ءبىز ساپتىق الاڭعا, ارنايى اسكەري قالاشىقتارعا نۇسقاۋلىق ساباقتارعا شىققان جەكە قۇرامنىڭ اراسىنان سول كۇنگى جاۋىنگەرلىك قىزمەتكە تۇسەتىن تاجىريبەسى دە ءتالىمى دە مول قاراۋىل باستىعى, اعا سەرجانت بەكەت تولەۋىشوۆتى اڭگىمەگە تارتتىق.
«مەن جالپى اسكەري قىزمەتتى 2001 جىلدان باستادىم. ۇلتتىق ۇلان قاتارىندا مەرزىمدىك قىزمەتىمدى اياقتاعان سوڭ اراعا ءبىر-ەكى جىل سالىپ كەلىسىمشارت بويىنشا اسكەري قىزمەتكە ورنالاستىم. العاشىندا ۆزۆود سەرجانتى بولىپ قىزمەت اتقاردىم. 2013 جىلى 6698-اسكەري ءبولىمى قۇرىلعان سوڭ قاراۋىل باستىعى لاۋازىمىنا تاعايىندالدىم. مىنە, سول ۋاقىتتان بەرى وسى جاۋىنگەرلىك قىزمەتتى اتقارىپ كەلەمىن. ون جىلعا جۋىق قىزمەت بارىسىندا ءبىراز تاجىريبە جيناقتادىم. بىزگە جۇكتەلگەن جاۋاپكەرشىلىك وتە جوعارى. ويتكەنى ءبىز ءبىر تاۋلىك بويى قىزمەت اتقاراتىن قاراۋىلدىڭ بارلىق جەكە قۇرامىنىڭ ارەكەتىنە جاۋاپ بەرەمىز. ءار بەلگىلەنگەن ۋاقىت سايىن ايماقتى ءجىتى قاداعالاپ شىعامىز. ۇيرەنگەن دايىندالعان جاۋىنگەرلىك قىزمەت الگوريتمىنەن بولەك كەز كەلگەن ۋاقىتتا وقىس وقيعا بولۋى مۇمكىن. ۋاقىتىندا دۇرىس شەشىم قابىلداپ, ناقتى ارەكەت ەتۋ – بىزگە ارتىلعان تاپسىرمالاردىڭ ءبىرى», دەيدى اعا سەرجانت قىزمەتتەرى تۋرالى.
اسكەري قالاشىقتاعى وتكىزىلىپ جاتقان نۇسقاۋلىق ساباقتاردى ارالاپ ءجۇرىپ, ساربازدارمەن وتكىزىلىپ جاتقان ساباققا نازار اۋداردىق. ۆزۆود كومانديرى سوتتالعانداردىڭ قاشۋ ارەكەتى بولعان جاعدايدا ساقشىنىڭ ءىس-ارەكەتى تاقىرىبىن ساربازدارمەن تالداپ, ءتۇسىندىرىپ جاتتى. نۇسقاۋلىقتى ءتۇسىندىرىپ جاتقاندا ۆزۆود كومانديرىنىڭ سۇراقتارىنا ناقتى ءارى دۇرىس جاۋاپ بەرىپ, ارەكەت ەتۋ الگوريتمىن جاتقا ايتىپ تۇرعان جاس سارباز كوزىمىزگە ءتۇستى. ۆزۆود كومانديرى نۇسقاۋلىقتى اياقتاعان سوڭ الگى سارباز تۋرالى سۇراعانىمىزدا, جاۋىنگەرلىك قىزمەتتە ۇلگىلىلەردىڭ ءبىرى ەكەنىن ايتىپ ءوتتى. رەتى كەلگەندە ساربازبەن دە سويلەسىپ ۇلگەردىك. مىسالى, 2-اتقىشتار روتاسىنىڭ ساربازى, قاتارداعى جاۋىنگەر ەرنۇر كەلەسبەك قىزىلوردا قالاسىنان شاقىرىلعان ەكەن.
«مۇندا كەلگەلى اسكەردەگى جاۋىنگەرلىك قىزمەتتىڭ قىر-سىرىن كۇندەلىكتى وقىپ ۇيرەنۋدەمىن. قازىرگى تاڭدا №53 تۇزەۋ مەكەمەسىن كۇزەتۋ بويىنشا قاراۋىل قۇرامىندا قىزمەت اتقارىپ كەلەمىن. وسى ۋاقىتقا دەيىن 80-گە جۋىق اتقارىلعان جاۋىنگەرلىك قىزمەتتىڭ قۇرامىندا بولدىم. ءبىزدىڭ ساقشى رەتىندە باستى مىندەتىمىز – كەز كەلگەن قيمىلدى, دىبىستى قالت جىبەرمەۋ. ويتكەنى ءمۇلت جىبەرگەن ءبىر قيمىل ۇلكەن ءبىر اعاتتىققا الىپ كەلۋى مۇمكىن. ءوزىنىڭ پايداسى ءۇشىن نە نارسەگە بولسا باس تىگىپ, قيتۇرقىلىقتىڭ نەشە ءتۇرىن ويلاپ تاباتىن سوتتالعانداردان ءبارىن كۇتۋگە بولادى. ءتۇن ورتاسىنان اۋىپ, ءاربىرىمىزدى ۇيقى باسقان ۋاقىتتى كۇتىپ ارەكەت ەتكىسى كەلەدى. ءبىزدىڭ ساقشى رەتىندە وسال تۇستارىمىزدى اڭديدى, الايدا وعان جول بەرمەيمىز. سول ءۇشىن كومانديرىمىز ءاربىر ساباقتا قىزمەتكە دايىنداعان سايىن جۇكتەلگەن جاۋاپكەرشىلىكتى ءتۇسىنىپ, تاپسىرمالاردى مۇقيات تىڭدايمىز. مۇنارادا تۇرعان بىزگە كوپ نارسە بايلانىستى, قىراعىلىعىمىز بەن ساقتىعىمىز ارقىلى ارتىمىزدا تۇرعان بارلىق قاراۋىل قۇرامىنىڭ جاۋىنگەرلەرى, ياعني كينولوگ مامان, 1 جانە 2-بەكەت, سونىمەن قاتار قاراۋىل باستىقتارى ارەكەت ەتەدى. قىزمەتىمدە كوپ زاتتىڭ تىيىم سالعان ايماققا ءوتىپ كەتپەۋىنە جول بەرمەدىم, تيىسىنشە ارەكەت ەتتىك. بۇل – مەنىڭ قاراۋىل قىزمەتىندەگى باستى مىندەتىم», دەيدى ساقشى جاۋىنگەر ە.كەلەسبەك.
جاس سارباز سوزىندە اسكەردە ءوزىن تەك جاقسى جاعىنان شىڭداي باستاعانىن, ۋاقىت پەن جاقىندارىنىڭ قادىرىن تۇسىنگەنىن, ەر-ازامات رەتىندە وتان قورعاۋشى بولۋعا شەشىم قابىلداپ, مەرزىمدىك قىزمەتىن كەلىسىمشارتپەن جالعاستىراتىنىن ايتىپ قالدى.
ماليكا شىنجىگىتوۆا,
اعا لەيتەنانت
شىمكەنت
