وعان تمد ەلدەرىنەن جانە ءوز ەلىمىزدىڭ كىتاپحاناشىلارى قاتىستى.
بيىل تۇركى مەملەكەتتەرى ۇيىمى جاريالانعان تۇركى وركەنيەتىنىڭ دامۋ جىلى جانە تۇركسوي-دىڭ 30 جىلدىعى اياسىندا كورنەكتى جازۋشى كەمەل توقاەۆتىڭ 100 جىلدىق مەرەيتويىنا وراي كىتاپ كورمەسى جانە دوڭگەلەك ۇستەل بىشكەك قالاسىندا ۇيىمداستىرىلدى. ءساۋىر ايىندا ءا.ناۋاي اتىنداعى وزبەكستان ۇلتتىق كىتاپحاناسىندا وسىنداي ءىس-شارا وتپەكشى.
ەل پرەزيدەنتى قاسىم-جومارت توقاەۆتىڭ كىتاپ وقۋدىڭ جوعارى مادەنيەتىن قالىپتاستىرۋ, بالالار مەن جاسوسپىرىمدەردىڭ كىتاپ وقۋعا قىزىعۋشىلىعىن ارتتىرۋ قاجەتتىلىگى, جاستاردىڭ كىتاپ وقۋ ساۋاتتىلىعىن دامىتۋ تۋرالى بىرقاتار تاپسىرماسىنا سايكەس 2021 جىلى جاريالانعان «بالالار مەن جاسوسپىرىمدەردىڭ كىتاپ وقۋىن قولداۋ جىلى» جانە بىلتىر جاريالانعان «بالالار جىلى» اياسىندا بالالار مەن وسكەلەڭ ۇرپاقتى كىتاپ وقۋعا تارتۋ, كىتاپ وقۋ مادەنيەتىن كوتەرۋگە جانە كىتاپ وقۋعا قىزىعۋشىلىعىن ارتتىرۋعا باعىتتالعان ءىس-شارالار كەڭىنەن ۇيىمداستىرىلدى. جىل سايىن, ءداستۇر بويىنشا 23 ءساۋىر – بۇكىلالەمدىك كىتاپ جانە اۆتورلىق قۇقىق كۇنىنە وراي «كىتاپ شوۋ» اتتى اۋقىمدى كىتاپ مەرەكەسى وتكىزىلەدى. 15 قازان – الماتى قالاسى كىتاپحانالارى كۇنىنە وراي «مەن تاڭداعان ماماندىق!» اتتى مەرەكەلىك كونتسەرت ۇيىمداستىرىلىپ, جوعارى جانە ورتا ارناۋلى وقۋ ورىندارى ستۋدەنتتەرىنىڭ قاتىسۋىمەن اشىق ەسىك كۇنى وتەدى. ءىس-شارانى وتكىزۋدەگى ماقسات – كىتاپحاناشى ماماندىعىنىڭ بەدەلىن ارتتىرۋ, ونى دارىپتەۋ, كىتاپحانالارداعى كاسىبي كادرلاردىڭ تاپشىلىعىن جويۋعا جاردەمدەسۋ, بولاشاقتا ولارعا دەگەن سەنىمدىلىكتى ارتتىرۋ.
سوڭعى ەكى جىلدا مەملەكەت باسشىسىنىڭ قولداۋىمەن كىتاپحانا سالاسىنا, كىتاپحاناشىلاردىڭ الەۋمەتتىك جاعدايىنا باسا نازار اۋدارىلىپ, سالا قىزمەتكەرلەرىنىڭ جالاقىسى ءوستى جانە دە 2025 جىلعا دەيىن جىل سايىن 20%-عا كوتەرىلەتىن بولادى. وتكەن جىلى 24 قازان كىتاپحاناشى كۇنى بولىپ رەسمي بەكىتىلدى. بۇل – ءبىز ءۇشىن ۇلكەن جەتىستىك. وسى كۇندى اتاپ ءوتۋ – كىتاپحاناشى ماماندىعىنىڭ مارتەبەسىن كوتەرىپ قانا قويماي, وسى ماماندىققا دەگەن ماقتانىش سەزىمىن قالىپتاستىرىپ, كىتاپحاناشىنىڭ قاراپايىم ەڭبەگىن, كىتاپحانانىڭ قوعام دامۋىندا الاتىن الەۋمەتتىك ماڭىزدى ءرولى ايرىقشا ەكەندىگىن كورسەتەدى.
