ەگىزدەر 2000 جىلى اقتوبە قالاسىندا دۇنيەگە كەلگەن. وبلىس ورتالىعىنداعى اۆتوپاركتەردىڭ بىرىندە مەحانيك بولىپ جۇمىس ىستەگەن اكەلەرى سابىرجان 2012 جىلى دۇنيە سالعان ەكەن. انالارى اسەل ەسەپشى بولىپ جۇمىس ىستەيدى. كىشكەنتايىنان ەڭبەكقور بولىپ وسكەن امان مەن ەسەن 2017 جىلى اقتوبەدەگى №40 ورتا مەكتەپتى ءتامامدايدى. سول جىلى ەكى مارتە كەڭەس وداعىنىڭ باتىرى تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىنا ينجەنەر ماماندىعى بويىنشا وقۋعا ءتۇسىپ, كۋرسانت اتاندى. ءبىر كەزدەرى جارىقتىق اكەلەرى ۇشقىش بولسام دەگەن نيەتپەن وسى وقۋ ورنىنا تۇسپەككە باعىن سىناعان ەكەن. دەنساۋلىعىنا بايلانىستى ول ارمانى ورىندالماپتى. ايتسە دە اكە ارمانىن ورىنداۋ اعايىندى ەگىزدەرگە بۇيىرىپتى. مەكتەپتە جاقسى وقىپ, ۇلگىلى تارتىبىمەن ۇزدىك وقۋشى اتانعان امان مەن ەسەننىڭ اناسى ءۇشىن بۇل اق تۇيەنىڭ قارنى جارىلعان كۇن بولدى. كىشكەنتايىنان اجە تاربيەسىن كورىپ, ۇلكەندى سىيلاپ, تۋعان ەلدىڭ تاريحىن تانىپ, ءداستۇرىن ساقتاۋعا تالپىنىپ وسكەن ۇلدارى ءۇشىن ەرەكشە قۋانعان اناسى اقسارباس ايتقان.
اسكەري تارتىپكە مەكتەپتەن داعدىلانعان ەكەۋى ينستيتۋتتىڭ كۇن تارتىبىنە دە جىلدام بەيىمدەلىپ كەتتى. كۋرسانتتار اراسىندا بەدەلگە يە بولدى. كەز كەلگەن جەردە دوستارىنا كومەك بەرۋگە دايىن تۇراتىن. بەرىلگەن تاپسىرمانى بۇلجىتپاي ورىندايدى. بالا كۇنىنەن فۋتبولعا قۇمار ەگىزدەردىڭ سپورتتىق, مادەني ءىس-شارالاردان قالىس قالعان كەزى جوق. قازىر دە اسكەري ءبولىمنىڭ فۋتبول كومانداسىندا جاقسى ونەر كورسەتىپ ءجۇر. 2021 جىلى جوعارى اسكەري وقۋ ورنىن ءبىتىرىپ, «لەيتەنانت» اتاعىن العان اعايىندى بيسەمبايلار العاشقى كۇننەن اقتاۋ گارنيزونىنداعى 30153 اسكەري بولىمىندە قىزمەت اتقارىپ كەلەدى.
ء«بىز ءۇشىن اسكەري ماماندىقتى مەڭگەرىپ, قارۋلى كۇشتەر قاتارىندا قىزمەت ەتۋ – ۇلكەن ابىروي, – دەيدى امان. – اسىرەسە انامىز ءبىزدىڭ بۇل جەتىستىگىمىزگە ەرەكشە قۋاندى. ەڭ باستىسى, اسكەري ءومىر ەكەۋىمىزگە دە ۇنايدى».
ء«بىر ءۇيدىڭ الپەشتەگەن ەركەسى بولساق تا, ءومىردىڭ بەلەسىنە بىرگە ورلەپ كەلەمىز, – دەيدى اعاسىنىڭ ءسوزىن جالعاعان ەسەن. – قۋانىشىمىز دا, قيىنشىلىعىمىز دا ءبىر. ۇيلەنۋ تويىمىزدى دا ءبىر كۇندە جاسايتىن شىعارمىز. اكەمىزدەن قالعان قارا شاڭىراقتىڭ ءتۇتىنىن تۇتەتىپ, اقتوبەدە ناعاشى اجەمىزبەن بىرگە تۇرىپ جاتقان انامىزدى قولىمىزعا الساق دەگەن ارمانىمىز بار.
«ۇيلەنىپ, شاڭىراق كوتەرمەك ويلارىڭ بولسا, ءسوز بايلاسقان قىزدارىڭ بار شىعار؟» دەگەن ساۋالىمىزعا امان: «ارينە. ولار دا ءبىز سەكىلدى ەگىز. ستۋدەنتتەر. اقتوبەدە وقىپ جاتىر. ازىرگە اتى-جوندەرى قۇپيا بولا تۇرسىن», دەپ جىميا جاۋاپ بەردى. اڭگىمەمىز كۇندەلىكتى قىزمەت تاقىرىبىنا اۋىسقاندا لەيتەنانت امان بيسەمباي: ء«بىزدىڭ ماماندىق اسا جوعارى جاۋاپكەرشىلىكتى تالاپ ەتەدى. ۇشاقتان اۋەدە قانداي دا ءبىر اقاۋ شىقسا, ونى قالپىنا كەلتىرۋ مۇمكىن ەمەس. سول سەبەپتى اۋە كەمەسى كوككە كوتەرىلمەي تۇرىپ, جەردە ءجىتى تەكسەرىلۋگە ءتيىس», دەدى.
راسىندا, قىر-سىرى مول ينجەنەر-تەحنيكتەر قىزمەتىنىڭ جاۋاپكەرشىلىگى اۋقىمدى-اق. ماسەلەن, ءبىر ۇشاقتىڭ اۋەگە كوتەرىلۋىنە ون شاقتى تەحنيكالىق قۇرامنىڭ ماماندارى قىزمەت كورسەتەدى ەكەن. سول سەبەپتى ۇشاقتاردىڭ اۋەدەگى قاۋىپسىزدىگىنە بىردەن-ءبىر جاۋاپتى – تەحنيك ماماندار. ولار كۇندەلىكتى ۇشۋدىڭ الدىندا ءبىر كۇن بۇرىن ۇشاقتاردىڭ ۇشۋىنا دايىندىق وتكىزىپ, ونداعى اۆياتسيالىق جابدىقتار مەن قارۋ-جاراق جۇيەلەرىن ءجىتى تەكسەرەدى. ۇشار الدىندا جالپى تەكسەرىس وتكىزىلىپ, سوسىن باقىلاۋ تەكسەرىس جۇرگىزىلەدى. سودان كەيىن عانا ۇشۋعا رۇقسات بەرىلەدى. سوندىقتان ماماندار اپتاسىنا ءبىر رەت ينجەنەرلىك تەحنيكالىق دايىندىقتان ءوتىپ تۇرادى. انتىنا ادال, سەرتىنە بەرىك اعايىندى ەگىزدەر لەيتەنانت امان مەن ەسەن بيسەمبايلار بولاشاق وتان قورعاۋشى جاستارعا ۇلگى بولارى انىق.
مۇحاربەك ماحامبەت,
اسكەري جۋرناليست
