«قازاقستاندىق وقىتۋشىلار مەن قىزمەتكەرلەر ازيا ۋنيۆەرسيتەتتتەرى اليانسى جەلىسى اياسىندا ۇيىمداستىرىلعان عىلىمي-زەرتتەۋ كونفەرەنتسيالارىنا, تاجىريبە الماسۋ باعدارلامالارىنا ءجيى قاتىسۋعا مۇمكىندىك الدى. ءبىز اليانس جۇمىسىنىڭ بەلسەندى قاتىسۋشىسىمىز جانە ونى ماقتان تۇتامىز. ءبىز ازياداعى جوعارى ءبىلىمنىڭ دامۋىنا ءوز ۇلەسىمىزدى قوسۋعا تىرىسامىز», دەدى ءاليحان سمايىلوۆ ەلوردادا ءوتىپ جاتقان ازيا ۋنيۆەرسيتەتتەرى رەكتورلارىنىڭ فورۋمىندا.
سونداي-اق ۇكىمەت باسشىسى پاندەميادان كەيىن كەز كەلگەن جاعدايعا دايىن بولۋ كەرەكتىگىن ايتتى.
«پاندەميادان كەيىن ءبىز تەحنولوگيالىق رەۆوليۋتسيا تۋدىرعان الەمدە بولىپ جاتقان جىلدام وزگەرىستەرگە دايىن بولۋىمىز كەرەك. بۇگىندە ءارتۇرلى سالادا, اسىرەسە ءبىلىم بەرۋ سالاسىنداعى يننوۆاتسيالىق شەشىمدەرگە سۇرانىس جوعارى. وسى مۇمكىندىكتى پايدالانىپ, قازاقستانداعى جوعارى ءبىلىم سالاسىنداعى ماڭىزدى وقيعالارمەن بولىسكىم كەلەدى», دەدى.
ايتا كەتسەك, ازيا ۋنيۆەرسيتەتتەرىنىڭ اليانسىنا 15 جوعارعى وقۋ ورنى كىرەدى. ولار: تسينحۋا ۋنيۆەرسيتەتى, نازارباەۆ ۋنيۆەرسيتەتى, گونكونگ عىلىم جانە تەحنولوگيالار ۋنيۆەرسيتەتى, توكيو ۋنيۆەرسيتەتى, سەۋل ۇلتتىق ۋنيۆەرسيتەتى, سينگاپۋر ۇلتتىق ۋنيۆەرسيتەتى, ءۇندىستاننىڭ بومبەي تەحنولوگيالىق ينستيتۋتى, يندونەزيا ۋنيۆەرسيتەتى, چۋلالونگكورن ۋنيۆەرسيتەتى, مالايا ۋنيۆەرسيتەتى, كولومبو ۋنيۆەرسيتەتى, يانگون ۋنيۆەرسيتەتى, بەيجىڭ ۋنيۆەرسيتەتى, بىرىككەن اراب امىرلىكتەرىنىڭ ۋنيۆەرسيتەتى, ساۋد كورول ۋنيۆەرسيتەتى.
