ەۋرازيالىق ەكونوميكالىق وداققا ورتاق ەنەرگەتيكالىق نارىق 2019 جىلى ىسكە قوسىلادى

استانا. 10 شىلدە. ەۋرازيالىق ەكونوميكالىق كوميسسيانىڭ ەنەرگەتيكا جانە ينفراقۇرىلىم بويىنشا القا مۇشەسى (مينيستر) دانيال احمەتوۆتىڭ توراعالىعىمەن مۇناي-گاز جونىندەگى كونسۋلتاتيۆتىك كوميتەتتىڭ كەزەكتەن تىس وتىرىسى ءوتتى. بۇل تۋرالى «قازاقپارات» حابارلادى. وتىرىس بارىسىندا دانيال احمەتوۆ: «ەۋرازيالىق ەكونوميكالىق كوميسسيا تاراپىنان ورتاق ەلەكتر ەنەرگەتيكالىق نارىق تۇجىرىمداماسىنىڭ جوباسى 2015 جىلدىڭ 1 شىلدەسىندە مۇشە-مەملەكەتتەردىڭ پرەزيدەنتتەرىنىڭ قاراۋىنا جىبەرىلۋى كەرەك. 2016 جىلى ءبىز باعدارلامانى قابىلدايمىز. وسىلايشا ەۋرازيالىق ەكونوميكالىق وداققا ورتاق ەلەكتر ەنەرگەتيكالىق نارىق 2019 جىلى, ال مۇناي مەن گازدىڭ ورتاق نارىعى 2025 جىلى قالىپتاسىپ, جۇمىس ىستەي باستايدى. ءبىز بۇل باعدارلامالاردى قابىلداي كەلە, بىرىڭعاي ەنەرگەتيكالىق ساياساتتى قالىپتاستىرامىز», – دەدى. سونداي-اق, ول 2025 جىلى ارىپتەس ءۇش مەملەكەت ورتاق ەنەرگەتيكالىق نارىقتىڭ قالىپتاسۋىن قامتاماسىز ەتەتىن حالىقارالىق كەلىسىمگە قول قوياتىنىن جەتكىزدى. دانيال احمەتوۆ جيىن بارىسىندا ورتاق نارىق قالىپتاستىرۋدا الەمدىك تاجىريبەلەردىڭ وزىق ۇلگىسى نازارعا الىناتىنىن ايتتى. د.احمەتوۆ: «ءبىز بۇل جەردە الەمدىك ءتيىمدى مودەلدەردى قاراستىردىق. ازىرگە باعدارلاما قالىپتاسپاعان سوڭ ءدال قانداي ۇلگى قابىلداناتىنىن ايتا المايمىن. الايدا, تاريح كۋا بولعانداي, سكانديناۆيا ارالى ەلدەرىنىڭ قالىپتاستىرعان ۇلگىسى Nord Pool  بىرنەشە مەملەكەتتىڭ ەنەرگەتيكالىق مۇمكىندىكتەرىن شوعىرلاندىرىپ, ەلەكتر ەنەرگياسىن ۇنەمدى جۇمساۋعا ءارى ەل ەكونوميكاسىنىڭ دامۋىنا سەپتىگىن تيگىزدى. سول سياقتى ەۋروپالىق, امەريكالىق مودەلدەر بار. مەنىڭ ويىمشا, ەۋرازيالىق ەكونوميكالىق وداققا ورتاق نارىق ەۋروپا مودەلى بويىنشا قالىپتاسادى. ويتكەنى, مۇندا ءار ەلدىڭ ۇلتتىق مۇددەسى قاتاڭ قورعالادى», – دەدى. جولدىباي بازار. دەرەككوز: «قازاقپارات». فوتو: forbes.kz.