جاستاردى نەسيەلەۋ باعدارلاماسى ەڭبەك جانە حالىقتى الەۋمەتتىك قورعاۋ مينيسترلىگىنىڭ كاسىپكەرلىكتى دامىتۋ جونىندەگى 2021-2025 جىلدارعا ارنالعان ۇلتتىق جوباسى شەڭبەرىندە ىسكە اسىرىلىپ كەلەدى. مۇنداعى ماقسات – جاستاردىڭ ءوز ءىسىن اشۋ نەمەسە كەڭەيتۋگە جاردەمدەسۋ. نەسيە مەرزىمى – مال شارۋاشىلىعىن دامىتۋعا ارنالسا – 7 جىل, بيزنەستىڭ باسقا دا باعىتتارى ءۇشىن 5 جىلعا دەيىن بەرىلەدى. قاتىسۋشىلارعا جالپى سوماسى 5 ملن تەڭگە ۇلەستىرىلەدى.
– اگرارلىق نەسيە كورپوراتسياسى جاستارعا شاعىن نەسيە بەرۋ باعدارلاماسى اياسىندا سەنىم بىلدىرىلگەن وكىل-اگەنت رەتىندە قۇجات قابىلداۋ, بيزنەس-جوبانى باعالاۋ, نەسيە جانە كەپىل تۋرالى كەلىسىمدەردى دايىنداۋ, نەسيە سوماسىن قارىز الۋشىعا بەرۋ, نەسيەنىڭ پايدالانىلۋىن تەكسەرۋ, قارىز الۋشىمەن ەسەپ ايىرىسۋدى جۇرگىزۋ, قارىز الۋشىدان تولەم قابىلداۋ جانە مەرزىمى وتكەن بەرەشەكپەن جۇمىس جانە ۋاكىلەتتى ورگاندارعا ەسەپ بەرۋ ءۇشىن جاۋاپتى. ءوتىنىش بەرگەن ساتتە جاستاردىڭ كاسىپكەر رەتىندە تىركەلگەن ۋاقىتى 5 جىلدان اسپاۋعا ءتيىس. باعدارلاماعا جۇمىس ىستەيتىن جاستار دا قاتىسا الادى. بۇگىندە شاعىن نەسيەنى الۋعا 761 ءوتىنىم ءتۇستى. نەگىزى بورىش پەن سىياقى وتەۋ كەزىندە شاعىن نەسيە مەرزىمىنىڭ ۇشتەن بىرىنە دەيىن جەڭىلدىك كەزەڭى قاراستىرىلعان. نەسيە كەپىل م ۇلىكپەن قامتىلۋى مىندەتتى. كەپىل رەتىندە جىلجىمالى ارنايى تەحنيكا جانە جىلجىمايتىن م ۇلىك قابىلدانادى. كەپىل م ۇلىك بولماعان جاعدايدا كەپىل بەرۋشىلەر باسقا تۋىستارى ءوز كەپىلدەرىن بەرە الادى, – دەدى «اگرارلىق نەسيە كورپوراتسياسى» اق استانا فيليالى ديرەكتورىنىڭ نەسيەلەۋ جونىندەگى ورىنباسارى ولجاس بايماحانوۆ.
كاسىپكەرلىك باستامالاردى قولداۋعا باعىتتالعان ميكروكرەديت جىلجىمايتىن م ۇلىكتى, ونىڭ ىشىندە تۇراقتى تۇرعىن ۇيلەردى, جەر ۋچاسكەلەرىن, باعالىق قاعازداردى جانە قارۋدى, قۇرامىندا ەسىرتكى زاتتارى بار تاۋارلاردى, ويىن بيزنەسىن ۇيىمداستىرۋدى, ەل زاڭناماسىنا قايشى كەلەتىن جانە تەمەكى نەمەسە الكوگول ونىمدەرىن ساتىپ الۋدى كوزدەيتىن جوبالارعا بەرىلمەيدى.
– ۇمىتكەرلەر وزدەرىنىڭ بيزنەس جوسپارىن, كوميسسيا وتىرىسىندا كورسەتەدى. كوميسسيا بيزنەس جوسپارلاردى باعالاپ, ۇزدىكتەرىن ىرىكتەيدى. جوبا وزەكتى, دالەلدى, ەكونوميكالىق نەگىزدەلگەن, الەۋمەتتىك ماڭىزى بار, ومىرشەڭ جانە ونىڭ ناقتى ءىس-قيمىل جوسپارى بولۋعا ءتيىس. قاتىسۋ ءۇشىن جەكە باسىن كۋالاندىراتىن قۇجات, جوبا بويىنشا بيزنەس جوسپار, قىزمەت كورسەتەتىن بانكتەن شوتى بار ەكەنىن راستايتىن انىقتامالار, قارجى ۇيىمدارىنان نەسيە بەرەشەگىنىڭ, ونىڭ ىشىندە مەرزىمى وتكەن بەرەشەكتىڭ بولۋى تۋرالى انىقتامالار, ۇمىتكەردىڭ جالاقىسى نەمەسە وزگە دە تابىستارىن راستايتىن قۇجات جانە جيناقتاۋشى زەينەتاقى قورىنان ءۇزىندى كوشىرمە, كەپىل م ۇلىكتى باعالاۋ تۋرالى ەسەپ, كەپىل بەرۋشى جانە كەپىلمەن قامتاماسىز ەتۋ جونىندەگى قۇجاتتارى قاجەت. فيليالداردىڭ نەگىزگى مەكەنجايلارى – «agrocredit.kz» سايتىندا ورنالاسقان, – دەدى «اگرارلىق نەسيە كورپوراتسياسى» اق وكىلى.
وتىنىمدەر 16 وبلىستا جانە استانا, الماتى, شىمكەنت قالالارىندا قابىلدانىپ جاتىر. ال شىعىس قازاقستان وبلىسىندا وتىنىمدەردى قابىلداۋ جۋىق ارادا باستالماقشى. جالپى, بيىل 5 796 ميكروكرەديت بەرۋ جوسپارلانعان.
ايتا كەتەيىك, شاعىن نەسيە بەرۋ تۋرالى شەشىمدى اكىمدىك جانىنان قۇرىلعان كوميسسيا قابىلدايدى. وعان ءماسليحات دەپۋتاتتارى, مەملەكەتتىك ورگانداردىڭ, «اتامەكەن» كاسىپكەرلەر پالاتاسىنىڭ, كاسىپكەرلەر, باق وكىلدەرى كىرەدى.