ەلىمىزدە تۇراتىن ەتنوستاردى كىتاپ قورىمەن قامتۋ, عىلىم مەن مادەنيەتتىڭ دامۋى ارقاسىندا اقپاراتپەن قامتاماسىز ەتۋ, بولاشاق ۇرپاق ءۇشىن رۋحاني قۇندىلىقتارىمىزدى ساقتاۋ بيبليوگرافياسىز مۇمكىن ەمەس. بۇل باعىتتا كىتاپحانا حالقىمىزدىڭ تاريحي جادىنىڭ كۋاسى رەتىندە ەلىمىزدىڭ تاريحى, مادەنيەتى جانە ونەرى جونىندەگى ىرگەلى بيبليوگرافيانى قالىپتاستىرادى دەپ ايتۋعا بولادى. تاۋەلسىزدىكتىڭ العاشقى جىلدارىندا قازاق زيالىلارىنىڭ الدىڭعى قاتارلى وكىلدەرى مەن تاريحي قايراتكەرلەرىنىڭ ەسىمدەرىن ناسيحاتتاۋ ماقساتىندا «قايتا ورالعان قالامگەرلەر», «قازاق ادەبيەتىنىڭ كلاسسيكتەرى», «قايتا ورالعان ەسىمدەر» سەريالى بيبليوگرافيالىق كورسەتكىشتەرى جارىق كوردى. «الاش قوزعالىسى: تاريح جانە قازىرگى زامان», «قازاقستان تاريحى (كونە داۋىردەن XX عاسىردىڭ باس كەزىنە دەيىن)», «قازاق مەملەكەتتىلىگىنىڭ دامۋى (ەجەلگى داۋىردەن بۇگىنگى كۇنگە دەيىن)», «ەگەمەن قازاقستاننىڭ فيلوسوفيالىق عىلىمدارى», «قازاقستانىڭ ارحەولوگياسى مەن ەتنولوگياسى», «قازاقستان ەتنوستارى», «قازاقستاننىڭ كوركەم ادەبيەتى», «قازاق ديپلوماتياسى», «دالا فولكلورىنىڭ انتالوگياسى», ت.ب. كورسەتكىشتەر قۇراستىرىلدى. «قازاقستان ونەرى» بيوبيبليوگرافيالىق سەرياسى اياسىندا ءتول مادەنيەتىمىزدىڭ دامۋىنا زور ۇلەس قوسقان ونەر قايراتكەرلەرىنە ارنالعان ۇسىنىستىق كورسەتكىشتەر جارىق كوردى. سوڭعى جىلدارى تاۋەلسىزدىكتىڭ 30 جىلدىعىنا وراي «تۇعىرى بيىك تاۋەلسىزدىك», «تاۋەلسىزدىك جىلدارىنداعى بالالار ادەبيەتى», «قاسىرەتتى جىلدار (كامپەسكە. حالىق كوتەرىلىسى. اشارشىلىق. قۋعىن-سۇرگىن)», سونداي-اق قازاق حالقىنىڭ ۇلى تۇلعالارىنىڭ مەرەيتويلارى اياسىندا «جامبىل جاباەۆ», «احمەت بايتۇرسىن ۇلى», «مۇحتار اۋەزوۆ», «سالىق زيمانوۆ», «روزا باعلانوۆا», «مۇقاعالي ماقاتاەۆ», ت.ب. كورسەتكىشتەر مەن جىل سايىن «قازاقستان رەسپۋبليكاسىنىڭ اتالىپ وتىلەتىن جانە ەسكە الىناتىن ايتۋلى كۇندەرى» كۇنتىزبەسى شىعارىلادى.
ۇلتتىق كىتاپحانا ەلىمىزدى حالىقارالىق كىتاپحانالىق-اقپاراتتىق كەڭىستىكتە تانىتۋدا كوپتەگەن حالىقارالىق ۇيىم مەن باعدارلاماعا, ولاردىڭ اراسىندا «ەۋرازيانىڭ التىن توپتاماسى», «مانۋسكريپتوريۋم» – قولجازبالار مەن باسقا دا سيرەك باسىلىمداردىڭ ساندىق ەۋروپالىق كىتاپحانا سياقتى حالىقارالىق جوبالارعا قاتىسۋ ءبىز ءۇشىن ەلىمىزدىڭ كىتاپ قورلارىن ناسيحاتتاۋعا جانە الەم وقىرماندارىنا ۇلتتىق جازبا مۇرامىزدى تانىستىرۋعا مۇمكىندىك بەرەتىندىگىن ءسوز ەتكىم كەلەدى. قازىرىگى تاڭدا ءوزارا كاسىبي تاجىريبە الماسىپ, تمد ەلدەرىنىڭ ۇلتتىق كىتاپحانالارىمەن ىنتىماقتاستىق قارىم-قاتىناس ورناتىلعان. كىتاپحانامىزدا تۇركيا, قىتاي, رەسەي, يران, پاكىستان, كورەيا جانە ءۇندىستاننىڭ شەتەلدىك كىتاپتار بۇرىشى اياسىندا ديپلوماتيالىق ميسسيا وكىلدەرىمەن تىعىز بايلانىستا جۇمىس جۇرگىزىلەدى.
سونىمەن قورىتىندىلاي كەلە تۇيگەنىمىز, عاسىردان اسا تاريحى بار ەلىمىزدەگى ۇلتتىق كىتاپحانانىڭ العا قويعان ماقساتى ايقىن. سوعان ساي كىتاپحانا اقپاراتتىق-كىتاپحانالىق قىزمەتتىڭ بارلىق ءتۇرىن قولدانا وتىرىپ, قوعامنىڭ رۋحاني جاڭعىرۋىنا, ساپالى ادامي كاپيتالىن ارتتىرۋعا جانە قوعام الدىنداعى وزەكتى ماسەلەلەردى شەشۋگە بارىنشا ءوز ۇلەسىن قوسىپ وتىر.
اڭگىمەلەسكەن
گۇلميرا باعىتقىزى,
«Egemen Qazaqstan»
