ەكىجاقتى ۆيزاسىز رەجىم ورناتۋدىڭ قازاق ەلى ءۇشىن پايدالى تۇستارى كوپ. بىرىنشىدەن, ۆيزاسىز رەجىم شاعىن جانە ورتا بيزنەستىڭ دامۋىنا مۇمكىندىك بەرەتىنىن ماماندار جاپپاي ايتىپ جاتىر. ەكىنشىدەن, ءبىز ءۇشىن قىتاي مەديتسيناسىنىڭ يگىلىگىن كورۋىنە كەڭىرەك جول اشىلادى. ۇشىنشىدەن, ءتۋريزمنىڭ دامۋىنا ىقپال جاسايدى.
مەن – جەتىسۋ وبلىسىنان سايلانعان دەپۋتاتپىن. ءبىزدىڭ ءوڭىردىڭ تابيعاتى كەرەمەت, ول جەردە تۋريستەر كورەتىن تاماشا ورىندار بار. قازىرگى كۇنى الاكول مەن بالقاشقا جول سالىنىپ, دەمالىس ورىندارى كوپتەپ اشىلىپ جاتىر. ەلىمىزدىڭ تۋريستەر قىزىعاتىن تاۋلى, ورماندى, كولدى جەرلەرىنىڭ ءبارى قىتايمەن شەكارادا تۇر. سوندىقتان ءبىز ونىڭ مۇمكىندىگىن بارىنشا پايدالانۋىمىز كەرەك. جالپى ايتقاندا, قازاقستان مۇحيتقا شىعاتىن ەل بولماسا دا, قىتاي – ءبىز ءۇشىن الىپ تەڭىز. ءبىز سول تەڭىزدىڭ جاعاسىندا وتىرعان ەل بولعاندىقتان, ونىڭ يگىلىگىن مۇمكىندىگىنشە پايداعا اسىرۋىمىز كەرەك.
ۆيزاسىز رەجىم مەرزىمىنىڭ 14 كۇننەن 30 كۇنگە ۇزارتىلۋى «ەلگە قارا قىتاي قاپتايدى» دەگەن قاۋىپكە نەگىز بولمايدى. ونداي جاڭساق ويدان بارىنشا اۋلاق بولعانىمىز دۇرىس. سول سوزدەردى ايتىپ جاتقانداردىڭ ءبارى – بۇرىن-سوڭدى قىتايمەن بايلانىسى جوق ادامدار. مىسالى, جاركەنت قالاسى – شەكاراعا ءتيىپ تۇرعان ەلدى مەكەن. بۇعان دەيىن قانشاما قانداسىمىز بەرى اسىپ, تاريحي وتانىنا ورالىپ جاتىر. بىراق وسى 30 جىلدىڭ ىشىندە جاركەنتكە قىتايلار جاپپاي كوشىپ كەلىپ, قاپتاپ جاتقاندىعىن كورگەن ەمەسپىز. ەگەر ولار كەلەتىن بولسا, ۆيزا بار كەزدە دە كەلە بەرەر ەدى عوي.
قحر ءبىلىم مينيسترلىگىنىڭ اقپاراتى بويىنشا كورشى ەلدىڭ جوعارى وقۋ ورىندارىندا كوپتەگەن وتانداسىمىز وقيدى. سونداي-اق 2015 جىلدان باستاپ قىتايدىڭ بەيجىڭ, شانحاي, داليان, سيان قالالارىنداعى جوعارى وقۋ ورىندارىندا «قازاقستان ورتالىقتارى» جۇمىس ىستەپ كەلەدى. 2022 جىلدىڭ قاراشا ايىندا شىعىس قىتاي پەداگوگيكالىق ۋنيۆەرسيتەتىندە «قازاقستاندى زەرتتەۋ ورتالىعى» رەسمي تۇردە اشىلدى. سونىمەن قاتار قىتايدىڭ جوعارى وقۋ ورىندارىندا وقيتىن قازاقستاندىق ستۋدەنتتەردىڭ اتا-انالارى ءوز بالالارىنا كەدەرگىسىز بارا الادى.
بولات كەرىمبەك,
ءماجىلىس دەپۋتاتى
