قالامگەر-جۋرناليست مەرەكە ابدەش ۇلى قۇلكەنوۆ 1951 جىلى 8 قاراشادا اتىراۋ وبلىسى, قىزىلقوعا اۋدانى, قاراباۋ اۋىلىندا تۋعان. قازاقستاننىڭ ەڭبەك سىڭىرگەن قىزمەتكەرى, قازاقستان جازۋشىلار وداعىنىڭ مۇشەسى, الماتى قالالىق ءماسليحاتىنىڭ دەپۋتاتى. قازاقستان رەسپۋبليكاسى پرەزيدەنتى سىيلىعىنىڭ لاۋرەاتى.
س.م.كيروۆ اتىنداعى قازاق مەملەكەتتىك ۋنيۆەرسيتەتىنىڭ (قازىرگى ءال-فارابي اتىنداعى قازاق ۇلتتىق ۋنيۆەرسيتەتى) جۋرناليستيكا فاكۋلتەتىن بىتىرگەن (1978). بىرنەشە كىتاپتىڭ اۆتورى. سولاردىڭ ءبىرى — راحىمجان وتارباەۆپەن بىرلەسىپ جازعان «باس» دراماسى ءۇشىن مادەنيەت مينيسترلىگى جاريالاعان «بايتەرەك» رەسپۋبليكالىق بايكاۋىندا ەكىنشى جۇلدەگە يە بولدى (2004 ج.).
1970 جىلى اسكەري بورىشىن وتەپ كەلگەننەن كەيىن 1971 — 1973 جىلدارى قازاقستان كومپارتياسى ورتالىق كوميتەتىنىڭ گازەت-جۋرنال باسپاسى باسپاحاناسىندا باسپاگەردىڭ كومەكشىسى بولدى. ۋنيۆەرسيتەتتى بىتىرگەن سوڭ بۇقارالىق اقپارات قۇرالدارىندا («قازاقستان پيونەرى» گازەتى, قازاقستان تەلەارناسى, «پيونەر» جۋرنالى, قازاق ادەبيەتى (گازەت)) ءتىلشى,
1993-1997 جىلدار ارالىعىندا «جالىن» رەسپۋبليكالىق قوعامدىق-ادەبي جۋرنالىنىڭ باس رەداكتورى,
1997 جىلدان بەرى «انا ءتىلى» رەسپۋبليكالىق گازەتىنىڭ, 2000 جىلدان وسى ۋاقىتقا دەيىن «تاڭ-شولپان» ادەبي-كوركەم, كوپشىلىك جۋرنالىنىڭ باس رەداكتورى,
1991 جىلدان قازىرگى كۇنگە دەيىن «ولكە» باسپاسىنىڭ باس ديرەكتورى بولىپ ەڭبەك ەتىپ كەلەدى.
«قۇرمەت» وردەنىمەن, ۇلتتىق جۋرناليستىك سىيلىق «التىن جۇلدىز» ت.ب. بىرنەشە مەدالدارمەن ماراپاتتالعان. ءوزى باسشىلىق ەتىپ وتىرعان «انا ءتىلى» گازەتى «رەسپۋبليكالىق ۇزدىك گازەت» اتاعىنا يە بولدى.
سونداي-اق توراعانىڭ ءبىرىنشى ورىنباسارى بولىپ نۇرجان قۋانتاي, ەكىنشى ورىنباسارى باۋىرجان جاقىپ, ءۇشىنشى ورىنباسارى قاسىمحان بەگمانوۆ, ءتورتىنشى ورىنباسارى عالىم قاليبەك, بەسىنشى ورىنباسارى بولىپ بەيبىت سارىباي سايلاندى.
ايتا كەتەيىك, بۇگىن الماتىدا جازۋشىلار وداعىنىڭ حVI قۇرىلتايى ءوتىپ جاتىر. قۇرىلتايعا جازۋشىلار وداعىنىڭ باسقارما مۇشەلەرىمەن قاتار, ەلىمىزدىڭ بارلىق ءوڭىرلەرىندەگى مۇشەلەرى, فيليال ديرەكتورلارى قاتىسۋدا. سونىمەن قاتار الىس-جاقىن شەت ەلدەردەن قۇرمەتتى قوناقتار, ەلىمىزدىڭ ونەر مەن عىلىم قايراتكەرلەرى شاقىرىلدى.
بەس جىلدا ءبىر رەت وتەتىن جيىندا اقپارات جانە قوعامدىق دامۋ ءمينيسترى دارحان قىدىرالى مەملەكەت باسشىسى قاسىم-جومارت توقاەۆتىڭ جازۋشىلارعا قۇتتىقتاۋىن جەتكىزدى.
