فەستيۆال قورىتىندىسى بويىنشا شالقار اۋداندىق سارى باتاق ۇلى اتىنداعى مادەنيەت ءۇيىنىڭ حالىق تەاترى ساحنالاعان «قاھارلى كۇندەردىڭ ءتاتتى ءدامى» قويىلىمى باس جۇلدەگە يە بولدى. اۋدان ونەرپازدارى مايدان دالاسىنداعى مەدبيكە راۋشان مەن جاۋىنگەر ەرجاننىڭ ماحابباتىن, ۇرىس سۋرەتتەرىن بارىنشا شىنايىلىقپەن كورسەتە ءبىلدى.
قازىلار القاسىنا توراعالىق ەتكەن قازاقستاننىڭ ەڭبەك سىڭىرگەن قايراتكەرى بولات ءابدىلمانوۆ: «بۇگىندە رۋحاني قۇندىلىقتار وزگەرىپ, جەڭىل, سىرتى جىلتىراعان دۇنيەلەر العا شىققان ۋاقىتتا تاحاۋي احتانداي الىبىن ەسكە الىپ, ونىڭ شىعارمالارىن كوپشىلىك نازارىنا ۇسىنۋدى ۇيىمداستىرعان وبلىس باسشىلىعى, مادەنيەت باسقارماسى, حالىق شىعارماشىلىعى ورتالىعىنا ريزاشىلىعىمدى بىلدىرەمىن. كەي وڭىرلەردە مەملەكەتتىك تەاترلار قاناتىن كەڭگە جايا الماي جاتقاندا حالىقتىق تەاترلار فەستيۆالىن ۇيىمداستىرۋ ۇلكەن كورەگەندىكتىڭ بەلگىسى. مۇنداي ءىس-شارالار ەل ىشىندەگى شىعارماشىلىق ۇجىمداردى وسىرۋگە سەپتىگىن تيگىزەدى. قاي كەزدە دە ناعىز تالانت ەل ىشىندە بولادى. حالقىمىزدىڭ ماڭدايىنا بىتكەن شامشىراقتارىنىڭ كوبىندە كاسىبي ءبىلىم بولماسا دا, ولار تابيعي دارىندارىنىڭ ارقاسىندا ەل سۇيىسپەنشىلىگىنە بولەنە ءبىلدى. وسى ءساتتى پايدالانا وتىرىپ, ەل باسشىلارىنا حالىقتىق تەاترلاردىڭ قارجىلىق-ماتەريالدىق جاعدايىن جاقسارتۋ قاجەت دەگەن ۇسىنىس ايتامىن. ساحنادا اۋىل مادەنيەتىنە شىن جانى اشيتىن ادال ازاماتتار ءجۇر. ولارعا قولداۋ قاجەت», دەپ اتاپ ءوتتى. شىندىعىندا دا, حالىقتىق تەاترلاردىڭ ارتىستەرى ەڭبەكاقى المايدى. اۋىل ساحناسىندا ونەرگە بەيىم, ونەردى قادىرلەيتىن ابزال جاندار جۇرەدى. تەاتردىڭ باس رەجيسسەرى ءان, تەرمە ايتاتىن, بويىندا اكتەرلىك قابىلەتى بار اۋىلداسىن ساحناعا دايىندايدى.
اقتوبە وبلىستىق حالىق شىعارماشىلىعى ورتالىعى ديرەكتورىنىڭ ورىنباسارى گۇلنار سەيتالينانىڭ ايتۋىنشا, وڭىردەگى 198 مادەنيەت ءۇيىنىڭ جانىندا 120 تەاتر ۇيىرمەسى جۇمىس ىستەيدى. «وسى 120 ۇيىرمەنىڭ 22-سىندە حالىقتىق اتاعى بار. ءبىزدىڭ ورتالىق وتكىزگەن ىرىكتەۋ كەزەڭىنە التى ۇجىم قاتىسىپ, شالقار, ويىل, مۇعالجار اۋداندىق حالىق تەاترلارى بايقاۋعا جىبەرىلدى حالىقتىق تەاتردا رەجيسسەر مەن ونىڭ كومەكشىسىنە عانا شتاتتىق بىرلىك بەكىتىلگەن. اكتەرلىك قۇرامى ونەرسۇيەر اۋىل تۇرعىندارىنان قۇرالادى. ولار جۇمىستان كەيىن اۋىلدىق كلۋبقا, مادەنيەت ۇيلەرىنە جينالىپ دايىندالادى. بۇل ونەرپازدار فەستيۆالگە عانا قاتىسىپ قويماي, اۋىل مادەنيەتىنىڭ دامۋىنا ۇلەس قوسىپ وتىرعان جاندار. بۇگىندە اۋىلداعى كەز كەلگەن مادەني ءىس-شارا ولاردىڭ قاتىسۋىنسىز وتپەيدى», دەپ اتاپ ءوتتى.
قازىلار القاسى ۇزدىكتەردى بىرنەشە اتالىم بويىنشا ماراپاتتادى. ت.احتانوۆتىڭ «كۇشىك كۇيەۋ» كومەدياسىن ساحنالاعان تۇركىستان وبلىسى ورداباسى اۋداندىق «تەمىرلان» حالىقتىق تەاترى «ۇزدىك اكتەرلىك انسامبل», «ماحاببات مۇڭىن» كورسەتكەن اباي وبلىسى اقسۋات اۋداندىق تەاترى «ەڭ ۇزدىك ساحنالىق نۇسقا» اتالىمىن يەلەندى. سونداي-اق باتىس قازاقستان وبلىسى ءبورلى اۋداندىق حالىق تەاترى «ەڭ ۇزدىك دەبيۋت», قىزىلوردا وبلىسى شيەلى اۋداندىق حالىقتىق تەاترى «ەڭ ۇزدىك ستسەنوگرافيا» اتالىمىنا لايىق دەپ تانىلدى.
فەستيۆالگە كەلگەندەردىڭ ەشقايسىسى قۇر قايتقان جوق. ء«رولدى شىنايى سومداعانى ءۇشىن» ويىل اۋداندىق مادەنيەت ءۇيىنىڭ ءارتىسى ساندۋعاش قارساقباەۆا, «ەڭ ۇزدىك ەكىنشى پلانداعى ءرول» اتالىمى قاراعاندى وبلىسى شەت اۋداندىق حالىق تەاترىنىڭ ءارتىسى ارايلىم ارتىقباەۆاعا, «ەڭ ۇزدىك ايەل ءرولى» اتالىمى جامبىل وبلىسى «دۋلاتي جاستارى» تەاترىنىڭ ءارتىسى ايىمجان باۋىرجانقىزىنا, «ەڭ ۇزدىك ەر ادام ءرولى» اتالىمى مۇعالجار اۋداندىق حالىق تەاترىنىڭ ءارتىسى ەربولات امانگەلديەۆكە بۇيىردى. بارلىق اتالىم يەلەرىنە 300 مىڭ تەڭگە كولەمىندە سەرتيفيكات تابىستالدى.
فەستيۆال اياسىندا ايگىلى ءارتىس بولات ءابدىلمانوۆ حالىقتىق تەاترلار ارتىستەرى مەن رەجيسسەرلەرىنە بىرنەشە شەبەرلىك ساباعىن وتكىزدى.
اقتوبە وبلىسى
