اقتوبە وبلىسىندا ەكى باسقارمانىڭ باسشىلارى تاعايىندالدى

استانا. 10 شىلدە. اقتوبە وبلىسىنىڭ اكىمى ارحيمەد مۇحامبەتوۆتىڭ وكىمىمەن وبلىستىق كاسىپكەرلىك جانە يندۋستريالدى-يننوۆاتسيالىق دامۋ باسقارماسىن قايتا قۇرۋ بارىسىندا پايدا بولعان ەكى باسقارمانىڭ باسشىلارى تاعايىندالدى. بۇل تۋرالى «قازاقپارات» حابارلادى. حابارلامادا كورسەتىلگەندەي, وبلىستىق يندۋستريالدى-يننوۆاتسيالىق دامۋ باسقارماسىنىڭ باسشىسى بولىپ مارات بالمۇحانوۆ تاعايىندالدى. 53 جاستاعى مارات نۇرەن ۇلى بالمۇحانوۆ ماسكەۋ تاۋ-كەن ينستيتۋتىن تاۋ-كەن ينجەنەرى ماماندىعى بويىنشا بىتىرگەن. ەڭبەك جولىن 1976 جىلى مۇعالجار اۋدانىنىڭ دميترەۆا اتىنداعى كەڭشارىندا تىركەۋشى بولىپ باستاعان. ول 1998 جىلى وبلىستىق ەكونوميكا باسقارماسى سىرتقى ەكونوميكالىق بايلانىس جانە ينۆەستيتسيا ءبولىمىنىڭ باستىعى, كەيىننەن باسقارما باستىعىنىڭ ورىنباسارى بولدى. 2005 جىلى اقتوبە وبلىستىق كاسىپكەرلىك جانە ونەركاسىپ دەپارتامەنتى ديرەكتورىنىڭ ورىنباسارى قىزمەتىنە تاعايىندالدى. 2010 جىلدان باستاپ وسى تاعايىنداۋعا دەيىن وبلىستىق كاسىپكەرلىك جانە يندۋستريالدى-يننوۆاتسيالىق دامۋ باسقارماسىن باسقارىپ كەلدى. ال وبلىستىق كاسىپكەرلىك باسقارماسىنىڭ باسشىسى بولىپ باعجان تىلەگەنوۆ تاعايىندالدى. 32 جاستاعى باعجان تىلەگەنوۆ ەڭبەك جولىن 2006 جىلى اقتوبە وبلىسى كاسىپكەرلىك جانە ونەركاسىپ دەپارتامەنتىنىڭ ءىس قاعازدارىن جۇرگىزۋ ينسپەكتورى بولىپ باستاعان. 2008 جىلى وبلىستىق كاسىپكەرلىك جانە ونەركاسىپ باسقارماسى ءبولىمىنىڭ باستىعى بولدى. 2012 جىلدىڭ ناۋرىزىنان باستاپ وسى تاعايىنداۋعا دەيىن اقتوبە وبلىستىق كاسىپكەرلىك جانە يندۋستريالدى-يننوۆاتسيالىق دامۋ باسقارماسى باسشىسىنىڭ ورىنباسارى قىزمەتىن اتقاردى. جولدىباي بازار. دەرەككوز: «قازاقپارات». فوتو: i-news.kz.