اكتسيانىڭ تاريحىنا از-كەم توقتالساق, پاركتەر شەرۋى ارىدا, 1840 جىلى ساياساتكەر, بوتانيك دج.ستەرلينگ مورتوننىڭ اقش-تىڭ نەبراسكا شتاتىنا قونىس اۋدارعان شاعىندا باستالعان دەسەدى. سونىمەن ول جاڭا قونىسىنىڭ اۋلاسىندا تۇرعان جالعىز ءتۇپ اعاشتى كورگەن ساتتە ايەلىمەن بىرگە اعاش وتىرعىزىپ, كوگالداندىرۋ جۇمىستارىنا قىزۋ كىرىسىپتى. كەيىن ستەرلينگ مورتون نەبراسكا شتاتىنداعى مەرزىمدى باسىلىمنىڭ رەداكتورىنا كوشەت وتىرعىزۋ كۇنىن وتكىزۋدى ۇسىنىپتى. بۇل باستامانى شتات تۇرعىندارى قولداپ, ءا دەگەننەن ميلليونعا شامالاس اعاش وتىرعىزعان ەكەن. وسىلايشا, ۇيلەسىم تاپقان اكتسيانىڭ ىزىمەن 1990 جىلى «پاركتەر شەرۋى» حالىقارالىق مەرەكەسى باستالعان. سول تۇستا پاركتەر شەرۋىنە 141 ەلدەن 200 ميلليون ادام قاتىسىپتى.
اكتسيا اياسىندا «بۋراباي» ۇلتتىق پاركىنىڭ قىزمەتكەرلەرى ورمان قۇستارىنا 98 ۇيشىك ورناتىپ, وزەن-كولدەردىڭ جاعاسىنا جاساندى 52 ۇيا سالعان. ايتا كەتەرلىگى, دۇنيەجۇزىلىك «پاركتەر شەرۋى» اكتسياسى تەك بۋرابايدا ەمەس, ەل اۋماعىنداعى وزگە دە مەملەكەتتىك تابيعي قورىقتار, ۇلتتىق پاركتەر مەن تابيعي رەزەرۆاتتاردا قاتار وتەدى. وسى اكتسيا بارىسىندا ورمان ينسپەكتورلارى حالىقتىڭ قورشاعان ورتا تۋرالى تانىم كوكجيەگىن كەڭەيتىپ, ەكولوگيالىق ءبىلىم بەرۋدى قولعا العانى دا قۇپتارلىق باستاما بولعان. اكتسيا اياسىندا مەكتەپ وقۋشىلارى مەن كوللەدج ستۋدەنتتەرى اراسىندا تابيعاتتى قورعاۋ تاقىرىبىندا قىزىقتى ۆيكتورينالار ءوتىپ جاتىر. جاستار مەن بالالار قورىقشىلار جۇمىسىنىڭ قىزىعى مەن قيىندىعى جايلى اڭگىمەلەردى دە ىقىلاسپەن تىڭدايتىنىن پارك قىزمەتكەرلەرى دە جاقسى بىلەدى.
ەندى پارك قىزمەتكەرلەرى بۋراباي ماڭىنداعى جەرگىلىكتى حالىقتى ەكولوگيالىق سەنبىلىككە شاقىرۋدى جوسپارلاپ وتىر. سول سەكىلدى سۋرەتكەرلىك قىرىنان تانىلىپ جۇرگەن جاس قىلقالام شەبەرلەرى اراسىندا تابيعات تاقىرىبىندا سۋرەت سالۋدان بايقاۋ وتەدى ەكەن. قىسقاسى, قورشاعان ورتانى قورعاۋعا ۇندەيتىن ءىس-شارالار لەگى ۇزىلمەي, ءۇش ايعا ۇلاسادى. بۇل ءبىر جاعى ەرەكشە قورعالاتىن تابيعي اۋماقتاردىڭ وزەكتى ماسەلەلەرىنە قوعام نازارىن اۋدارۋعا سەپتەسەدى.
