سۋديا ۆيكتوريا سەمەنوۆانىڭ ايتۋىنشا, تالعات اردان مەن قانات سۇلتانبەكوۆ قازاقستاننان تىس جەردە بولعاندىقتان جانە سوتقا كەلۋدەن جالتارىپ جۇرگەندىكتەن ولارعا سىرتتاي ۇكىم شىعارىلدى.
«قانات سۇلتانبەكوۆ 1997 جىلى ەنگىزىلگەن قر قىلمىستىق كودەكسىنىڭ 235-بابىنىڭ 3-بولىگىندە كوزدەلگەن قىلمىستى جاساعانى تۋرالى ايعاق بولماعاندىقتان سوت ونى اقتادى. دەگەنمەن, قر قىلمىستىق كودەكسىنىڭ 28-بابى 3-بولىگىمەن جانە 189-بابى 4-بولىگىنىڭ 2-تارماعىندا جازىلعان قىلمىستى جاساعانى ءۇشىن ايىپتالدى. ول ءومىر بويىنا مەملەكەتتىك قىزمەتتەگى لاۋازىمداردى اتقارۋ قۇقىعىنان, 7 جىلعا باس بوستاندىعىنان ايىرىلدى. سۇلتانبەكوۆ جازاسىن قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەيدى. قاماۋدا ۇستاۋ مەرزىمى ونىڭ ناقتى ۇستالعان كۇنىنەن باستاپ ەسەپتەلەدى.
تالعات اردان قازاقستان رەسپۋبليكاسى قىلمىستىق كودەكسىنىڭ 262-بابىنىڭ 3-بولىگى بويىنشا كىنالى ەمەس دەپ تانىلدى. الايدا, قازاقستان رەسپۋبليكاسى قىلمىستىق كودەكسىنىڭ 189-بابىنىڭ 4-بولىگىنىڭ 2-تارماعىندا كوزدەلگەن قىلمىستى جاساعانى ءۇشىن كىنالى دەپ تانىلدى. ول ءومىر بويىنا مەملەكەتتىك قىزمەتتەگى لاۋازىمداردى اتقارۋ قۇقىعىنان جانە 7 جىلعا باس بوستاندىعىنان ايىرىلدى. تالعات اردان جازاسىن قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەيدى. قاماۋدا ۇستاۋ مەرزىمى ونىڭ ناقتى ۇستالعان كۇنىنەن باستاپ ەسەپتەلەدى», دەدى سۋديا ۆيكتوريا سەمەنوۆا.
ەسكە سالا كەتسەك, استانداعى LRT ءىسى بويىنشا تەرگەۋ امالدارى 2020 جىلدىڭ كۇزىندە باستالدى. تەرگەۋ بارىسىندا ىسكە قاتىسى بار جەتى ادام 5,8 ميلليارد تەڭگەنى جىمقىرۋ دەرەگى بويىنشا كۇدىككە ءىلىندى. ولار 7 جىلدان 10 جىلعا دەيىنگى مەرزىمگە باس بوستاندىعىنان ايىرىلدى.
الايدا كەيىن سوت ۇكىمدى بۇزىپ, ءىس قوسىمشا تەرگەۋگە قايتارىلدى. سۋديا كوكجالوۆتىڭ ايتۋىنشا, ءبىرىنشى ساتىداعى سوت «سوت تەرگەۋىنىڭ بىرجاقتىلىعى مەن تولىق ەمەستىگىنە جول بەرگەن».
ىشكى ىستەر ءمينيسترى ەرلان تۇرعىمباەۆ سۇلتانبەكوۆ پەن اردان ينتەرپول ارقىلى ىزدەستىرىلىپ جاتقانىن حابارلاعان ەدى.
سىبايلاس جەمقورلىققا قارسى قىزمەت ارداننىڭ تۇركيادا, ال سۇلتانبەكوۆتىڭ اقش-تا ەكەنىن انىقتادى. ولار «قىزىل بيۋللەتەن» بويىنشا (تۇتقىنعا الۋ جانە ەكستراديتسيالاۋ ماقساتىندا) حالىقارالىق ىزدەۋگە جاريالانعان, الايدا اقش زاڭىنا سايكەس, «قىزىل بيۋللەتەن» ىزدەۋدە جۇرگەن ادامدى ۇستاۋعا نەگىز بولا المايدى. سەبەبى ولار كوشى-قون رەجيمىن بۇزعان جوق.
ال 12 تامىزدا ماسكەۋ پروكۋراتۋراسى سۇلتانبەكوۆ پەن ارداننىڭ قازاقستاندا بولماعانىنا قاراماستان ءىستى سوتقا جىبەرگەن.
