جازۋشىنىڭ الماتىداعى مۋزەي-ءۇيىنىڭ جۇمىس كابينەتىندەگى كىتاپ سورەسىندە كەلۋشىلەردىڭ نازارىن ەرەكشە اۋداراتىن ءبىر جادىگەر «قارا مادوننا» فوتو-كارتيناسىنىڭ كوشىرمەسى تۇر. ۇزىندىعى 47 سم, ەنى 34/3. فوتو-كوشىرمەنىڭ تاريحى دا قىزىق. بۇل فوتو-كارتينا – چەح فوتو-ءتىلشىسى كارەل گاەكتىڭ «قارا مادوننا» اتتى تۋىندىسى. چيكاگودا وتكەن فوتو-سۋرەت كورمەسىندە التىن مەدال يەلەنگەن. ع.مۇسىرەپوۆ 1963 جىلى الجيرگە بارعان ساپارىندا وسىنى قاتتى ۇناتىپ, الىپ كەلىپ, ءوزىنىڭ جۇمىس كابينەتىندەگى كىتاپ سورەسىنىڭ ەڭ بيىك تۇسىنا قويعان. فوتو-كارتينادا بالاسىن قۇشاعىنا قىسىپ, ەمىرەنىپ تۇرعان قارا ءناسىلدى انانىڭ جۇزىنەن سابيىنە دەگەن عاجاپ مەيىرىمدى, سۇيىسپەنشىلىكتى كورەمىز. سۋرەتكەر ءۇشىن انا بەينەسى ناسىلگە, ۇلتقا بولىنبەيدى. انا ارقاشاندا انا بولىپ قالادى. عابەڭ دە وسى كارتيناعا قاراپ وتىرىپ ەرەكشە شابىت العان شىعار. ويتكەنى جازۋشىنىڭ بايان سۇلۋ («قوزى كورپەش – بايان سۇلۋ»), جىبەك («قىز جىبەك»), اقتوقتى («اقان سەرى – اقتوقتى»), بانۋ («امانگەلدى»), تورعىن («بولاشاققا امانات»), اقبوتا («قازاق سولداتى»), نازىكەش, كۇنزيلا, ەليزاۆەتا, كوپەي, كۇڭشە, جۇباي («ويانعان ولكە»), اقليما («كەزدەسپەي كەتكەن ءبىر بەينە»), «ەر انا», «اقليما» «انانىڭ اناسى», «اشىنعان انا», «انانىڭ اراشاسى», «ۇلپان», «مايرا» اتتى شىعارمالارى – بۇكىلالەمدىك انالار گالەرەياسىنا قوسىلعان ۇلەس.
عابيت مۇسىرەپوۆ: «انا سۇلۋلىعى جۇزىندەگى مەيىرىمىنەن كورىنەدى», دەگەن. انانىڭ مەيىرىمدىلىگىندە شەك جوق. انانىڭ ءجۇزى نۇر شاشىپ, جان-جاعىنا ءوز شۋاعىن توگەدى.
انار كوشەرباەۆا,
الماتىداعى س.مۇقانوۆ پەن
ع.مۇسىرەپوۆ ادەبي-مەموريالدىق مۋزەي-كەشەنىنىڭ كىشى عىلىمي قىزمەتكەرى
