تەز جينالماعان ءونىم ساعات ساناپ كەمي بەرەدى

وسى اپتادا جامبىلدىق شارۋالار ەگىنگە وراق سالدى. بيىل جامبىل وبلىسى بويىنشا 237 مىڭ گەكتار جەرگە ءدان سەبىلدى. ياعني, وتكەن جىلمەن سالىستىرعاندا 14 مىڭ گەكتار جەرگە ارتىق ەگىن ەگىلدى. ونى جيناپ الۋ ءۇشىن 20 مىڭ تونناداي جانار-جاعارماي قاجەت. ايتسە دە, بيىل جامبىل جەرىندە كوكتەمنىڭ كەش شىعىپ, مامىر ايىنىڭ سوڭىنا دەيىن ىزعاردىڭ كەتپەۋى ەگىننىڭ بىتىك وسۋىنە كەرى اسەر ەتكەن سياقتى. ايتەۋىر, بيىلعى ەگىننىڭ شىعىمى تومەن. وسى وڭىردەگى ەڭ ىرگەلى شارۋا­­شىلىقتاردىڭ ءبىرى – جام­بىل اۋدانىنداعى «پيونەر» شارۋا قوجالىعى بيىل 600 گەكتار­داي جەرگە ارپا, بيداي سەپكەن ەكەن. كوكتەمدە ازداپ جاۋىن جاۋ­عانىمەن ۇزدىكسىز سوققان اڭىزىق جەل جەردىڭ اڭقاسىن كەپتىرىپ ءجى­بەرىپتى. تامىرىنا ىلعال جەتپەگەن ەگىن وسپەي قالعان. سودان شارۋا­شىلىق گەكتارىنان 9-10 تسەنتنەردەن عانا استىق جيناپ جاتىر. «جاۋ جاعادان العاندا ءبورى ەتەك­تەن تارتادى» دەگەن, جامبىل­دىق ديقانداردى ەگىننىڭ تومەن ءتۇسىمى ەسەڭگىرەتىپ وتىرعاندا جەڭىل­دەتىلگەن باعاداعى  جانارماي­دىڭ جەتىسپەۋى تاعى دا جاعا­دان الۋدا. ارينە, ءوڭىر­دەگى ءىرى شارۋاشىلىقتار قول­داعى قاراجاتىن پايدالانىپ, ەگىن وراعىن ۋاقتىلى باستاپ جىبەردى. ال, قورى جوقتارى امال جوق­تىقتان, جوعارىدان كەلەتىن جەڭىلدىكتى كۇتىپ ءجۇر. ايتەۋىر, اۋا رايىنىڭ قولايسىزدىعى ەگىننەن تۇسەتىن ءونىمدى ازايتىپ, ديقاننىڭ نەسىبەسىن ورتايتىپ تاستاعالى تۇر. شارۋاشىلىق باسشىلارىنىڭ ايتۋىنا قاراعاندا ورتا ەسەپپەن ەگىستىكتىڭ ءار گەكتارىنان بار بولعانى 8 تسەنتنەردەن عانا ءونىم جينالۋدا. وسىدان كەيىن بيىل قامباعا استىق جىلداعىدان ەكى ەسەدەي از قۇيىلاتىن سەكىلدى. – بيىلعى كوكتەم سالقىن, جاز ىستىق بولدى. ءبىزدىڭ شارۋاشىلىق اعىن سۋدىڭ اياق جاعىندا ورنا­لاسقان. سۋ جاقسى كەلمەيدى. سۋار­مالى جەردىڭ وزىنەن وسىنداي تومەن ءونىم الىپ جاتىرمىز, – دەيدى بۇل جونىندە «پيونەر» شارۋا قوجالىعىنىڭ توراعاسى الپىسباي جۇماحانوۆ. ال, «شاۋشەن» شارۋا قوجالىعىنىڭ بريگاديرى ساعادي بالعاەۆ ارزانداتىلعان جانار-جاعارمايعا كۇنى بۇرىن تاپسىرىس بەرىپ قويعانىمەن ءالى كۇنگە قول جەتكىزە الماي كەلە جاتقانىن ايتىپ اشىنادى. بۇگىنگە دەيىن وبلىس شارۋاشىلىقتارىنا قاجەتتى 20 مىڭ تونناداي جانارمايدىڭ 260 تونناسى عانا بەرىلىپتى. جامبىل وبلىستىق اۋىل شارۋاشىلىعى باسقارماسى باسشىسىنىڭ ورىنباسارى زياتحان ومىراليەۆ بۇل كەمشىلىككە ورتاداعى دەلدالدار كىنالى دەپ ەسەپتەيدى. «مۇناي زاۋىتىنداعى باعاعا بايلانىستى جانارماي جەتكىزۋ ماسەلەسى ءسال كەشىگىپ وتىر. ءبىزدىڭ وپەراتورلار زاۋىتتان ءونىمدى ۋاقىتىندا الا الماۋدا», دەيدى باسقارما باس­شىسىنىڭ ورىنباسارى. استىق جيناۋ ەرەكشە جينا­قى­لىقتى, ۇيىمشىلدىقتى, بىلگىر­لىكتى كەرەك ەتەدى. تەز جينالماعان ءونىم ساعات ساناپ كەمي بەرەدى. تورعاي جەيدى. جەل قيىپ تۇسىرەدى. قاتتى ءپىسىپ كەتكەندىكتەن ورعان كەزدە توگىلەدى. مال ارالايدى, ايتەۋىر جاۋى كوپ. جامبىل وبلىسىنىڭ اكىمى كارىم كوكىرەكباەۆ قايبىر كۇنگى جيىندا پىسكەن ەگىندى ۋاق­تىلى ورىپ, بوسقا ىسىراپ ەتپەۋدى قاتاڭ تالاپ ەتتى. شىنىندا بۇل ناۋقان وسى سالانىڭ جاۋاپتى باسشىلارىنا ۇلكەن سىن بولعالى تۇر. ورالحان ءداۋىت, «ەگەمەن قازاقستان». جامبىل وبلىسى.