5 مامىردا بۋداپەشتتە قازاقستاننىڭ ماجارستانداعى ەلشىلىگى ۇلى وتان سوعىسىنداعى جەڭىستىڭ 78 جىلدىعىنا وراي بوستاندىق الاڭىندا جانە قالانىڭ ورتالىق زيراتىندا كەڭەستىك ازات ەتۋشى جاۋىنگەرلەردىڭ ەسكەرتكىشتەرىنە گۇل شوقتارىن قويدى.
جۋكەۆيل قالاسىندا 8 مامىردا جەڭىس كۇنى قارساڭىندا قازاقستاننىڭ فرانتسياداعى ديپلوماتتارى وسى ەلدى فاشيستىك باسقىنشىلاردان ازات ەتۋ جولىندا قازا تاپقان قازاقستاندىقتاردى ەسكە الىپ, تاعزىم ەتتى. گۇل شوقتارىن قويۋ ءراسىمى 1995 جىلى تارن دەپارتامەنتىنىڭ جۋكەۆيل كوممۋناسىندا قازاقستان ەلشىلىگى ورناتقان ەسكەرتكىشتىڭ جانىندا ءوتتى. بۇل مەموريال فرانتسۋز مەملەكەتى قورعايتىن نىساندار تىزىمىنە ەنگىزىلگەن.
سول كۇنى نورۆەگيانىڭ ليللەحاممەر قالاسىنىڭ ماڭىنداعى يورستادموەن اسكەري زيراتىندا كەڭەس جاۋىنگەرىنىڭ ەسكەرتكىشىنە گۇل قويۋ ءراسىمى دە ءوتتى. ءىس-شارا 8 مامىردا اتاپ وتىلەتىن نورۆەگيانى ازات ەتۋ كۇنىنە ارنالعان. راسىمگە قازاقستاندىق ديپلوماتتار, ليللەحاممەر قالاسىنىڭ مەرى ينگۋن تروسحولمەن, سونداي-اق يورستادموەن اسكەري بازاسىنىڭ قولباسشىلىعى مەن جەرگىلىكتى قورعانىس گۆاردياسى قاتىستى. مەموريالدا قازاقستان مەن نورۆەگيانىڭ تۋلارى كوتەرىلدى.
سانكت-پەتەربۋرگتە كەڭەس حالقىنىڭ ۇلى وتان سوعىسىنداعى جەڭىسىنىڭ 78 جىلدىعى قارساڭىندا ءداستۇر بويىنشا قر باس كونسۋلدىعىنىڭ قىزمەتكەرلەرى كەڭەس وداعىنىڭ باتىرى ءاليا مولداعۇلوۆانىڭ, قازاقتىڭ ۇلى اقىنى جامبىل جاباەۆتىڭ ەسكەرتكىشتەرىنە, سونداي-اق «وتان-انا» مونۋمەنتىنە جانە لەنينگرادتى قورعاۋشىلار – قازاقستان تۋمالارىنا ارنالعان مەموريالدىق تاقتايىنا گۇل شوقتارىن قويىپ, قۇرمەت كورسەتتى.
