سۋرەتتى تۇسىرگەن ەرلان ومار, «EQ»
وقۋ-اعارتۋ ءبىرىنشى ۆيتسە-ءمينيسترى شولپان قارينوۆانىڭ ايتۋىنشا, وسى جىلى 288 مىڭنان استام تۇلەك 9-سىنىپتى ءتامامدايدى. ولار الداعى ۋاقىتتا 10-سىنىپتى جالعاستىرۋ نەمەسە كوللەدجگە ءتۇسۋ تۋرالى شەشىم قابىلدايدى. 11-سىنىپتى بارلىق مەنشىك تۇرىندەگى مەكتەپتەر بويىنشا 172 مىڭنان استام تۇلەك بىتىرەدى. ولار ەندى بولاشاق ماماندىقتارىن تاڭدايدى.
«وقۋ-اعارتۋ ءمينيسترىنىڭ بۇيرىعىنا سايكەس مەكتەپتەردە وقۋ مەرزىمى وسى جىلدىڭ 31 مامىرىندا اياقتالادى. 31 مامىردا بيىلعى وقۋ جىلىنىڭ سوڭعى ساباعى وتەدى. بۇل كۇنى بارلىق مەكتەپ بەكىتىلگەن كەستەگە سايكەس ساباقتارىن جۇرگىزەدى. ساباق سوڭىندا ءاربىر سىنىپ جەتەكشىسى سىنىپ ساعاتىن وتكىزەدى. سىنىپ ساعاتتارىنىڭ ستسەناريلەرىن مۇعالىمدەر ءار سىنىپتىڭ جاس ەرەكشەلىكتەرىن ەسكەرە وتىرىپ, ءوز بەتىنشە ازىرلەيدى. سىنىپ ساعاتىنىڭ ماقساتى – وقۋ جىلىن قورىتىندىلاۋ, 90 كۇنگە سوزىلاتىن جازعى دەمالىس كەزەڭىنە بالالاردى ازىرلەۋ», دەدى شولپان قارينوۆا ورتالىق كوممۋنيكاتسيالار قىزمەتىندە وتكەن بريفينگتە.
ءداستۇر بويىنشا مۇعالىم سىنىپ ساعاتىندا وقۋ ءۇشىن كىتاپتار ءتىزىمىن, سونداي-اق قاراۋعا بولاتىن فيلمدەر ءتىزىمىن ۇسىنادى. قاۋىپسىزدىك شارالارىن, الدىن الا جوسپارلانىپ ۇيىمداستىرىلعان دەمالىستىڭ ارتىقشىلىقتارىن, قوسىمشا ءبىلىم بەرۋ ۇيىمدارىنا قاتىسۋدىڭ تيىمدىلىگىن, ەڭبەك ەتۋدىڭ پايداسىن, اتا-اناعا, اتا-اجەلەرىنە كومەكتەسۋدىڭ قاجەتتىلىگىن ايتادى. «سىنىپ ساعاتىندا نەگىزىنەن پاتريوتيزم, وتاندى ءسۇيۋ, دوستىق, تاتۋلىق, ەل تاريحىنا, ساياسي رەپرەسسيا مەن اشتىق قۇرباندارىنىڭ ەسىمدەرىنە قۇرمەت تانىتۋ تاقىرىپتارىنا باسىمدىق بەرىلۋى كەرەك», دەدى ءبىرىنشى ۆيتسە-مينيستر.
«مەكتەپتەر سالتاناتتى شارا وتكىزۋ تۋرالى شەشىمدى دە وزدەرى دەربەس قابىلدايدى. وقۋ-اعارتۋ مينيسترلىگى سوڭعى قوڭىراۋدى وتكىزۋگە قاتىستى مەكتەپ داستۇرلەرىنىڭ بارلىعىن قولدايدى. سونىمەن قاتار مينيسترلىكتىڭ ءنورماتيۆتى قۇجاتتارىندا مۇنداي شارالار بۇرىن بولماعان جانە قازىر دە جوق ەكەنىن اتاپ وتسەم دەيمىن. مينيسترلىك سوڭعى قوڭىراۋلاردى وسى جىلدىڭ 1 ماۋسىمىندا بالالاردى قورعاۋ كۇنىنە ورايلاستىرىپ, سونىڭ فورماتىندا وتكىزۋدى ۇسىنادى», دەدى ش.قارينوۆا.
9-سىنىپ بىتىرۋشىلەر ءۇشىن قورىتىندى مەكتەپ ءبىتىرۋ ەمتيحاندارى 2 ماۋسىم مەن 13 ماۋسىم ارالىعىندا وتەدى. ال 11-سىنىپ بىتىرۋشىلەر ءۇشىن مەملەكەتتىك ەمتيحاندار 5 ماۋسىم مەن 19 ماۋسىم ارالىعىندا بولادى. «جالپى ورتا ءبىلىم بەرۋ تۋرالى اتتەستاتتى 11-سىنىپ تۇلەكتەرىنە تاپسىرۋ سالتاناتىن ءوز مەكتەپتەرىنىڭ قابىرعاسىندا 20-22 ماۋسىمدا وتكىزۋدى ۇسىنامىز», دەدى ول.
«سىنىپ ساعاتتارىن, اتتەستات تاپسىرۋ, سوڭعى قوڭىراۋ شارالارىن وتكىزگەن كەزدە پەداگوگيكالىق ەتيكانى ساقتاۋ جانە سىبايلاستىق قۇقىقبۇزۋشىلىقتىڭ الدىن الۋ ماقساتىندا اتا-انالاردان ءىس-شارانى وتكىزۋگە, انيماتورلاردى, مەرەكەلىك كەش ۇيىمداستىراتىن اگەنتتىكتەردى, جەكە ستۋديالاردى جالداۋعا, مەكتەپ اكىمشىلىگىنە, پەداگوگتەرگە سىيلىققا اقشا جيناۋعا جول بەرىلمەيدى», دەدى ش.قارينوۆا.
تەحنيكالىق جانە كاسىبي ءبىلىم بەرۋ ۇيىمدارى بويىنشا قورىتىندى اتتەستاتسيا 28 ماۋسىمعا دەيىن جالعاسادى. كوللەدجدەردى بيىل 144 مىڭنان استام تۇلەك اياقتايدى. ديپلومداردى تاپسىرۋ سالتاناتىن 28 ماۋسىم مەن 1 شىلدە ارالىعىندا وتكىزۋ ۇسىنىلىپ وتىر.
